މިއަދަކީ އެމްޑީޕީއަށް ބޮޑު ކާމިޔާބީއެއް ލިބިގެންދާނެ ދުވަހެއް ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅު ވެއްޖެއެވެ.
ނަޝީދު މިހެން ވިދާޅުވީ މިހާރު ކުރިޔަށްދާ އެމްޑީޕީގެ ޗެއަރޕާސަން ކަމާއި އަދި އަންހެނުންގެ ރޫހާއި ޒުވާނުންގެ ހިތްވަރުގެ ރައީސްކަމުގެ މަހާމަށް މެމްބަރުން އައްޔަން ކުރުމަށް ކުރިޔަށްދާ އެޕާޓީގެ އެތެރޭގެ އިންތިޚާބުގައި މިއަދު ހެނދުނު ވޯޓުލެއްވުމަށް މީޑިއާތަކާއި ވާހަކަ ދައްކަވަމުންނެވެ.
ޖަމާލުއްދީން ސްކޫލުގައި ބަހައްޓާފައިހުރި، ގަލޮޅު އުތުރު ދާއިރާގެ ވޯޓު ފޮއްޓަށް ވޯޓު ލެއްވުމަށްފަހު، މީޑިއާއަކުން ކުރެއްވި ސުވާލަކަށް ޖަވާބު ދެއްވަމުން ނަޝީދު ވިދާޅުވެފައިވަނީ، މިއަދު އެމްޑީޕީއަށް ކާމިޔާބު ލިބިގެން ދާނެކަމަށާއި، އެޕާޓީން އަބަދުވެސް މަސައްކުރަމުން ދަނީ، އިންތިޚާބުތައް ބާއްވާ ސުލްހަވެރި ސިޔާސީ ހަރަކާތައް ހިންގުމަށް ކަމަށެވެ. އަދި އެއީ ރާއްޖޭގެ ކުރިމަގު ބިނާކުރަން އެމްޑީޕީން އަބަދުވެސް ބޭނުންވާ ގޮތް ކަމުގައިވެސް ނަޝީދު ވިދާޅުވިއެވެ.
މިއަދު އެމްޑީޕީއަށް ކާމިޔާބު ލިބިގެން ދާނެކަމަށް ނަޝީދު ވިދާޅުވި ނަމަވެސް، ކުރިޔަށްދާ އެޕާޓީގެ ޗެއަރޕާސަން އިންތިޚާބުގެ ވާދަވެރިކަން ބޮޑުވެ، ޕާޓީވަނީ ވަރަށް ބައިބައި ވެފައެވެ. އަދި ޕާޓީގެ ތެރޭގައި މިހާރުވަނީ ރަސްމީ ގޮތެއްގައި ދެފެކްޝަން އުފެދިގެން ގޮސްފައެވެ. އަދި ކުރިޔަށް ދާ އިންތިޚާބުގެ ކެމްޕޭން ކުރިޔަށް ގޮސްފައިވަނީ ސިޔާސީ ވާދަވެރިކަމަށްވުރެ ބޮޑަށް ޒާތީ ކެޕްމޭނެއްގެ ގޮތުގައެވެ.
މީގެ އިތުރުން އެމްޑީޕީގެ އެތެރޭގައި އުފެދިފައިވާ ދެފެކްޝަންއިން ވަނީ އެއްބަޔަކު އަނެއް ބަޔަކަށް ވަަގަށް ގޮވާ، ކޮރަޕްޝަނާއި ފަސާދައިގެ ތުހުމަތު އަޅުވާ، ރާބުއިމާއި ޒިނޭގެ ތުހުމަތުވެސް އެއްބަޔަކު އަނެއް ބަޔަކަށް ކޮށްފައެވެ.
ޗެއަރޕާސަންގެ އިތުރުން މިއަދުގެ ވޯޓުގައި، އަންހެނުންގެ ރޫހުގެ ރައީސް ކަމާއި ޒުވާނުންގެ ހިތްވަރުގެ ރައީސަކު ވެސް މިއަދު ހޮވާނެ އެވެ. މި މަގާމުތަކުގެ ތެރެއިން އަންހެނުންގެ ރޫހަށް މީދޫ ދާއިރާގެ މެމްބަރު ރޮޒައިނާ އާދަމާ ވާދަކުރައްވަނީ ސަފާތު އަހްމަދެވެ. ޒުވާނުންގެ ހިތްވަރުގެ ރައީސް ކަމަށް ވާދަކުރައްވަނީ މުހައްމަދު އަންސަރާއި ރިފްގާ ޝިހާމެވެ.
އިންތިޚާބުގައި ވާދަކުރާ ދެ ކެނޑިޑޭޓުންގެ ޓީމުންވެސް ވަނީ ރާއްޖޭގެ ހުރިހާ ރަށަކަށް ދަތުރުކޮށް، ވާދަވެރި ކެމްޕޭނެއް ކުރައްވާފައެވެ.
އެމްޑީޕީގެ އެތެރޭގެ އިންތިޚާބުގައި މަޖިލިސް މެމްބަރު އިމްތިޔާޒު ފަހުމީއާއި، އިކޮނޮމިކް މިނިސްޓަރު ފައްޔާޒު އިސްމާއިލް ވާދަކުރެއްވި ނަމަވެސް، މިއިންތިޚާބު ބެލެވެިފައިވަނީ، ރައީސް ސާލިޙާއި ރައީސް ނަޝީދާއި ދެބޭފުޅުންގެ މެދުގައި އޮތް ވާދަވެރި ކަމެއްގެ ގޮތުގައެވެ. އަދި ދެބޭފުޅުންވެސް ވަނީ، ފާޅުގައި ކެމްޕޭނަށް ނުކުމެވަޑައިނުގެން، އެހެންނަމަވެސް ކެނޑިޑޭޓުންނަށް ތާއީދު ހޯއްދެވުމަށް މަސައްކަތް ކުރައްވާފައެވެ.
