މިހާރު ކުރިޔަށްދާ އެމްޑިޕީގެ ޗެއަރޕަރސަން އިންތިޚާބުގައި، ވޯޓުގަޑު ވޯޓު ފޮއްޓަށް ލުމުގެ ކުރިން، ވޯޓު ކަރުދާސް ދައްކަމުންދާ މައްސަލައެއް ފެންމަތި ވެއްޖެއެވެ.
އެމްޑީޕިގެ ރައީސް ނަޝިދު ފެކްޝަނަށް ތާއީދުކުރާ، އަދި އިމްތިޔާޒު ފަހުމީގެ ކެމްޕޭންގައި އިސްކޮށް ހަރަކާތަތެރިވާ، އުގޫފާރު ދާއިރާގެ މެމްބަރު މުހައްމަދު ވަހީދު ކުރެއްވި ޓުވީޓެއްގައި ވިދާޅުވެފައިވަނީ ފ. ނިލަންދޫގައި ވޯޓު ލުމަށްފަހު ވޯޓު ކަރުދާސް ދައްކަން އަންގަމުން ގެންދާ ކަމަށާއި، މިއީ ޕާޓީން ނެރެފައިވާ ވޯޓުލުން ކުރިޔަށް ގެންދާނޭ ގޮތުގެ އުސޫލުތަކާ ޚިލާފު ކަމެއް ކަމުގައެވެ.
އަދި އޭނާ ތުހުމަތު ކުރައްވާފައިވަނީ މިއީ ވޯޓުން މަކަރު ހަދަން ހިންގާ ކަމެއްގެ ގޮތުގައެވެ. އަދި އޭނާވަނީ ވޯޓު ކަރުދާސް ދައްކާ މަންޒަރުގެ ވީޑިއޯއެއް ޓުވީޓުވެސް ކުރައްވާފައެވެ.
ފ. ނިލަންދޫގައި ވޯޓު ލުމަށްފަހު ވޯޓު ކަރުދާސް ދައްކަން އަންގަމުން އެބަގެންދޭ. މިއީ ޕާޓީން ނެރެފައިވާ ވޯޓުލުން ކުރިޔަށް ގެންދާނޭ ގޮތުގެ އުސޫލުތަކާ ޚިލާފު ކަމެއް. އަދި ވޯޓުން މަކަރު ހަދަން ހިންގާ ކަމެއް. @MDPSecretariat @anasabdulsattar @mimaniq53 @ali_niya pic.twitter.com/aoxMnPe2pn
— Waddey (@waddey_) May 14, 2022
އެމްޑީޕީގެ ޗެއަރ ޕާރސަންއަކު އިންތިޚާބު ކުރުމަށް އެޕާޓީގެ މެމްބަރުން މިއަދު ވޯޓު ލާން ނިކުންނައިރު، މިނިވަން އިންސާފުވެރި އިންތިޚާބެއް ބޭއްވުމަށް ފުރުސަތު ދިނުމަށް ޕާޓީގެ ސެކެޓްރިއޭޓުންވަނީ ޕާޓީގެ އެންމެހާ މެމްބަރުންނަށް ގޮވާލާފައެވެ. އަދި ދެ ކެނޑިޑޭޓުންވެސް ވަނީ، މިއީ އެމްޑީޕީގެ މުސްތަގުބަލާއި އެތައް ގޮތަކުން ގުޅި ލާމެހިގެންދާ އިންތިޚާބަކަށް ވެގެން ދާއިރު، މިއިންތިޚާބުގައި ގިނަ ބަޔަކު ވޯޓު ލުމަށާއި އަދި ވިސްނުންތެރިކަމާއެކު ވޯޓު ދިނުމަށް ގޮވާލައްވާފައެވެ.
އެހެންނަމަވެސް، އިންތިޚާބު އޮޅުވާލަން މަސައްކަތް ކޮށްފާނޭކަމުގެ ތުހުމަތު ދެ ކެމްޕޭނުންވެސް މީގެ ކުރިންވަނީ އެއްބަޔަކު އަނެއް ބައެއްގެ މައްޗަށް ކޮށްފައެވެ. އަދި ރާއްޖޭގައި ސިޔާސީ ޕާޓީތަކުގެ އެތެރޭގައި ބޭއްވެމުންދާ އިންތިޚާބުތަކަކީ، ރަގަޅަށް ރެގިއުލޭޓް ކުރެވި، އަދި ސެކިއުރިޓީ ބެލެހެއްޓި، ވޯޓު ލާ މަރުކަޒުތަކުގެ ކަންކަންވެސް އެންމެ ރަގަޅަށް ބެލެހެއްޓިގެން ކުރިޔަށްދާ އިންތޚާބުތަކަކަށް ނުވާކަން މިފުރުސަތުގައި ފާހަގަ ކޮށްލާން ޖެހެއެވެ.
މިއަދު ހެނދުނުގެ ވަގުތެއްގައި ވޯޓު ލެއްވުމަށްފަހު މީޑިއާތަކާއި ވާހަކަ ދައްކަވަމުން ރައީސް ސާލިހު ވިދާޅުވެފައިވަނީ، ވޯޓުލުމުގެ އިންތިޒާމްތައް ހަމަޖައްސަވާފައިވަނީ ވަރަށް ރަގަޅަށް ކަމުގައެވެ.
