މިސަރުކާރުން އުފެއްދި ރިޔާސީ ކޮމިޝަން، އެސެޓް ރިކަވަރީ ކޮމިޝަނުން އެމްއެމްޕީއާރުސީގެ ކޮރަޕްޝަނާ ގުޅޭ ރިޕޯޓް އެމަނިކުފާނުގެ އަތްޕުޅުގައި އެބައޮތްކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. ނަޝީދު މިހެން ވިދާޅުވީ އެމްޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕަށް ފޮނުއްވި މެސެޖުގައެވެ.

ކުރީ ސަރުކާރުތަކުގެ ކޮރަޕްޝަނާއި ދައުލަތުން ގެއްލުނު މުދަލާއި ފައިސާ ހޯދުމަށް ރައީސް އިބްރާހީމް މުހައްމަދު ޞާލިޙް އުފެއްދެވި އެސެޓް ރިކަވަރީ ކޮމިޝަން މިހާރު ވަނީ އުވާލާފައެވެ. އެ ކޮމިޝަނަށް ނަތީޖާއެއް ނެރެވިފައިނުވާކަމަށް ގިނަބަޔަކު ބުނެއެވެ.

އެމްޑީޕީ ގައުމީ މަޖިލީހުގެ ވަޓްސްއަޕް ގްރޫޕުގައި، މިސަރުކާރު އައީ އެމްއެމްޕީއާރުސީގެ ކޮރަޕްޝަން ބަލާނެކަމުގެ ވަޢުދާއެކުނަމަވެސް، އެ މައްސަލަ ނުބެލޭކަމަށް ވިދާޅުވެ ރައީސް ނަޝީދަށް ވަފާތެރި މެންބަރުން ވިދާޅުވިއެވެ. ނަމަވެސް މި ސަރުކާރަށް ތާޢީދުކުރައްވާ މެންބަރުން ވަނީ ވަނީ އެ ކޮމިޝަން އުވާލަން ޖެހުނު ސަބަބުތައް ސާފުކޮށް ދެއްވާފައެވެ. އަދި އެސެޓް ރިކަވަރީ ކޮމިޝަންގެ ރައީސް އަހުމަދު އަސްއަދާއި އެމްޑީޕީ ޗެއަރޕާސަންކަމަށް ވާދަކުރައްވާ އިމްތިޔާޒް ފަހުމީއާއެކު ނަގާފައިވާ ފޮޓޯއެއްވެސް ހިއްސާކޮށްފައިވެއެވެ.

އެ ފޮޓޯއާއެކު މެންބަރަކު ވަނީ އެސެޓް ރިކަވަރީ ކޮމިޝަން އުވާނުލިއްޔާ ދެރަ ކަމަށް ވިދާޅުވެފައެވެ. އަދި އެ ކޮމިޝަންގެ ރައީސް އަސްއަދުގެ އަމަލުތައް ހުރި ގޮތުން އޭނާއާ ހަވާލުކުރި މަސައްކަތް ކުރާނެ ގޮތް ވިސްނާލުމަށް ވިދާޅުވިއެވެ. އެ ވާހަކައާއެކު ރައީސް ނަޝީދު ވަނީ އެމްއެމްޕީއާރުސީގެ ރިޕޯޓް އެމަނިކުފާނުގެ އަތްޕުޅުގައި އެބައޮތް ކަމަށް ވިދާޅުވެފައެވެ. އަދި އެ ރިޕޯޓް ހިއްސާ ކުރައްވަން ޖެހިދާނެ ކަަމަށް ވިދާޅުވިއެވެ. އެއަށްފަހު ވިދާޅުވީ، އެ ރިޕޯޓަކީ އެސެޓްރިކަވަރީ ކޮމިޝަނުން ހަދާ ރައީސް އޮފީހަށް ފޮނުވާފައިވާ ރިޕޯޓެއް ކަމަށެވެ. ނަމަވެސް އެ ރިޕޯޓް ރައީސް ނަޝީދަށް ލިބިވަޑައިގެންނެވި ގޮތެއް ވިދާޅެއް ނުވިއެވެ.

