الحمد لله والصلاة والسلام على رسول الله وعلى آله وصحبه، أما بعـد:

ފިރިހެނަކު އޭނާގެ އަންހެނުން ތިންފަހަރަށް ވަރިކޮށްފިނަމަ، ދެން އެދެމީހުންނަށް ކައިވެނި ކުރެވޭނީ އެއަންހެން މީހާ އެހެން ފިރިހެނަކާ ކައިވެނި ކުރުމަށްފަހު ވަރިވުމުންނެވެ. ސޫރަތުލް ބަގަރާގެ 230 ވަނަ އާޔަތުގައި މާތް ﷲ ވަޙީ ކުރައްވާފައިވެއެވެ. (فَإِن طَلَّقَهَا فَلَا تَحِلُّ لَهُ مِن بَعْدُ حَتَّىٰ تَنكِحَ زَوْجًا غَيْرَهُ) މާނައަކީ: " ދެން (ތިންވަނަ ފަހަރަށް) އެކަނބުލޭގެ ވަރިކޮށްފިނަމަ، އެއަށްފަހު، އެކަނބުލޭގެ އެހެން ފިރިޔަކާ ކާވެނި ކޮށްފުމަށް ދާނދެން އޭނާއަކަށް (އެބަހީ: ތިންފަށްކުޅަ ފިރިޔާއަށް) އެކަނބުލޭގެ حلالއެއް ނުވާނެތެވެ".

ނަމަވެސް މިގޮތުން ކުރެވޭ ކައިވެންޏަކީ ޞައްޙަ ކައިވެންޏަކަށް ވާންޖެހޭނެއެވެ. މުތްޢާ ކައިވެންޏަކަށް (ވަކި މުއްދަތެއް ކަނޑައެޅިގެން ކުރެވޭ ކައިވެނި) ނުވަތަ ކުރީގެ ފިރިމީހާ އަށް ފަށްކަނޑާ ދިނުމުގެ ގޮތުން ކުރެވޭ ކައިވެންޏަކަށް ވެގެން ނުވާނެއެވެ. މިފަދަ ކައިވެންޏެއް ކޮށްގެން ކުރީގެ ފިރިމީހާއަށް ޙަލާލެއްވެސް ނުވާނެއެވެ.

ފަށްކަނޑަން ކައިވެނި ކުރުމަކީ ހުއްދަ ކަމެއް ނޫން ކަމުގައި ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ޙަދީޘް ކުރައްވާ ބަޔާންކޮށް ދެއްވާފައިވެއެވެ. (لَعَنَ اللَّهُ الْمُحَلِّلَ وَالْمُحَلَّلَ لَهُ) މާނައަކީ: "ފަށްކަނޑާދޭ މީހާ އަށާއި ފަށްކަނޑުވައިދެވޭ މީހާ އަށް ﷲ ލަޢްނަތް ލެއްވިއެވެ".

ފަށްކަނޑައިދޭ މީހަކީ އެނިޔަތުގައި ކައިވެނި ކުރާ ފިރިމީހާ އެވެ. ފަށްކަނޑުވައިދެވޭ މީހާ އަކީ ކުރީގެ ފިރިމީހާ އެވެ.

ޢުމަރު-ރަޟިޔަﷲ ޢަންހު- މީސްތަކުންނާ މުޚާޠަބު ކުރައްވާ ދެއްވި ޚުޠުބާ އެއްގައި ވިދާޅުވިކަމަށް ވާރިދު ވެފައިވެއެވެ. (والله لا أوتى بمحلٍّ ومحلَّل له إلا رجمتهما(މާނައަކީ: "ﷲ ގަންދީ ބުނަމެވެ. ފަށްކަނޑާ މީހާ އާއި ފަށްކަނޑުވައިދޭ މީހާ ތިމަންކަލޭގެފާނުގެ ގާތަށް އަތުވެއްޖެނަމަ ރަޖަމް ކުރާ ހުށީމެވެ".

އިމާމް ނާފިޢްގެ ކިބައިން ރިވާވެގެންވެއެވެ. އިބްނު ޢުމަރު-ރަޟިޔަﷲ ޢަންހު- ގެ ގާތަށް މީހަކު އައިސް ދެންނެވިއެވެ. "ތިމަންނާ އަންހެނަކާ ކައިވެނި ކޮށްފީމެވެ. އެކަނބުލޭގެގެ ކުރީގެ ފިރިމީހާއަށް ޙަލާލުކޮށް ދިނުމުގެ ގޮތުންނެވެ. އެކަނބުލޭގެ ފިރިމީހާ ބުނެގެންނެއް ނޫނެވެ".

އިބްނު ޢުމަރު-ރަޟިޔަﷲ ޢަންހު- ވިދާޅުވިއެވެ. "ނޫނެކެވެ. ކަލޭ އެކަނބުލޭގެ އާއި ކައިވެނި ކުރާ ހިތުން ކުރާ ކައިވެންޏެވެ. ކަލެއަށް ކަމުދާނަމަ ބަހައްޓާށެވެ. ކަމުނުދާނަމަ ދޫކޮށްލާށެވެ. އަދި ވިދާޅުވިއެވެ. ކީރިތި ރަސޫލުﷲ-ޞައްލަﷲ ޢަލައިހި ވަސައްލަމަ- ގެ ޒަމާނުގައި އެފަދަ ކަންތައް (ފަށްކެނޑުމަށް ކުރެވޭ ކައިވެނި) ބެލެވެނީ ފާޙިޝް ޢަމަލެއްގެ ގޮތުގައެވެ. އެދެމީހުން އިނދެގެން ވިހި އަހަރުދުވަސް ވަންދެން އުޅުނު ކަމުގައިވީނަމަވެސް އެކުރެވެނީ ޒިނޭއެވެ".

އެހެންކަމުން ފަށްކެނޑުމުގެ ނިޔަތުގައި ކައިވެނި ކުރުމަކީ ޙަރާމް ކަމެކެވެ.

والله أعلم.