އެހެން ކައުންސިލްތަކާއި މާލެ ސިޓީ ކައުންސިލާއި މެދު ތަފާތުކުރުންތަކެއް މި ސަރުކާރުން ގެންގުޅޭ ކަމަށް ވިދާޅުވެ މާލެ ސިޓީގެ މޭޔަރު ޑރ. މުޙައްމަދު މުޢިއްޒު ކަންބޮޑުވުން ފާޅުކުރައްވައިފިއެވެ.

ވީޓީވީގެ ޕްރޮގްރާމްގައި ވާހަކަފުޅު ދައްކަވަމުން މާލޭގެ މޭޔަރު ވިދާޅުވީ ލާމަރުކަޒީ ޤާނޫނުގައި ކައުންސިލްތަކުން ދޭންޖެހޭ ޚިދުމަތްތަކާއި ކައުންސިލްތަކުގެ ޒިންމާތައް ސާފުކޮށް ބަޔާންކޮށްފައިވީނަމަވެސް މާލެ ސިޓީ ކައުންސިލާއި ދޭތެރޭ ސަރުކާރުން ތަފާތުކުރުން ގެންގުޅޭ ކަމަށެވެ.

ލާމަރުކަޒީ ގާނޫނުގަ ވަރަށް ސާފުކޮށް ބަޔާންކޮށްފަވޭ ކައުންސިލްތަކުގެ ޒިންމާތަކާއި ދޭންޖެހޭ ޚިދުމަތްތައް. އެހެން ނަމަވެސް މާލެ ސިޓީ ކައުންސިލް ވީމަ މި ސަރުކަރުން ތަފާތު ތަކެއް ގެންގުޅޭ.

– މުއިއްޒު ވިދާޅުވިއެވެ.

މޭޔަރު ވިދާޅުވީ ލާމަޒރުކަޒީ ޤާނޫނުގައި ބަޔާންކޮށްފައިވާ ފަދައިން ކައުންސިލްތަކަށް ލިބިދޭންޖެހޭ ބާރުތައް ރާއްޖޭގެ އެހެން ރަށްރަށުގެ ކައުންސިލްތަކަށް ލިބުނު ނަމަވެސް މާލެ ސިޓީ ކައުންސިލަށް މިކަން މި އުސޫލުން ހަމަޖެހިފައިނުވާ ކަމަށެވެ.

ރާއްޖޭގެ ގިނަ ރަށްތަކުގައި ޤާނޫނުގަ މި ދެންނެވި ބާރުތަކާ މަސްއޫލިއްޔަތުތަކާއި ޚިދުމަތްތަކާ ޒިންމާތައް މި ދެންނެވިގޮތަށް އެބަ ފުރުޞަތު ދެއްވާ. މާލޭގަ ވީމާ މިފެންނަނީ މުޅިން އެހެން މަންޒަރެއް.

– މުއިއްޒު ވިދާޅުވިއެވެ.

މޭޔަރުގެ ވާހަކަ ފުޅުގައި އިތުރަށް ވިދާޅުވީ ލޯކަލް ކައުންސިލް އިންތިޚާބުގެ ކެމްޕޭނުގައި މި ސަރުކާރުގެ އެންމެ މަތިންފެށިގެން ހުރިހާ ވެރިންވެސް ލާމަރުކަޒީ ޤާނޫނުގެ ބާރުތައް ކައުންސިލްތަކަށް ދޭނެކަމަށް ވިދާޅުވަމުން ގެންދިޔަނަމަވެސް އިންތިޚާބަށްފަހު އެވާހަކަތައްވީ ބޭކާރު ވާހަކަ ތަކަކަށް ކަމަށެވެ.

އެކަމަކު ލޯކަލް ކައުންސިލް އިންތިޚާބުގެ ކުރިން މިދިޔަ އަހަރު ސަރުކާރުގެ ވެރިން ރައީސުލް ޖުމްހޫރިއްޔާ އިން ފެށިގެން، ރައްޔިތުންގެ މަޖިލީހުގެ ރައީސް އަދި ސަރުކާރުގެ އިސްވެރިން ކެމްޕޭނުގެ ދުވަސްވަރު ވިދާޅުވަމުން ދިޔައީ ރަށްރަށެކޭ މާލެއެކޭ ތަފާތުނުކޮށް ޤާނޫނުގަ ވާގޮތަށް އެބާރުތައް ދޭނަމޭ. އެހެން ނަމަވެސް އިންތިޚާބަށްފަހު އެވާހަކަތައްވީ ބޭކާރު، ޢަމަލެއް ނުކުރި ވާހަކަތަކަކަށް.

– މުއިއްޒު ވިދާޅުވިއެވެ.

މޭޔަރު އިތުރަށް ވިދާޅުވީ މާލެ ސިޓީގެ ރައްޔިތުންނަށް ކައުންސިލުން ދޭންޖެހޭ މުހިންމު ޚިދުމަތްތައް ފޯރުކޮށްދިނުމުގައިވެސް އެންމެބޮޑު ދަތިތަކެއް ކުރިމަތިވަނީ މުޅި ސަރުކާރުގެ އެއްބާރުލުން އެކަށީގެންވާ ގޮތުގެ މަތިން ލިބެމުން ނުދާތީކަމަށެވެ. އެހެން ނަމަވެސް ސަރުކާރުގެ ބައެއް މުއައްސަސާތަކުން އެހީތެރިކަން ލިބޭ ކަމަށް މޭޔަރު ފާހަގަކުރެއްވިއެވެ.