ބޮލީވުޑްގެ ކުޅަދާނަ ބަތަލާ ކަރީނާ ކަޕޫރު ދާ ކޮންމެ ތަނަކަށްވެސް ޕަޕަރާޒީން ޖާމާވެއެވެ. އަބަދުވެސް އޭނާ ދާ ތަންތަނާއި ކުރާ ކަންތައްތައް ފޮޓޯ ނެގުމަށް އެމީހުން ތިބެނީ ރެޑީގައެވެ.
ކަރީނާ ވެސް ޕަޕަރާޒީންނަށް ފޮޓޯނެގުމުގެ ފުރުސަތު ދޭން ބައެއްފަހަރު މަޑުކޮށްލައެވެ. ނަމަވެސް މިފަހަރު މި ވީ ތަފާތު ގޮތެކެވެ. މިދިއަ ހަފްތާގައި ކާރު އެކްސިޑެންޓެއްވި އޭނާގެ ގާތް ރަހުމަތްތެރިޔާ މަލައިކާގެ ހާލުބެލުމަށް އެގެއަށް ގޮސް ނުކުންނަނިކޮށް ޕަޕަރާޒީން ވަނީ އޭނާގެ ފޮޓޯނަގަން އުޅެފައެވެ.
ފޮޓޯނަގަން އުޅުމުގެ ތެރޭގައި ކަރީނާގެ ކާރުން ޖެހި ޕަޕަރާޒީއަކަށް ވަނީ އަނިޔާ ވެފައެވެ. ކަރީނާގެ ޑްރައިވަރަށް އޮޅުމަކުން އެތަނުގައި ފޮޓޯ ނަގަން ހުރި މީހެއްގެ ގައިގާ ކާރުން ޖެހި، އަނިޔާވެފައިވާ ކަމަށް ރިޕޯޓްތައް ބުނެއެވެ.
އެއާއެކު ފޮޓޯ ނަގަން އެހެން ނޫޅުމަށާއި ފަހަތަށް ޖެހުމަށް ވަރަށް ބާރަށް ކަރީނާ ބުނެފައި ވާކަމަށާއި އެވަގުތު ކަރީނާ ގާތަށް ވަރަށް ރުޅި އައި ކަމަށް މީޑީއާތަކުން ވަނި ބުނެފައެވެ.
އެއާއި އެކު ކަރީނާގެ މި އަމަލުގެ ސަބަބުން އޭނާ އަށް އަންނަނީ ސޯޝަލް މީޑިއާގައި ވަރަށް ބޮޑަށް ފާޑު ކިޔަމުންނެވެ.
View this post on Instagram
މިދިޔަ ހޮނިހިރު ދުވަހު ތިން ކާރެއް މުޑި އަރައިގެން މަލައިކާ އެކްސިޑެންޓް ވެ، ފަރުވާދިނުމަށްފަހު ހޮސްޕިޓަލުން އޭނާ މިހާރު ވަނީ ދުކޮށްލާފައެވެ. އަދި މިހާރު އޭނާގެ ހާލު ރަނގަޅެވެ.
