ތ. ތިމަރަފުށީ ޓާފް ފުޓުބޯޅަ ދަނޑު ނިންމާ ހުޅުވުމަށް ތައްޔާރުވެފައިވަނިކޮށް އެ ދަނޑަށް ގެއްލުންދީ ދަނޑު ހަލާކުކޮށްލާފައިވާތީ އެކަމުގެ ކަންބޮޑުވުން ފާޅުކޮށް އެކަން އިދިކޮޅު ޕީޕީއެމްއިން ކުށްވެރިކޮށްފިއެވެ. ޕީޕިއެމް އިން މިކަން ކުށްވެރިކޮށްފައިމިވަނީ ޔޫތު މިނިސްޓްރީން ތ. ތިމަރަފުށީގައި ތަރައްގީކުރި ފުޓްސަލް ދަނޑަށް ރޭގެ ވަގުތެއްގައި ބަޔަކު ގެއްލުންތަކެއް ދިނުމާއި ގުޅިގެންނެވެ. ރޭގެ ވަގުތެއްގައި ދަނޑުގެ ވަށައިގެން ޖަހާފައިވާ ފެންސް ހަލާކުކޮށްގެން، ދަނޑުތެރެއަށް ވަދެ، ޓާފުން ދެ ފޫޓުގެ ބޮޑު މިނުގެ 10 ވަރަކަށް ތަން ކޮނެގެން ނަގާފައިވާކަމށް އެރަށު ކައުންސިލުން ބުންޏެވެ.
އެކަން ކުށްވެރިކޮށް ޕީޕީއެމް އިންނެރުނު ބަޔާނެއްގައިވަނީ އެކަން ކުރީ ކޮންމެ ބަޔަކު ކަމުގައިވީނަމަވެސް، އެއީ ވަރަށް ދަށުދަރަޖައިގެ ފިނޑި ޢަމަލެއްކަމަށެވެ. އަދި އެޢަމަލު އެންމެ ހަރުކަށި އިބާރާތުން ކުށްވެރިކުރާކަމަށް ޕީޕީއެމް އިން ބުންޏެވެ.
ރާއްޖޭގެ ރަށްރަށުގެ ތަރައްޤީއަށާއި، ރައްޔުތުންގެ ލާބަ އާއި މަންފާއަށް ހިންގޭ މަޝްރޫޢު ތަކަށް ގެއްލުންދީ ރައްޔިތުންނަށް ނިކަމެތިކަން ދިނުމަށް ހިންގާ އެއްވެސް ޢަމަލަކީ މިޕާޓީން ބަލއިގަންނާނޭ ކަމެއް ނޫނެވެ. އަދި އެއްވެސް ވަރަކަށް ތަރިޙީބު ދޭ ކަމެއްވެސް ނޫނެވެ.
– ޕީޕީއެމް އިން ނެރުނު ބަޔާނުގައި ވެއެވެ.
ޕީޕީއެމް އިން ވަނީ އެ ފިނޑި ނާތަހުޒީބު ޢަމަލު ހިންގާފައިވަނީ ކޮންމެ ބަޔަކު ނަމަވެސް އެކަން ކުރި ބަޔަކާއި މިކަމުގެ އަޑީގައި ތިބި ބަޔަކު ހޯދާ ޤާނޫނުގައިވާ ގޮތުގެ މަތިން އަޅަންޖެހޭ އެންމެހާ ފިޔަވަޅުތައް އެޅުމަށް ދައުލަތުގެ ކަމާ ބެހޭ މުއައްސަސާތަކަށް ގޮވާލާކަމަށް ބުނެފައެވެ. އަދި ރަށުގެ ތަރައްޤީއަށް ހުރަސް އެޅުމާއި ރަށުގައި ޤާއިމު ކުރެވިފައިވާ ރައްޔިތުންގެ ތަންތަނާއި މުދަލާއި ތަކެއްޗަށް ގެއްލުންވާފަދަ އެއްވެސް ކަމެއް ނުކުރުމަށް އިލްތިމާސްކުރާކަަމަށްވެސް ޕީޕީއެމް އިން ބުންޏެވެ.
ކޮމެންޓު ފޮނުވާ