އެއްވެސް މަޝްވަރާއެއްނެތި، ގަލޮޅު ދަނޑު ތަޅާލައި އަލުން އިމާރާތް ކުރުމަށް މިނިސްޓަރ މަހުލޫފް ނިންމި ނިންމުމާމެދު ހުރި ގިނަ ކަންބޮޑުވުންތަކެއް ގަލޮޅު އުތުރު ދާއިރާގެ މާލެ ސިޓީ ކައުންސިލް މެންބަރު މުހައްމަދު ސައިފް ފާތިހު ފާހަގަކޮށްފިއެވެ.
ގަލޮޅު ދަނޑު ތަރައްޤީކުރުން މިއަހަރުގެ ބަޖެޓުގައި ހިމަނާފައިވާއިރު، ޔޫތު މިނިސްޓަރ އަޙްމަދު މަޚްލޫފް މިވަނީ އައު ގަލޮޅު ދަނޑުގެ 3D ކުރެހުންތަކެއް ސޯޝަލް މީޑިއާގައި ހިއްސާކުރައްވާފައެވެ. ނަމަވެސް މިދަނޑު މާލޭގައި މިހާރު ތަރައްޤީ ކުރާއިރު، ހުރި ގިނަ ކަންބޮޑުވުންތައް މާލެ ސިޓީ ކައުސިލްގެ އެމްޑީޕީ މެމްބަރު ސައިފްވަނީ ފާހަގަ ކުރައްވާފައެވެ.
ދަނޑުހުރީ މާލޭގެ އެންމެ ކާރޫބާރޫ ބޮޑު މައި މަގުގައި ކަމަށްވާއިރު ވިސްނާންވީ ކިތަންމެ ކަމެއް އެބަހުރި ކަމަށާއި، ޕާކިންގްގެ ދަތިކަމާއި، މަގު ބަންދުކުރުމުން މުޅި މާލޭގެ ޓްރެފިކަށް އަރާ ލޮޅުމާއި، ކުރާ ބާރު ބޮޑުވުމާއި، ވަށައިގެން ހުރި ގޯތިގެދޮރާއި، ވިޔަފާތަކަށް ކުރާ އަސަރު މިފަދަ ކަމެއް ކުރާއިރު ބަލަންޖެހޭކަމަށް ސައިފް ވިދާޅުވިއެވެ. މިސަބަބުތަކަށްޓަކައި، ޤައުމީ މައިދަނޑު އެޅުން އެންމެ އެކަށޭނައީ އަދިވެސް މިތަންތޯވެސް ވިސްނާންޖެހޭކަމަށް ސައިފް ވިދާޅުވިއެވެ.
މިއިން ކަމަކަށް ވިސްނުމެއް ނެތި، ޢާންމު މަޝްވަރާ ނެތި ޤައުމީ ޢުމްރާނީ މަޝްރޫޢެއް ނަމަވެސް ހިންގުން ރަނގަޅެއް ނޫން. އެއީ ލާމަރުކަޒީ ނިޒާމު ދަންނަ ހަމައެއް ނޫން. ފުޓުބޯޅައަކީ ސަޕޯޓަރުންނާ ވަކިން، ފުޓުބޯޅަ އެސޯސިއޭޝަން ހިސާރުކޮށްގެން އުޅޭ މީހަކާއި ކުޅިވަރު ވަޒީރަށް އެކަނި ފެންނަ ގޮތެއްގެ މައްޗަށް ހިންގާ ކަމަކަށް މުޅިންވެ ނިމުނީމާ ކިތަންމެ ބޮޑު ދަނޑެއް އެޅިޔަސް ދިވެހި ފުޓުބޯޅަައަށް ލިބޭ މޮޅެއް ނޯންނާނެ. ދަނޑަށް ވަންނާނެ މީހަކު ނުވާނެ. އަލުން ދަނޑު އަޅާ ނަމަ/އިރު ޚާއްސަކޮށް މާލޭގެ މީހުން، ޢާންމުކޮޮށް ގަލޮޅުގެ ބަހެއް ހޯދަންޖެހޭ. އަމުދުން ފުޓުބޯޅަ ޢާއިލާގެ ބަހެއް ހޯދަންޖެހޭ.
– ސައިފް ވިދާޅުވިއެވެ.
ދަނޑުހުރީ މާލޭގެ އެންމެ ކާރޫބާރޫ ބޮޑު މައި މަގުގައި ކަމަށްވާއިރު ވިސްނާންވީ ކިތަންމެ ކަމެއް އެބަހުރި
⁰- ޕާކިންގްގެ ދަތިކަން ⁰- މަގު ބަންދުކުރުމުން މުޅި މާލޭގެ ޓްރެފިކަށް އަރާ ލޮޅުމާއި، ކުރާ ބާރު⁰- ވަށައިގެން ހުރި ގޯތިގެދޮރު + ވިޔަފާތަކަށް ކުރާ އަސަރު— Saif Fathih (@aekofathih) April 5, 2022
ސައިފް ވިދާޅުވީ މިހެން މިވާހަކަ ފާހަގަކުރުންވެސް ވާނީ ތަރައްޤީއާ ދެކޮޅުވުން، އެއްގޮތެއްވެސް ހެޔޮ ނުވުން، ޖެއްސުން ކުރުންކަމަށް ވެސް ވުން އެކަށީގެންވާކަމަށެވެ. ރަސްމީ ފުޓުބޯޅަ ދަނޑު ތަރައްޤީކުރުމަށް ހަމަޖެހިފައިވަނީ އިންޑިއާ ސަރުކާރުގެ ލައިން އޮފް ކްރެޑިޓްގެ ތެރެއިންނެވެ.
އެގޮތުން އިންޑިއާގެ އެގްޒިމް ބޭންކުން ދޭ ލޯން އެހީގެ ތެރެއިން، ސާޅީސް ފަސްމިލިއަން، ހަތަރުސަތޭކަ ނުވަދިހަ ހަތަރުހާސް ފައްސަތޭކަ ފަސް ރުފިޔާ ވަނީ ގަލޮޅު ދަނޑު ތަރައްޤީކުރުމަށް ހިމަނާފައެވެ. އަދި 2023 ވަނަ އަހަރުގެ ބަޖެޓުގައި 10 މިލިއަން ރުފިޔާ ވަނީ ރަސްމީ ފުޓްބޯޅަ ދަނޑު ތަރައްގީ ކުރުމަށް ހިމަނާފައެވެ.
އެހެންކަމުން ރަސްމީ ފުޓްބޯޅަ ދަނޑު ތަރައްޤީކުރުމަށް ގާތްގަނޑަކަށް 55 މިލިއަނަށްވުރެ ގިނަ ރުފިޔާ ޚަރަދު ކުރާނެއެވެ. ފާއިތުވެގެންދިޔަ ދެ އަހަރުވެސް ރާއްޖޭގެ ކުޅިވަރު ތަރައްގީ ކުރުމަށް އިންޑިޔާއިންވަނީ ބޮޑު ހޭދައެއް ކޮށްފައެވެ.
