މިއީ ޢިމާރާތްކުރުމުގެ މަޝްރޫއުތައް ބާރަށް ކުރިއަށް ގެންދަންވީ ވަގުތު ނޫންކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ޕްލޭނިން މިނިސްޓަރ މުޙައްމަދު އަސްލަމާ މެންބަރަކު ދެންނެވި ސުވާލަކާއި ގުޅިގެން ރައީސް ނަޝީދު ވިދާޅުވީ، ސަރުކާރުގެ ވައުދުތައް ފުއްދުމުގެ ގޮތުން ހިންގާ މަޝްރޫއުތައް މިވަގުތު މަޑުޖައްސައިލަން ޖެހޭކަމަށާއި، އެއީ ރާއްޖޭގެ މާލީ ހާލަތާއި، ދުނިޔޭގެ ކަންކަމަށް އަންނަ ބަދަލާއި ގުޅިގެންކަމަށެވެ.
އެހެންކަމުން މަޝްރޫޢުތައް މިވަގުތު މަޑުޖައްސާލުމަކީ ބޭނުންތެރިކަމެއްކަމަށް ރައީސް ނަޝީދު ވިދާޅުވިއެވެ.
މަޝްރޫއުތައް މަޑުޖައްސާލުމަކީ މެންބަރުންނާއި ސަރުކާރަށްވެސް އެކަމުގެ ދަތިކަން ކުރިމަވާނެކަން ދެކެވަޑައިގަންނަވާކަމަށާއި، އެހެންނަމަވެސް އެއީ މިވަގުތަށް ކުރުން މުހިންމު ކަމެއްކަމަށް ނަޝީދު ވިދާޅުވިއެވެ.
ދުނިޔޭގެ އިޤްތިޞާދަށް ބޮޑެތި ގޮންޖެހުންތަކެއް ހުރިކަން ފާހަގަކުރައްވާ އެކަމުގެ މިސާލު ނަންގަވަމުން ރައީސް ނަޝިދު ވަނީ ތެލުގެ އަގު ބޮޑޫވެ ސްރީލަންކާއިން ފެންނަ ހާލަތު ތަފްސީލް ކޮށްދެއްވާފައެވެ. މި ޖަލްސާގައި މިސަރުކާރުގެ މަޝްރޫޢުއާއި ގުޅޭގޮތުން މެންބަރަކު ދެންނެވި ސުވާލަކަށް ޖަވާބުދެއްވަމުން މިނިސްޓަރ އަސްލަމް ވިދާޅުވީ، ރައީސް ޞަލިޙް ވެވަޑައިގެންފައިވާ ހުރިހާ ވަޢުދުފުލެއް ނުފުއްދޭނެކަމަށާއި، ނަމަވެސް މަސައްކަތްކުރަނީ ގިނަ ކަންކަން ކުރުމަށްކަމަށެވެ.
