މިމަހުގެ 20 ވަނަ ދުވަހުގައި ރިލީޒް ކުރި ކަންގަނާ ރަނާވަތުގެ "ދާކަޑް" އަށް ވުރެ ހަމަ އެދުވަހު ރިލީޒް ކުރި ކާތިކް އާރިޔާންގެ ފިލްމު "ބޫލު ބުލައްޔާ" އަށް ލިބޭ ތަރުހީބު މާބޮޑުވެއްޖެއެވެ.
ބޮލީވުޑްގެ ފިލްމުތަކަށް މާ ބޮޑު ތަރުހީބެއް ނުލިބޭ ދުވަސްވަރެއްގައި އެޅުވި އެ ފިލްމާއެކު ބެލުންތެރިންގެ ފަރާތުން ލިބެމުން އަންނަ ތަރުހީބު ބޮޑެއެވެ. އަދި މިއާއެކު ކާތިކްގެ މި ފިލްމްއަކީ ރިލީޒްކުރި ދުވަހު އެހާ ބޮޑު ތަރުހީބެއް ލިބުނު ފުރަތަމަ ފިލްމަށް ވަނީ ވެފައެވެ.
"ބޫލް ބުލައްޔާ"ގެ ދެވަނަ ބަޔަކީ 2007 ވަނަ އަހަރު ނެރުނު ބިރުވެރި މަޖާ ފިލްމު "ބޫލް ބުލައްޔާ"ގެ ސީކުއެލްއެކެވެ. އެއީ އަކްޝޭ ކުމާރާއި ވިދްޔާ ބަލަން ލީޑު ރޯލު ކުޅުނު ފިލްމެކެވެ.
އަނީސް ބަޒްމީ ޑައިރެކްޓް ކޮށްފައިވާ "ބޫލް ބުލައްޔާ2″ އިން ފެނިގެން ދަނީ ކާތިކް އާރިޔާން އާއި ކިއާރާ އަދްވާނީ އަދި ތަބޫއެވެ.
މި ފިލްމާއި ކްލޭޝްވި ކަންގަނާ ރަނާވަތުގެ ފިލްމް "ދާކަޑް" އަށް ފުރަތަމަ ދުވަހުވެސް ލިބިގެންދިއަ ފިނި ތަރުހީބުގެ ސަބަބުން އެފިލްމު ވަނީ ބައެއް ސިނަމާތަކުން ނަގާފައެވެ. އަދި ވެސް ކުރިއަށް އޮތްތަނުގައި މި ފިލްމު އަޅުވާ ސިނަމާތައް މަދު ކުރާނެ ކަމަށް ޚަބަރުތައް ބުނެއެވެ.
"ދާކަޑް" އަކީ ކަންގަނާގެ ވަރަށް އުންމީދީ ފިލްމެކެވެ. އެއީ އެކްޝަން ތްރިލާއެކެވެ. މި ފިލްމުގައި ކަންގަނާ ކުޅެފައިވަނީ ސްޕައި އެއްގެ ރޯލެވެ. އަދި ވަރުގަދަ އެކްޝަން މަންޒަރު ތަކާއެކު ތަފާތު 7 ލުކެއްގައި އޭނާ މި ފިލްމުން ފެނިގެންދާނެއެވެ.
ރަޒްނީޝް ގާއީ ޑައިރެކްޓްކޮށްފައިވާ މި ފިލްމުން ކަންގަނާގެ އިތުރުން މުހިންމު ރޯލަކުން އަރުޖުން ރާމްޕަލް އަދި ދިވްޔާ ދައްތާވެސް ފެނިގެންދެއެވެ.
