މިދިޔަ އަހަރުގެ މެއި މަހުގެ 6 ވަނަ ދުވަހު ރައީސް ނަޝީދަށް ދިން ހަމަލާގެ ޝިކާރަކަށްވެވަޑައިގެންފައި ވަނިކޮށް އިތުރަށް އެމަނިކުފާނު ކުށްވެރިޔާއަށް ހެދުމުގެ މަސައްކަތް ރޭވިގެން ކުރަމުން ދާކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އަދި އެމް.ޑީ.ޕީ ޗެއާޕާރސަން ކެންޑިޑޭޓް އިމްތިޔާޒު ފަހުމީ ވިދާޅުވެއްޖެއެވެ.

ރައީސް މުޙައްމަދު ނަޝީދު އަވަހާރަކޮށްލަން ދިން ޓެރަރިސްޓް ބޮމުގެ ހަމަލާއަށް 1 އަހަރު ފުރުމާ ގުޅިގެން އިންތި ނެރުނު ބަޔާނުގައި ބުނެފައިވަނީ މިއަދަކީ ދިވެހިރައްޔިތުންގެ ޑިމޮކްރެޓިކް ޕާރޓީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ޓެރަރިސްޓް ބޮމުގެ ހަމަލާއަށް އަހަރެއް ފުރި، އެ ބިރުވެރިކަން ސިކުނޑިއަށް އިތުރަށް އާލާވެގެންދާ ދުވަހެއްކަމަށެވެ.

6 މޭ 2021 ގެ ޓެރަރިސްޓް ޙަމަލާއަށް މިއަދަށް 1 އަހަރު ފުރޭއިރު ލިބުނު ޙަޤީޤީ ހިތްހަމަޖެހުމެއް، ތަސައްލީއެއް ނެތް ކަމަށާއި، އެމަނިކުފާނަށް އޮތް ނުރައްކާ ފިލާދިއަކަމުގެ ޔަޤީންކަމެއް ނެތްކަމަށްވެސް އިންތި ވިދާޅުވިއެވެ. އަދި މިހާރުވެސް މަސައްކަތް ކުރަނީ އެމަނިކުފާނަކީ މިކަމުގެ ކުށްވެރިއާއަށް ހެދުމުގެ މަސައްކަތް ކަމުގައި އިންތި ވިދާޅުވިއެވެ.

މައްސަލައިގެ ވަށައިގެންވާ ކަންކަން ތަޙްޤީޤުން ހޯދިފައިނުވޭ. އެމަނިކުފާނުގެ ފުރާނަފުޅަށް ނުރައްކާކުރުވުމަށް ގޮވާލާ ގޮވުމާއި، އެކަމަށް ދެމުންދާ ހިތްވަރު އެއޮތް ގޮތަށް އެބަ އޮތް. ހަމަލާގެ ޝިކާރަކަށްވެވަޑައިގެންފައި ވަނިކޮށް އިތުރަށް އެމަނިކުފާނު ކުށްވެރިޔާއަށް ހެދުމުގެ މަސައްކަތް ރޭވިގެން ކުރަމުން ގެންދޭ. ކަމުގެ ބިރުވެރިކަމާއި ސީރިއަސްކަން ކަނޑުވާލައި، ހަނދާނުން ދޫކޮށްލުމަށް ކުރާކަންކަން ވެސް އެބަ ހިނގާ. މިކަންކަމަކީ އަޅުގަނޑު އިންތިހާއަށް ކަންބޮޑުވާ ކަންކަމެއް.

– އިންތި ވިދާޅުވިއެވެ.

އިންތި ވިދާޅުވީ ދިވެހިރާއްޖެ ޑިމޮކްރެސީއަށާއި ހެޔޮ ބަދަލަކަށް ކުރި ދަތުރު ރަމްޒުކޮށްދޭ ޝަޙުސިއްޔަތުކަމުގައިވާ ރައީސް މުޙައްމަދު ނަޝީދު، މި ރާއްޖެއާއި އެމް.ޑީ.ޕީ. އާމެދު ގެންގުޅުއްވާ ތަޞައްވަރާއި އެމަނިކުފާނުގެ ހިތްވަރާއި ބުންވަރާއި ސްޕީޑަށް ލޮޅުން ގެނައުމަށްޓަކައި އަދާވާތްތެރިން ދޭ ހަމަލާތައް ނާކާމިޔާބު ވެގެންދާނެކަމަށެވެ.

ނަޝީދަށް އަމާޒުކޮށް މިދިޔަ އަހަރު ދިން ބޮމުގެ ހަމަލާގައި އަމަލީ ގޮތުން ބައިވެރިވި މީހުން ހައްޔަރުކޮށް، ބައެއް މީހުންގެ މައްޗަށް ދައުވާ އުފުލައި، ހުކުމް ވަނީ އިއްވާފައެވެ. ބޮމުގެ ހަމަލާއާ ގުޅިގެން ޖުމްލަ ނުވަ މީހަކު ހައްޔަރުކުރިއެވެ. އޭގެ ތެރޭގައި ބޮން ގޮއްވާލަން ރިމޯޓަށް ފިއްތާލި އަދުހަމް އަހުމަދު ވަނީ އޭނާއާ ދެކޮޅަށް ކުރި ދައުވާތަކަށް އިއުތިރާފްވެފައެވެ. އޭނާގެ މައްޗަށް ކޯޓުން ވަނީ 23 އަހަރުގެ ޖަލު ހުކުމެއް އިއްވާފައެވެ.

އެ ހަމަލާގައި ދެން އެންމެ އިސްކޮށް އުޅުނު މުހައްމަދު ތަސްލީމާއި، އަލި މަނިކުގެ ޝަރީއަތް އަންނަ ސެޕްޓެމްބަރަށް ނިންމާލުމަށް އެމައްސަލަ ބައްލަވާ ގާޒީ ވަނީ ތާވަލުކޮށްފައެވެ. އެ ހަމަލާއާ ގުޅިގެން ހައްޔަރުކުރި ތަހުމީން އަހުމަދާއި މުޖާޒް އަހުމަދާއި އަލީ ހައިޝަމް އާއި މުހައްމަދު ނާޒިމް އާއި އިސްހާގާއި ފަހުމީ އަލީގެ މައްސަލަތައް އުޅެނީ ކޯޓު މަރުހަލާގެ ކުރީކޮޅުގައެވެ.