އިސްރާއީލުން ހިސޯރުކޮށްފައިވާ ގާޒާ ސްރިޕްޓްއަށް މިސައިލް ހަމަލާތަކެއް ދީފިއެވެ. އިސްރާއީލުން ބުނެފައިވަނީ، މި ހަމަލާތަކަކީ ގަޒާއިން އެގައުމަށް ރޮކެޓްތަކެއް އުދުއްސާލާފައިވާތީ ބަދަލު ހިފުމުގެ ގޮތުން ދީފައިވާ ހަމަލާތަކެއް ކަމުގައެވެ.
މަންޒަރު ދުށް މީހުން ބުނެފައިވާ ގޮތުގައި، އިސްރާއީލުން މިސައިލް ހަމަލާ ދީފައިވަނީ، ގާޒާގެ ދެކުނުގެ ސަރަހައްދަކަށެވެ. ގާޒާގައި ވެރިކަން ކުރަމުންދާ ހަމާސް ޖަމާއަތުގެ ހަތިޔާރުއެޅި ގޮފިން ބުނެފައިވަނީ، އިސްރާއީލުގެ ފައިޓަރ ޖެޓްތަކާއި ދިމާލަށް އެޖަމާއަތުން ރޮކެޓްތައް އުދުއްސާލާފައި ވާކަމަށެވެ.
"އެންޓި އެއަރކްރާފްޓް ޑިފެންސުން ފައިޓަރ ޖެޓްތަކާއި ދެކޮޅަށް ހަމަލާދިން ހަމާސްގެ ދިފާޢީ ބާރަށް މަރުޙަބާ،" ހަމާސް ޖަމާއަތުގެ ތަރުޖަމާން ހާޒިމް ގާސިމް ނެރުއްވި ބަޔާނުގައި ވިދާޅުވެފައި ވެއެވެ. އޭނާ ވިދާޅުވި ގޮތުގައި، އިސްރާއީލުގެ ހަމަލާތައް އަމާޒު ވެފައިވަނީ، "ހުސް ސައިޓު" ތަކަކަށް ކަމުގައެވެ.
އިސްރާއީލުގެ ހަމަލާތައް ދުށް ފަރާތްތަކާއި، އަދި ގާޒާ ސްޓްރިޕްޓްގެ ސަލާމަތީ ފަރާތްތަކުން ބުނެފައިވަނީ، މިހަމަލާތަކުގެ ސަބަބުން އެއްވެސް މީހަކަށް ގެއްލުމެއް ވެފައި ނުވާކަމުގައެވެ. އިސްރާއީލުން ގާޒާއަށް މިސައިލް ހަމަލާ ދީފައި މިވަނީ، ގާޒާއިން އުދުއްސާލި ރޮކެޓެއް އިސްރާއީލުގެ "އަޔަން ޑޯމް" އެއަރ ޑިފެންސް ސިސްޓަމުން ހަލާކު ކޮށްލިތާ މަދު ވަގުތުކޮޅެއެގެ ތެރޭގައެވެ.
"މި ރޮކެޓް ހަމަލާގެ ބަދަލުގައި އިސްރާއިލް ޑިފެންސް ފޯސްގެ ފައިޓަރ ޖެޓްތަކުންވަނީ، ގާޒާ ސްޓްރިޕްޓްގައި ހުރި ހަމާސް ޓެރަރިސްޓް ޖަމާއަތުގެ ހަތިޔާރު އުފައްދާ ކާރުޚާނާއަކަށް ހަމަލާ ދީފައި،" އިސްރާއީލްގެ އަސްކަރިއްޔާއިން ބުނެފައި ވެއެވެ.
ގާޒާގެ ރޮކެޓް ހަމަލާތަކާއި، އަދި އިސްރާއީލުގެ ބަދަލު ހިފުމުގެ ހަމަލާތައް ބަދަލު ކޮށްފައި މިވަނީ، ފާއިތުވެދިޔަ ހަފްތާ ބަންދުގައި އިސްރާއީލު ސިފައި، ފަލަސްތީނުގެ އަލް އަގުސާ މިސްކިތަށްވަދެއް ހިންގި ހަމަނުޖެހުންތަކުގައި 70 މީހުންނަށް އަނިޔާވެފައި ވަނިކޮށެވެ. މީގެތެރެއިން ގިނަ މީހުންނަކީ ފަލަސްތީނު މީހުންނެވެ.
