އެކަތިގަނޑެއްގެ ގޮތުގައި ވަރުގަދަކޮށް އެމްޑީޕީ ބޭއްވޭނީ އެޕާޓިގެ ޗެއަރޕާސަންކަމަށް އިކޮނޮމިކް މިނިސްޓަރ ފައްޔާޒް އިސްމާޢީލް ހޮވައިގެންކަމަށް ދިއްގަރު ދާއިރާހެ މެންބަރު އިކްރާމް ޙަސަން ވިދާޅުވެއްޖެއެވެ.

އަންނަ ހޮނިހިރު ދުވަހު ބާއްވާ ޗެއަރޕާސަން އިންތިޚާބުގައި ފައްޔާޒާއި ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ. ވާދަވެރިކަން ބޮޑުވެފައިވާ އިންތިޚާބާއި ގުޅޭގޮތުން އިކްރާމް ވިދާޅުވީ ރައީސް އިބްރާހީމް މުޙައްމަދު ޞާލިޙްގެ އެމްޑީޕީ ސަރުކާރު ދެމެހެއްޓި، އެމްޑީޕީ އެކަތިގަނޑެއްގެ ގޮތުގައި ބޭއްވޭނީ ފައްޔާޒްއަށް ވޯޓް ދީގެންކަމަށެވެ.

RSolihge MDP sarukaaru dhemehetti MDP ekathigadehgothuga gadhakon beyvveynee @faya_i ah vote dheegen. #MDPhingaalan #Faya4CP #Rozey4ARR

— Ikram Hassan MP (@ikramhassan) May 9, 2022

އެމްޑީޕީގެ ޗެއާޕާސަން އިންތިޚާބުގައި ދެކެނޑިޑޭޓުންވެސް އެންމެ ބޮޑަށް އިސްކަންދެނީ އާންމު މެމްބަރުންނާއި ބައްދަލު ކުރުމަށެެވެ. އެގޮތުން ރަށްރަށަށް ގޮސް އާންމު މެމްބަރުންނާއި ބައްދަލުކޮށް ވޯޓު ހޯދުމަށް ގިނަ މަސައްކަތްތަކެއް ދަނީ ކުރަމުންނެވެ.

ދެކެނޑިޑޭޓުންގެވެސް އަޒުމަކީ އިންތިޚާބުގެ ވޯޓުލުމުގެ ކުރިން ރާއްޖޭގެ ހުރިިހާ ރަށެއްގައި ތިބި އެމްޑީޕީގެ އާންމު މެމްބަރުންނާއި ހަމައަށް ގޮސް ކެމްޕެއިން ކުރުމެވެ. މިޓާގެޓަށް ވާސިލްވުމަށް ކުުރިއަށް އޮތީ މަދު ދުވަސްތަކަކަށް ވުމުން ދަތުރުތައް އިތުރަށް ބާރުބޮޑުވެގެންދާނެ ކަމަށް ބެލެވެއެވެ.

އަންނަ ހޮނިހިރު ދުވަހު ބާއްވާ މި އިންތިޚާބަކީ ހުރިހާ ގޮތަކުންވެސް ވާދަވެރި އަދި ފޯރިގަދަވާނެ އިންތިޚާބެއްކަމަށް ބެލެވެއެވެ