ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިސްތިއުފާއަށް، ނޭޝަނަލް ސެންޓަރ ފޯރ ދަ އާޓްސްގެ ސީނިއަރ އެގްޒެކެޓިވް ޑިރެކްޓަރ އަދި ފިލްމީ ތަރި ޢަބްދުﷲ މުޢާޒް ގޮވާލައިފިއެވެ.
އެމްޑީޕީގެ ވާދަވެރި އެތެރޭގެ އިންތިޚާބު އިއްޔެ ހިނގަމުން ދަނިކޮށް ރައީސް ނަޝީދު ރާއްޖޭގެ މީޑިއާއަކަށް ދެއްވި އިންޓަރވިއުއަކާއި ގުޅިގެން މީޑއާގައިި އެވާހަކަތައް ދެކެވެމުން އައިސްފައިވަނިކޮށް، މުއާޒް ކުރެއްވި ޓްވީޓެއްގައި ވަނީ ވަކި މީޑިއާއަކަށް ދައުވަތު ދީގެން މަޖިލީހަށް ގެންގޮސްގެން އެ ހިންގީ ކޮރަޕްޝަންގެ އަމަލެއްކަމަށެވެ. އޭނާ އެ ވިދާލުވީ ރައީސް ނަޝިދު ދިވެހި ޗެނަލަށް ދިން އެކްސްކުލޫސިވް އިންޓަރވިއުގެ ވާހަކައެވެ. މުއާޒް ވަނީ ރައީސް ނަޝީދު މަޖިލީހުގެ ރައީސްކަމުން އިސްތިއުފާދެއްވަން ޖެހޭކަމަށް ވިދާޅުވެފައެވެ.
Vaki media akah ekani dhauvathu dheegen majuleehah gengos e ginger seedha corruption ge amaleh. @MohamedNasheed majulees raeeskamun isthiufaa dheyn jehey.
— Muaa Abdulla (@muaa_abdulla) May 14, 2022
މި ސަރުކާރުގެ އެގްޒެކެޓިވް ޑިރެކްޓަރަކަށް އައްޔަންކުރެއްވިފަހުން މުއާޒަ އަންނަނީ ސަރުކާރަށް ސަނާކިޔައި އިދކޮޅު ފަރާތްތަކަށް ވަރަށް ބޮޑަށް ފާޑުވިދާޅުވަމުންނެވެ. ނަމަވެސް މުއާޒް ކުރާ އެކި ޓްވީޓްތަކަށް ސަރުކާރާއި އަދި އިދިކޮޅު ފަރާތްތަކުގެވެސް ބޮޑެތި ފާޑުކިޔުންތަކެއް އަމާޒުވެއެވެ.
ޚާއްޞަކޮށް ކުރީ ސަރުކާރުގައި ސިޔާސީ މަޤާމު އަދާކުރުމަށްފަހު މިސަރުކާރުގައިވެސް ސިޔާސީ މަޤާމެއް އަދާކުރާތީ ފާޑުކިޔުން ބޮޑެވެ.
އިއްޔެ ޗެއަރޕާސަން އިންތިޚާބު ހިނގަމުން ދަނިކޮށް، ރައީސް ނަޝީދު ދިވެހި ޗެނަލަށް ދެއްވި އިންޓަރވިއުގައި ވަނީ ކުރިއަށް އޮތް 2023 ގެ ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވާދަކުރައްވާނެ ކަމަށް ދެކެވަޑައިނުގަންނަވާ ކަމަަށް ވިދާޅުވެފައެވެ. ރައީސް ނަޝީދު ވިދާޅުވެފައިވަނީ، 2023 ވަނަ އަހަރަށް އެމްޑީޕީގެ ޕްރައިމަރީގައި އެމަނިކްފާނު ވާދަކުރައްވާނެ ކަމަށާއި، ޕްރައިމަރީއަށް ރައީސް ޞާލިޙާއި އެމަނިކުފާނުގެ އިތުރުން އެހެން އިތުރު ބޭފުޅަކުވެސް ނިކުންނެވުން ވަރަށް މުހިންމު ކަމަށެއެވެ.
ރައީސް ޞާލިޙާއި އެކަމުގައި މަޝްވަރާ ކުރެއްވިކަމަށް ވިދާޅުވެ ރައީސް ނަޝީދު ދެއްކެވި ވާހަކަފުޅު ރައީސް ޞާލިޙް ވަނީ ދޮގުކުރައްވާފައެވެ.
