އިޒްރާއީލުގެ ބޮޑުވަޒީރު ނެފްތާލީ ބެނެޓްގެ ޕާޓީގެ އިސް މެމްބަރަކު، ކޯލިޝަންއިން ވަކިވުމާއި ގުޅިގެން، އިސްރާއީލުގެ ގާނޫނުހަދާ މަޖިލިހުގައި އޭނާ ދަމަހައްޓަމުންދިޔަ ހަނި އަޢުލަބިއްޔަތު ގެއްލިއްޖެއެވެ.
އިސްރާއީލުގެ ޔަހޫދީންގެ ކަނާތު ފިޔައިގެ ޕާޓީތަކުން ފެށިގެން އަރަބި މުސްލިމް ޕާޓީތައްވެސް ހިމެނޭގޮތަށް އެކުލެވިފައިވާ ކޯލިޝަން ދޫކޮށްލުމަށް ނިންމާފައިވާކަން އިޑިޓް ސިލްމާން އިއުލާން ކުރުމާއި ގުޅިގެން ބެނެޓްގެ ކޯލިޝަންގައި މިހާރު ވަނީ ގާނޫނުހަދާ މަޖިލިހުގެ 60 ގޮނޑިއެވެ. ނަތީޖާއެއްގެ ގޮތުން، ގާނޫނުހަދާ މަޖިލިހުގައި ބެނެޓްގެ ކޯލިޝަންގައި ހިމެނޭ ގޮޑިތަކާއި އިދިކޮޅު ކޯލިޝަންގެ ގޮޑިތަކާއި މިހާރުވަނީ އެއްވަރު ވެފައެވެ.
"އެއްބައިވަންތަ ކަމަށް އަހަރެން މަސައްކަތް ކުރިން. އަހަރެންވާނީ މި ކޯލިޝަނަށް ވަރަށް މަސައްކަތް ކޮށްދީފަ،" ކޯލިޝަންގެ ޗެއަރޕާރސްންގެ ގޮތުގައި މަސައްކަތް ކޮށްފައިވާ، ދީނީ އުސޫލުތަކަށް ތާއީދުކުރާ ސިލްމާން ވިދާޅުވެފައި ވެއެވެ.
"އެހެންނަމަވެސް ހިތާމައާއެކީ ދަންނަވަން، ޔަހޫދީންގެ އައިޑެންޓިޓީއާއި ދެކޮޅަށް މަސައްކަތެއް ނުކުރެވޭނެ،" އޭނާ ވިދާޅުވެފައި ވެއެވެ.
ފާއިތުވެދިޔަ ހަފްތާގެ ހޯމަދުވަހު އޭނާވަނީ ސިއްޙީ އިދާރާތަކަށް، އިސްރާއީލުގައި ފާހަގަކުރާ ޚާއްސަ ދުވަހެއް ކަމުގައިވާ "ޕާސްއޯވަރ ހޮލިޑޭ"ގައި ޕާނުގެ ބާވަތެއް ހުއްދަ ކުރަން ނިންމުމައި ގުޅިގެން ހެލްތު މިނިސްޓަރަށް ވަރަށްބޮޑަށް ފާޑު ވިދާޅުވެފައެވެ. އިސްރާއީލުގެ ހެލްތު މިނިސްޓްރީން މިހުއްދަ ދިނީ މިބާވަތުގެ ޕާން، މިޚާއްސަ ބަންދުގައި އެގައުމުގައި ބޭނުން ނުކުރާތާ އެތައް ޒަމާންތަކެއް ވެފައިވަނިކޮށް، މިކަމަށް އެގައުމުގެ ސުޕްރީމްކޯޓުން ހުއްދަ ދިނުމާއި ގުޅިގެންނެވެ.
އިސްރާއީލުގެ ސަގާފަތުގައި އޮންނަގޮތުން، މި ބަންދުގައި، އީސްޓްލައިގެން ފޯކޮށްފައި ނުހުންނަށް ޕާން ބޭނުން ކުރުމަކީ ހުއްދަ ނޫން ކަމެކެވެ.
"އަހަރެން މި ކޯލިޝަންއާއި ދުރަށް ދާން ނިންމައިފިން، އަދި ރައްޓެހިންނާއި ވާހަކަ ދައްކައިގެން ކަނާތުފިޔައިގެ ސަރުކާރެއް ގާއިމް ކުރެވޭތޯ މަސައްކަތް ކުރާނަން،" ސިލްމާން ވިދާޅުވެފައި ވެއެވެ.
ސިލްމާން ބެނެޓްގެ ކޯލިޝަންއިން ވަކިވުމާއިގުޅިގެން، އިދިކޮޅު ލިކޫޑް ޕާޓީގެ ޗެއަރމަންވަނީ، ކުރީގެ ބޮޑުވަޒީރު ނަތަންޔާހޫވަނީ އޭނާއަށް މަރުހަބާ ވިދާޅުވެ، އިދިކޮޅު ކޯލިޝަނާއި ގުޅުމަށް ދައުވަތު ދީފައެވެ. އެހެންނަމަވެސް އާ ސަރުކަރެއް އުފެއްދުމަށް ބޭނުންވާ، ގާނޫނުހަދާ މަޖިލިހުގެ 61 ގޮޑި ނަތަަންޔާހޫއަށް އަދި ހަމަ ކުރެވިފައެއް ނުވެއެވެ.
އިސްރާއީލުގެ މިހާރުގެ ބޮޑުވަޒީރު، ނަފްތާލީ ބެންޓްގެ ޕާޓީއަށް، 120 މެމްބަރުގެ މަޖިލިހުގައި ލިބިފައިވަނި އެންމެ 5 ގޮނޑިއެވެ
