އާމިރު ޚާންގެ ސުޕަރ ހިޓް ފިލްމު "ޕީކޭ"އަށް ފަހު އާމިރާއި ރަންބީރު ކަޕޫރުގެ ފިލްމް އެއް އެކުގައި ފެނިގެންދާނެ ކަމަށް ބުނެ ދެކެވެންފެށި ވާހަކަ ތަކުގައި ކުލަ ޖެހެން އުޅޭކަމުގެ ވާހަކަތަށް އަނެއްކާވެސް ދެކެވެން ފަށައިފިއެވެ.
2014 ވަނަ އަހަރުގެ ފިލްމް "ޕީކޭ" ނިންމާލަމުން އާމިރާއެކު ރަންބީރު ވަނީ ސިކުންތު ކޮޅަކަށް ފެނިގެން ގޮސްފައެވެ. އެހެންވެ ރަންބީރާއެކު "ޕީކޭ" ގެ ސީކުއެލްއެއް ހަދާ ވާހަކަ ވެސް އޮތީ ދެކެވިފައެވެ.
ރިޕޯޓްތައް ބުނާ ގޮތުގައި ޑައިރެކްޓަރ އަނުރާގް ބާސޫ އަންނަނީ އެ ދެ ތަރިން އެކުގައި ފެންނާނެ ފިލްމެއްގެ މަސައްކަތް ކުރަމުންނެވެ. އެއީ ބޮޑު ބަޖެޓަކާ އެކު ހަދާ ފިލްމެއް ކަމަށްވެސް ޚަބަރުތައް ބުނެއެވެ. އެ ފިލްމަކީ އާމިރްގެ ޕްރޮޑަކްޝަން ހައުސް އިން ޕްރޮޑިއުސްކުރާނެ ފިލްމެކެވެ.
މި ޕްރޮޖެކްޓް ވާނީ އޭނާ އާމިރާ އެކު މަސައްކަތްކުރާ ފުރަތަމަ ޕްރޮޖެކްޓަށެވެ. އެކަމަކު ރަންބީރު ވަނީ އަނޫރާގާއެކު ދެ ފިލްމެއްގެ މަސައްކަތް ކުރިން ކޮށްފައެވެ. އެއީ 2013 ގެ "ބަރްފީ" އާއި 2016ގެ "ޖައްގާ ޖާސޫސް"އެވެ. އަނޫރާގް އެންމެ ފަހުގެ ފިލްމަކީ 2020 ގެ އެންތޮލޮޖީ ފިލްމު "ލޫޑޯ" އެވެ.
ހުރިހާ ކަމެއް ބަރާބަރަށް ގޮސްފިނަމަ އަހަރުގެ ތެރޭގައި އެ ފިލްމުގެ ޝޫޓިން ފަށާނެ ކަމަށް ރިޕޯޓުތައް ބުނެއެވެ.
އާމިރު މިހާރު އުޅެނީ ދެން އެންމެ އަވަހަށް ބެލުންތެރިންނަށް ފެންނާނެ އޭނާގެ ފިލްމު "ލާލް ސިންގ ޗައްޑާ" ގެ ޕްރޮމޯޝަން ތަކުގައި އަވަދި ނެތިއެވެ. އެ ފިލްމު މި އަހަރު އޯގަސްޓް 11 ގައި ރިލީޒް ކުރުމަށް ވަނީ ތާވަލް ކޮށްފައެވެ.