އުފެއްދިތާ 3 އަހަރާއި 4 މަސް ފުރުނު ދުވަހު، ރައީސް ސާލިހު މި ކޮމިޝަން އުވާލައްވާފައިވަނީ އެމަނިކްފާނު ނެރުއްވި ޤަރާރަކުނެވެ. މި ކޮމިޝަން އުފާލެއްވިކަން ހާމަކުރައްވާ ރައީސް އޮފީހުން ނެރުއްވި ބަޔާނުގައި ވާގޮތުން މި ކޮމިޝަން އުވާލެއްވުމާއެކު މި ކޮމިޝަނުން ކުރަމުން އައި މަސައްކަތް ދެން ކުރަމުން ދާނީ ކަމާ ގުޅުންހުރި މުއައްސަސާތަކުންނެވެ.

ރައީސް ސާލިހު އެސެޓް ރިކަވަރީ ކޮމިޝަން އުފާލެއްވިއިރު، އެ ކޮމިޝަނަށް އެކަށިގެންވާ ގޮތެއްގައި މަސައްކަތް ނުކުރެވި، ކޮމިޝަނަށްވަނީ ބޮޑެތި ފާޑު ކިޔުންތައް އަމާޒުވެފައެވެ. އަދި އެމްއެމްޕީއާރުސީގެ މައްސަލާގައި މި ކޮމިޝަނުން އެކުލަވާލާފައިވާ ލިސްޓަކީވެސް ވަކިބައެއްގެ މަސްލަހަތާއި އެއްގޮތަށް އެކުލަވާލާފައިވާ ލިސްޓެއްކަމުގެ ތުހުމަތުކޮށް، އެމްއެމްޕީއާރުސީގެ ޚިޔާނާތުގެ މައްސަލަ ތަހުގީގު ކުރުމުގައިވެސް މިކޮމިޝަނުން އެކަށީގެންވާ ގޮތެއްގައި މަސައްކަތް ކުރަމުން ނުދާކަމުގެ ތުހުމަތުވެސް ފަހަކަށް އައިސް އެސެޓް ރިކަވަރީ ކޮމިޝަންގެ މައްޗަށް ގިނަބަޔަކު ކޮށްފަައި ވެއެވެ.

ދައުލަތުން ގެއްލިފައިވާ ފައިސާއާއި މުދާ ހޯދުމަށް ރައީސުލްޖުމްހޫރިއްޔާ އުފެއްދެވި ރިޔާސީ ކޮމިޝަން (އެސެޓް ރިކަވަރީ ކޮމިޝަން)އަށް ފާއިތުވެދިޔަ އަހަރު ނިމިގެންދިޔައިރު 10 މިލިއަނަށްވުރެ ގިނަ ރުފިޔާ ޚަރަދުކޮށްފައިވާކަންވެސް ވަނީ މީގެކުރިން ހާމަވެގެން ގޮސްފައެވެ.

ފަސް މެންބަރުންގެ މައްޗަށް އެކުލެވޭ އެ ރިޔާސީ ކޮމިޝަންގެ ޚަރަދުތަކާއި ބެހޭ މަޢުލޫމާތު ހޯދުމަށް އަމިއްލަ ފަރާތަކުން، ފާއިތުވެދިޔަ އަހަރު ވަނީ، މަޢުލޫމާތު ހޯދައި ލިބިގަތުމުގެ ޤާނޫނުގެ ދަށުން އެދިފައެވެ. އަދި އެ ކޮމިޝަނުން މިކަމާއި ގުޅިގެން ހިއްސާކޮށްފައިވާ މަޢުލޫމާތަށް ބެލިއިރު އެ ކޮމިޝަނުން އެންމެ ބޮޑު ޚަރަދެއް ކޮށްފައިވަނީ 2019ވަނަ އަހަރެވެ. އެ އަހަރު އެކަނިވެސް 4.0 މިލިއަން ރުފިޔާ ޚަރަދުކޮށްފައިވެއެވެ.

އެގޮތުން މުސާރައާ އެލަވެންސްއަށް 3.3 މިލިއަން ރުފިޔާ ޚަރަދުކޮށްފައިވާއިރު، އޮފީސް ހިންގުމުގެ ބޭނުމަށް ހޯދާ ތަކެތީގެ ޚަރަށް 2،548.57 ރުފިޔާ އަދި އޮފީސް ހިންގުމަށް ބޭނުންވާ ހިދުމަތުގެ ހަރަދުގެ އަދަދަށް 61،919.54 ރުފިޔާ ޚަރަދުކޮޮށްފައިވެއެވެ. އަދިހަރުމުދާ ހޯދަން 556،777.34 ރުފިޔާ ޚަރަދުކޮށްފައިވެއެވެ.