ގދ. ފިޔޯރީގެ ހުޅަނގުން ރާއްޖޭގެ ކަނޑުގެ ސަރަހައްދަށް ވަދެ އުޅޭ ބޭރުގެ ދެ މަސްބޯޓެއް ފެނިގެން ދިވެހި ސިފައިން އެ ސަރަހައްދުގައި ހަރަކާތްތެރިވާން ފަށައިފިއެވެ.
އެމްއެންޑީއެފުން މައުލޫމާތު ދޭގޮތުގައި، މި ދެ ބޯޓު ފެނިފައިވަނީ ގދ. އަތޮޅާއި ފުވައްމުލަކާ ދެމެދު އޮންނަ އިކްއެޓޯރިއަލް ޗެނަލް ސަރަހައްދުން، ފިޔޯރީގެ ހުޅަނގުން ގާތްގަނޑަކަށް 9 ނޯޓިކަލް މޭލު ބޭރުންނެވެ. އިރުން ހުޅަނގަށް ދަތުރުކުރަމުންދާ މި ބޯޓުތަކުގެ ރިޕޯޓު ލިބުމާއެކު، އެމްއެންޑީއެފް ސަދަން އޭރިއާ ކޮމާންޑުގެ ސިފައިން ވަނީ އެ ސަރަހައްދަށް ގޮސް ބޯޓުތައް ދެނެގަތުމާއި ބަލައި ފާސްކުރުމުގެ މަސައްކަތް ފަށާފައެވެ.
ރާއްޖޭގެ ކަނޑުގެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަށް ސިފައިން އަބަދުވެސް ފިޔަވަޅުތައް އަޅަމުންދާއިރު، ހުއްދަނެތި ރާއްޖޭގެ ސަރަހައްދަށް ވަންނަ އުޅަނދުތައް މޮނީޓާކޮށް، ހުއްޓުވައި ފާސްކުރުމަކީ އެމްއެންޑީއެފްގެ ޒިންމާއެކެވެ. މިގޮތަށް އަތުލައިގަންނަ އުޅަނދުތައް އާންމު އުސޫލުގެ ދަށުން ގާނޫނީ ފިޔަވަޅު އެޅުމަށް ފުލުހުންނާ ހަވާލުކުރެވޭނެއެވެ. އަދި މި ހާދިސާގައި އެއްވެސް ގާނޫނަކާ ހިލާފު ކަމެއް ހިނގާފައިވޭތޯ ސިފައިންނާއި ފުލުހުން ގުޅިގެން މިހާރު ދަނީ ބަލަމުންނެވެ.
ކޮމެންޓު ފޮނުވާ