އެމްޕީއެލްގެ ބަނދަރުތަކަށް ބާލާ މުދަލާއި ބަނދަރުތަކުގައި ބޭނުންކުރާ އުޅަނދުފަހަރާއި ތަކެތި އިންޝޫރަންސް ކޮށްދޭނެ ފަރާތެއްގެ ގޮތުގައި ސިލިންކޯ އިންޝުއަރެންސް ކޮމްޕެނީ ޕްރައިވެޓް ލިމިޓެޑް އައްޔަން ކޮށްފައިވަނިކޮށް، މުދާ ބާލާ ބަނދަރުގައި ހިނގި ހަދިސާއަކާއި ގުޅިގެން، އެމްޕީއެލްއިން ކުރި އިންޝޫރަންސް ކްލެއިމް ސިލިންކޯ އިންޝުއަރެންސްއިން ރައްދު ކޮށްފައިވާތީ، އެކުންފުނީގެ މައްޗަށް އެމްޕީއެލްއިން ކުރި ދައުވާގެ ޝަރީއަތަށް ކުންފުނީގެ ގާނުނީ ވަކީލުން ހާޒިރު ނުވުމުގެ ސަބަބުން މައްސަލަ ސިވިލް ކޯޓުން ބާތިލް ކޮށްދިއެވެ.
އެމްޕީއެލްއިން ކްލެއިމްކުރި އިންސޫރަންސަށްވާ ފައިސާ ދެއްކުމަށް ސިލިންކޯ އިންޝޫރަންސްއިން ދެކޮޅު ހެދުމާއި ގުޅިގެން، 2021ވަނަ އަހަރުގެ އެޕްރިލްމަހު އެމްޕީއެލްއިން ސިވިލް ކޯޓުގައި ދައުވާ ކޮށްފައިވަނީ، އާންމު މުދާ ބާލާ ބަނދަރުގައި ހިނގި ހާދިސާގައި މެގްނަމް ކޮންޓެއިނަރއަކަށް ލިބުނު ގެއްލުމަށްވާ 31،240.44 އެމެރިކާ ޑޮލަރާއި، ހުސް ކޮންޓެއިނަރެއް ވެއްޓި އެ ކޮންޓެއިނަރާއ،ި އެ ކޮންޓެއިނަރ ވެއްޓިގެން ހަލާކުވި ދެ ކޮންޓެއިނަރއަށް ލިބުނު ގެއްލުމަށްވާ 7،861.01 އެމެރިކާ ޑޮލަރާއި، ބިސްކޯދު ކޮންޓެއިނަރއަކަށް ލިބުނު ގެއްލުމަށްވާ 16،407.95 އެމެރިކާ ޑޮލަރާއިއެކު، ޖުމްލަ 55،509.40 އެމެރިކާ ޑޮލަރު އިންސޫރަންސް ކްލެއިމްގެ ގޮތުގައި ހޯދުމަށެވެ.
މި ދައުވާގައި އެމްޕީއެލްއިން ސިވިލް ކޯޓަށް ހުށަހެޅި މައްސަލާގައި ބުނެފައިވަނީ، މުދާ ބާލާ ބަނދުރުގައި ބޭނުންކުރާ އުޅަނދު ފަހަރާއި ތަކެތި އިންޝުއަރ ކޮށްދޭނެ ފަރާތެއް ހޯދުމަށް ކުރެވުނު އިއުލާނަށް ސިލިންކޯ އިންޝުއަރެންސް ކޮމްޕެނީ ޕްރައިވެޓް ލިމިޓެޑްއިން އިޖާބަދީ، ހުށަހެޅި ކޯޓޭޝަން މޯލްޑިވްސް ޕޯޓްސް ލިމިޓެޑްއިން ގަބޫލުކޮށް ފައިސާ ދައްކާ އަގުދުވެފައި ވަނިކޮށް، ދިމާވި ހާދިސާއަކާއި ގުޅިގެން އިންޝޫރަންސްއަށް ކްލެއިމް ހުށަހެޅުމުން، ސިލިންކޯ އިންޝުއަރެންސް ކޮމްޕެނީ ޕްރައިވެޓް ލިމިޓެޑްއިން ހުށަހެޅި އަދި މޯލްޑިވްސް ޕޯޓްސް ލިމިޓެޑްއިން ގަބުލުކުރި ކޯޓޭޝަންގައި ހިމަނާފައިވެސް ނުވާ އަދި ޙަވާލާ ދީފައިވެސް ނުވާ ލިޔުމަކާއި ޙަވާލާދީ، އިންޝޫރަންސް ކްލެއިމް ރައްދުކޮށް ބަދަލު ދީފައި ނުވާތީ، ސިލިންކޯ އިންޝުއަރެންސް ކޮމްޕެނީ ޕްރައިވެޓް ލިމިޓެޑްއިން ހުށަހެޅި ހުށަހެޅުން މޯލްޑިވްސް ޕޯޓްސް ލިމިޓެޑްއިން ގަބޫލުކުރުމުން ދެފާރާތް ދެމެދު އުފެދުނު ޢަޤުދާއި ޚިލާފަށްކަމަށް ކަނޑައަޅައިދީ، މެގްނަމް ކޮންޓެއިނަރއަށް ލިބުނު 31،240.44 އެމެރިކާ ޑޮލަރާއި ހުސް ކޮންޓެއިނަރެއް ވެއްޓި އެ ކޮންޓެއިނަރާއ،ި އެ ކޮންޓެއިނަރ ވެއްޓިގެން ހަލާކުވި ދެ ކޮންޓެއިނަރއަށް ލިބުނު ގެއްލުމަށްވާ 7،861.01 ޑޮލަރާއި، ބިސްކޯދު ކޮންޓެއިނަރއަކަށް ލިބުނު ގެއްލުމަށްވާ 16،407.95 ޑޮލަރާއިއެކު، ޖުމްލަ 55،509.40 އެމެރިކާ ޑޮލަރު ހޯދުމަށް އެދި މޯލްޑިވްސް ޕޯޓްސް ލިމިޓެޑްގެ ފަރާތުން ސިލިންކޯ އިންޝުރަންސް ކޮމްޕެނީ ޕްރައިވެޓް ލިމިޓެޑްގެ މައްޗަށް ދައުވާ ކުރާ ކަމުގައެވެ.
