ރިތިކް ރޯޝަނާއި ސުޒާން ޚާންގެ 14 އަހަރުވީ ކައިވެނި ނިމުމަކަށް ގެނައިފަހުން އެދެމީހުން ވެސް މިހާރު ވަނީ ހަޔާތަށް ބައިވެރިން ހޯދާފައެވެ.
ރިތިކާއި އޭނާގެ ލޯބިވެރިޔާ ސަބާ އާޒާދް ޑިނާ ޑޭޓަކުން ނުކުންނަނިކޮށް ޕަޕަރާޒީން އެމީހުންގެ ފޮޓޯތައް ނަގައި އާންމު ކުރީ މި އަހަރު ފެށުނު ތަނާ ކަހަލަ ގޮތަކަށެވެ.
މި ގުޅުން "ބަސްޓް" ވުމާއެކު ދޭތެރެ ދޭތެރެއިން އެ ޖޯޑުގެ ޚަބަރުތަށް ވަނީ އަންނަން ފަށާފައެވެ. އެގޮތުން ސަބާ އާއި ރިތިކްގެ އާއިލާ އެކުގައި ނަގާފައިވާ ފޮޓޯތަކާއި، ސޯޝަލް މީޑިއާގައި އެކަކަށް އަނެކަކު ފޮނުވާ ލޯބި މެސެޖްތައް ވެސް ވަނީ އާންމުވާން ފަށާފައެވެ.
ހަމަ މިގޮތަށް ރިތިކްގެ ވަރިކުރި ފުޅު ސުޒާން ޚާންގެ ހަޔާތަށް ވެސް ވަނީ ލޯބިވެރިއަކު އައިސްފައެވެ. އެއީ ބޮލީވުޑްގައި މާބޮޑު މަޝްހޫރު ކަމެއް ލިބިފައިނުވާ އަރްސަލާން ގޯނިއެވެ. އަރްސަލާން އަކީ ޓީވީ ތަރި އަލީ ގޯނީގެ ބޭބެއެވެ. މި ދެމީހުންވެސް އަންނަނީ އެކުގައި ތަންތަނުން ފެންނަމުންނެވެ. އަދި ހަމަ އެހެންމެ ސޯޝަލް މީޑިއާގައި ދެމީހުން އެކަކު އަނެކަކަށް އަންނަނީ ލޯބި ފޮނުވަމުންނެވެ.
މިހާރު މި ވަނީ ސޯޝަލް މީޑިއާގައި މި ހަތަރު މީހުން އެއް ފްރޭމަކުން ފެންނަ ފޮޓޯއެއް އާންމުވެފައެވެ. އަދި ހަމަ އެހެންމެ ރިތިކާއި ސަބާ ވަނީ އަންގާރަ ދުވަހު މުމްބާއީ އެއާޕޯޓުން ފެނިގެން ގޮސްފައެވެ.
އެމީހުން ދިއަ ތަނެއް އޭރު ނޭގުން ނަމަވެސް ޚަބަރުތަށް ބުނާގޮތުގައި އެމީހުން ތިބީ ގޯއާގައެވެ. ގޯއާގައި ކުރީގެ ބަތަލާ ޕޫޖާ ބޭދީ ރެސްޓޯރެންޓެއް ހުޅުވަން ބޭއްވި ހަފްލާއަށް ގޮސް އެކީގައި މި ހަތަރު މީހުން ނެގި ފޮޓޯ ވަނީ ވައިރަލް ވެފައެވެ.
View this post on Instagram
ހަތަރު މީހުން އެކުގައި ފެންނަ މި ފޮޓޯގައި އެމީހުން ތިބީ ވަރަށް އުފަލުންނެވެ. މި ފޮޓޯ އިން ސާބިތުކޮށްދެނީ މި ހަތަރު މީހުންގެ ގުޅުމާ މެދު އިތުރު ސުވާލެއް އުފައްދާނެ އެއްވެސް ޖާގައެއް ނެތް ކަމެވެ.
ރިޕޯޓްތައް ބުނާގޮތުގައި ރިތިކާއި ސަބާ ވަރަށް އަވަހަށް ކައިވެނި ކުރާނެއެވެ. އަދި މިފަދަ ފޮޓޯތައް ގިނަވަމުން އަންނާތީ މިއީ އެމީހުންގެ ކައިވެނި ކައިރިވާ ކަމުގެ ނިޝާނެއް ކަމަށް ގިނަބަޔަކު ދެކެއެވެ.
