ރައްޔިތުންގެ މަޖިލީހުގައި ބަސްކުރެވޭ ކަންކަމުގައި ޚިޔާލުތަފާތުވިނަމަވެސް، މެންބަރުންގެ ވާހަކަތަކަށް ހުރަސްނާޅާ ބަހުސް ނުހުއްޓުވުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މެންބަރުންނަށް އިލްތިމާސްކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މަޑުއްވަރީ ދާއިރާގެ މެންބަރު އާދަމް ޝަރީފް ހިޔާ ފްލެޓުގެ ފިނިޝިންއާ ގުޅޭ ގޮތުން ހުށަހެޅުއްވި މައްސަލައާއި ގުޅިގެން ވޯޓަށް އެހުމުގެ ކުރިން ރައީސް ނަޝީދު ވިދާޅުވީ، މަޖިލީހަށް ހުށައަޅާ މައްސަލަތަކާއިމެދު ޢަމަލުކުރަނީ ޤާނޫނު އަސާސީ ތަންދޭ އެންމެ ފުޅަ މިނެއްގައިކަމަށެވެ. ނަޝީދު ވިދާޅުވީ އެއީ ޑިމޮކްރަސީ ނެގެހެއްޓުމަށްޓަކައި މުހިންމު ކަމެއްކަމަށެވެ.
އަދި ޚިޔާލު ތަފާތުވުމުގެ ފުރުސަތާއި ބަހުސް ކުރުމުގެ ޖާގަ އެންމެ ފުޅާ މިނުގައި ދިނުމުގެ އުންމީދުގައި.
– ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ ބައެއް މެންބަރުން ވާހަކަފުޅު ދައްކަވާއިރު، އެ ވާހަކަތައް ހުއްޓުވުމަކީ އެންމެ ފައިދާހުރި ގޮތްކަމަށް ބައެއް މެންބަރުން ދެކެވަޑައިގަންނަވާކަމަށެވެ. ނަމަވެސް ބަހުސްކޮށް ރައްޔިތުންނަށް ކަންކަން އޮޅުއްފިލުވައިދިނުން އެއީ އެންމެ ރަނގަޅުގޮތްކަމަށް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައިވާއިރު، އިދިކޮޅު ބައެއް މެންބަރުން ހުށައަޅަ މައްސަލަތަކުގައި ނުވަތަ ވާހަކަ ދައްކަމުން ގެންދާއިރު ނިޒާމީ ނުކުތާ ނަންގަވާ ވާހަކަދެއްކުމަށް ހުރަސް އަޅަމުން ގެންދާކަމަށް އެ މެންބަރުން ވިދާޅުވެފައިވެއެވެ.