މިމައްސަލާގައި ސިވިލްކޯޓުން ކުރި ހުކުމްގައި ބުނެފައިވަނީ ދައުވާ ކުރާ ފަރާތް ކޯޓުގައި ތަމްސީލު ކުރުމަށް އައްޔަން ކޮށްފައިވާ ފަރާތް 12 މެއި 2022ގެ 13:30އަށް ކޯޓަށް ހާޒިރުވުމަށް އަންގައި، "ކޯޓުގެ އަމުރު" ރައްދު ކޮށްފައި ވީނަމަވެސް، އެ ތާރީޚުގައި އަމުރާއި އެއްގޮތަށް އެފަރާތުން ކޯޓަށް ހާޒިރު ވެފައި ނުވާކަމުގައެވެ.
މިގޮތުން ހުކުމުގައި ބުނެފައިވަނީ، "ސިވިލް ކޯޓަށް ދައުވާ ނުވަތަ މައްސަލަ ހުށަހެޅުމާއި ޝަރީއަތް ހިންގުމުގައި އަމަލުކުރާނެ ގޮތުގެ އުސޫލު"ގެ 55 ވަނަ މާއްދާގައިވާ (ހ)ގެ (1)ވަނަ ނަމްބަރާއި، (2)ވަނަ ނަމްބަރަށް ބެލުމަށްފަހު، މައްސަލަ ހުށަހަޅާ ފަރާތަށް، ކޯޓަށް ހާޒިރުވުމުގެ އަމުރު ރައްދުވެ މަގުބޫލު އުޒުރެއް ބަޔާން ކުރުމެއް ނެތި އަމުރުގައި ވާ ގަޑިއަށް ކޯޓަށް ހާޒިރު ނުވެއްޖެނަމަ، ކޯޓަށް މީހުން ހާޒިރު ކުރުމުގައި އަމަލު ކުރާނެ ގޮތުގެ ގަވާއިދުގެ 29ވަނަ މާއްދާގައިވާ ގޮތުގެމަތިން ފޯމު ބާތިލް ކުރުމުގައި 2 ގޮތެއް ވާ ކަމުގައެވެ.
އެ ގޮތްތަކަކީ؛
- ގަޟިއްޔާގައި ގޮތެއް ނިންމޭ މިންވަރަށް މައްސަލަ ކުރިޔަށް ގެންދެވިފައި ނުވާނަމަ ދައުވާ ފޯމު ބާތިލުކޮށް މައްސަލަ ނިންމުން،
- ގަޟިއްޔާގައި ގޮތެއް ނިންމޭ މިންވަރަށް މައްސަލަ ކުރިޔަށް ގެންދެވިފައި އޮވެ، ދައުވާ ލިބޭ ފަރާތުން މައްސަލާގައި ހުކުމެއް ކުރުމަށް އެދޭނަމަ ދައުވާ ކުރާ ފަރާތުގެ ޣައިރު ހާޒިރުގައި ހުކުމް ކޮށް ނިންމުން
މިގޮތުން، މައްސަލާއިގެ ގޮތެއް ނިންމޭ މިންވަރަށް މައްސަލަ ކުރިޔަށް ގޮސްފައި ވަނިކޮށް، އެމްޕީއެލްގެ ގާނޫނީ ވަކީލުން މިމަހުގެ 12ވަނަ ދުވަހު ކޯޓަށް ހާޒިރު ވެފައި ނުވާތީ، އިސްވެ ދެންނެވުނު ގަވާއިދުގައިވާ ގޮތުގެ މަތިން ސިލިންކޯ އިންޝޫރެންސްއިން ދައުވާ ބާތިލް ކުރުމަށް އެދުމާއި ގުޅިގެން، މޯލްޑިވްސް ޕޯޓްސް ލިމިޓެޑްއިން ސިލިންކޯ އިންޝޫރަންސް ކޮމްޕެނީ ޕްރައިވެޓް ލިމިޓެޑްގެ މައްޗަށް ދައުވާކޮށް ހުށަހެޅި މި މައްސަލައިގެ ދައުވާ ފޯމު ބާތިލް ކޮށް، ޤަޟިއްޔާ ނިންމީކަމަށް ސިވިލް ކޯޓުން ހުކުމް ކޮށްފައި ވެއެވެ.
