ކުރީގެ ރައީސް ޔާމީންގެ ވެރިކަމުގައި ސައުދީ ސަރުކާރުގެ އެހީގައި ބިނާކުރި ކިންގް ސަލްމާން މިސްކިތަކީ، ސައުދީ ސަރުކާރުން ދިވެހި ރައްޔިތުންނަށް އަޅައިދިން މިސްކިތެއް ކަމުގައި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.
އިކްރާމް މިހެން ވިދާޅުވީ، ސައުދީ ސަރުކާރުގެ އެހީގައި ބިނާކުރި ކިންގް ސަލްމާން މިސްކިތް ނަމާދުކުރުމަށް އާއްމުކޮށް ހުޅުވާލުމާއި ގުޅިގެން ޕީޕީއެމްގެ ނައިބް ރައީސް އަހުމަދު ޝިޔާމް ކުރެއްވި ޓުވީޓަކަށް ރައްދު ދެެއްވައި ކުރެއްވި ޓުވީޓެއްގައެވެ.
ޝިޔާމް ވިދާޅުވެފައިވަނީ ސަލްމާން މިސްކިތަކީ މާލޭގެ މަލަމަތިން ފެންނަން ހުރި އެންމެ ހިތްގައިމު އެންމެ ފުރިހަމަ އިސްލާމީ ބިނާކަމާއިމެދު ޝައްކު ކުރާނެ މީހަކު ނެތްކަމަށެވެ. ނަމަވެސް ވެރިކަމުގެ 4 އަހަރުވާން ކައިރިވެފައިވާއިރުވެސް މިސްކިތް ހުޅުވާލަން ނުކުރެވުނުކަމީ ސަރުކާރުން މިފަދަ މަސައްކަތްތަކާއިމެދު ލަދު ގަންނަ ކަމުގެ ހެއްކެތް ކަމުގައި ޝިޔާމް ވިދާޅުވިއެވެ.
ޝިޔާމްގެ ވާހަތަކާއި ގުޅިގެން އިކްރާމް ވިދާޅުވީ، ކިންގް ސަލްމާން މިސްކިތަކީ ސައުދީ ސަރުކާރުން ދިވެހި ރައްޔިތުންނަށް އަޅައިދިން މިސްކިތެއް ކަމަށެވެ. އަދި މިސްކިތް ހުޅުވައި، ރައްޔިތުންނަށް ބޭނުން ކުރެވޭ ހެދުމަށް މިސަރުކާރުން ލަދު ނުގަންނާނެކަމަށެވެ. މިސަރުކާރަކީ ބޭރުގެ ޤައުމުތަކުން ކޮށްދޭ ކަންކަން ބަލައިގަންނަ، ހެޔޮ ވެރިކަމެއް ކުރާ ރައީސެއް ހުރި ވެރިކަމެއްކަމުގައި އިކްރާމް ވިދާޅުވިއެވެ.
ކިންގް ސަލްމާން މިސްކިތަކީ ސައުދީ އިން ދިވެހި ރައްޔިތުންނަށް އަޅައިދިން މިސްކިތެއް. މިއަދުގެ ސަރުކާރުން ބޭރު ޤައުމުތަކުން ރައްޔިތުންނަށް ކޮށްދޭ ކަންކަން ދައްކާކަށް ލަދެއް ނުގަންނާނެ. ތަފާތަކީ ރައީސް ޞާލިހު ކޮށްދެއްވަނީ ތިން ބާރު ވަކިކޮށް އޮންނަ، ފުރިހަމަ މިނިވަންކަން ދިވިފައިވާ، ރީތި ހެޔޮ ވެރިކަމެއްކަން.
– އިކްރާމް ވިދާޅުވިއެވެ.
KS miskithakee Saudi in dhivehi rahyithunnah alhaidhin miskitheh. Miadhuge sarukaarun beyru gaumuthakun rahyithunnah kohdhey kankan dhakkaakah ladheh nugannaane. Thafaathakee RSolih kohdevvanee 3 baaru vakin onna, furihama minivankan dhevifavaa, reethi heyo verikameh kan. https://t.co/VhnUwQImjS
— Ikram Hassan MP (@ikramhassan) April 3, 2022
އިކްރާމް މިހެން ވިދާޅުވި ނަމަވެސް ސަލްމާން މިސްކިތުގައި ނަމާދުކުރަން ހުޅުވާލާފައިވަނީ އެތައް ފަހަރެއްގެ މަތީން މިސްކިތް ހުޅުވާނެކަމަށް ތާރީހު ތަކެއް ދިނުމަށްފަހުގައެވެ. އަދި މިފަހަރު އާއްމުކޮށް މިސްކިތް ހުޅުވާލިނަމަވެސް ރަސްމީކޮށް މަސްޖިދު ސަލްމާން ހުޅުވާނެ ވަކި ތާރީޚެއް އަދި ނިންމާފައި ނުވާކަމަށް އިސްލާމިކް މިނިސްޓަރ ޑރ. އަޙުމަދު ޒާހިރު އަލީ ވަނީ މީގެކުރިން ވިދާޅުވެއެވެ. އަދި މިސްކިތް ރަސްމީކޮށް ހުޅުވައިދެއްވާނީ ސަޢުދީ ސަރުކާރުގެ ޚާއްސަ ވަފުދެއް ރާއްޖެވަޑައިގެންކަމަށްވެސް މިނިސްޓަރ ވިދާޅުވެފައިވެއެވެ.
މަސްޖިދު ސަލްމާން ރަސްމީކޮށް ނުހުޅުވި ނަމަވެސް، މިސްކިތުގައި ހުރިހާ ވަގުތެއްގައިވެސް ނަމާދުކުރުން ކުރިއަށްދާނެކަމަށް އިސްލާމިކް މިނިސްޓްރީން ވިދާޅުވެއެވެ. އަދި ރަމަޟާންމަހު ތަރާވީހު ނަމާދާއި ދަމުނަމާދުކުރުންވެސް އޮންނާނެކަމަށް އެ މިނިސްޓްރީން ވިދާޅުވެއެވެ.
ސަލްމާން މިސްކިތަކީ ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ އެހީގެ ދަށުން ބިނާކުރި މިސްކިތެކެވެ. ތުރުކީގެ ކުންފުންޏަކާއި ހަވާލުކޮށް، މިސްކިތުގެ ޢަމަލީ މަސައްކަތް ފެށީ 2017 ވަނަ އަހަރުއެވެ. މިސްކިތުގެ ހުރިހާ މަސައްކަތެއް 2020 ވަނަ އަހަރު ވަނީ ނިންމާފައެވެ. މިދިޔަ އަހަރުގެ ރަމަޟާން މަހަށް މި މިސްކިތް އާއްމުކޮށް ހުޅުވާލަން ނިންމި ނަމަވެސް އެކަން މަޑުޖެހުނީ ކޯވިޑް-19ގެ ހާލަތު އޭރު މާލޭގައި ގޯސްވެ ކޭސްތައް އިތުރުވުމުންނެވެ.
ކޮމެންޓު ފޮނުވާ