ސިޔާސީ ޕާޓީތަކުން ރާވައިގެން ކުރިއަށްގެންދާ ސިޔާސީ ޙަރަކާތްތައް، ޤާނޫނީ އިމުގެ ތެރެއިން ބޭއްވުމަށް އިލެކްޝަނުން އިލްތިމާސްކޮށްފިއެވެ.
އިލެކްޝަންސް ކޮމިޝަނުން މިފަދައިން އިލްތިމާސް ކޮށްފައިވަނީ ސުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނާ ޚިލާފަށް ސަލާމަތީ ކަންކަމަށް ބުރުއަރާގޮތަށް އިދިކޮޅު ފަރާތްތަކުން މާދަމާ ބޭއްވުމަށް ހަމަޖެހިފައިވާ އެއްވުމުގައި ބައިވެރިވާ ފަރާތްތަކާ މެދު ފިޔަވަޅު އަޅާނެ ކަމަށް މޯލްޑިވްސް ޕޮލިސް ސަރވިސްއިންވެސް އިލްތިމާސްކޮށްފައި ވަނިކޮށެވެ.
އިލެކްޝަންސް ކޮމިޝަނުން ބުނެފައިވަނީ ސިޔާސީ ޕާޓީގެ ޤާނޫނުން ޕާޓީތަކަށް ސިޔާސީ ޙަރަކާތްތައް ހިންގުމުގެ މަގު ފަހިކޮށްދީފައިވަނީ، ޤާނޫނުއަސާސީ އާއި ސިޔާސީ ޕާޓީގެ ޤާނޫނާއި ގަވާއިދާއި، ދިވެހިރާއްޖޭގައި ޢަމަލު ކުރަމުންދާ ކަމާބެހޭ އެހެނިހެން ޤާނޫނުތަކާއި ގަވާއިދުތަކުގެ ޙުދޫދުގެ ތެރެއިން ކަމަށެވެ.
ޕާޓީތަކުން އިންތިޒާމުކޮށްގެން ބާއްވާ ބައްދަލުވުންތަކާއި ސިޔާސީ ޙަރަކާތްތައް، ޤާނޫނާއި ގަވާއިދުގެ ޙުދޫދުގެ ތެރޭގައި ދިވެހިރާއްޖޭގެ ދާޚިލީ ހަމަޖެހުމާއި ދައުލަތުގެ ޚާރިޖީ ސިޔާސަތުތަކާއި ޚާރިޖީ ގުޅުންތަކަށް އިޙްތިރާމުކުރުމާއެކު ކުރިއަށް ގެންދެވުމަށާއި ދައުލަތުގެ ރަސްމީ އިދާރާތަކުން އަންގާ އެންގުންތަކަށް ބޯލެނބުމަށް ސިޔާސީ ޕާޓީތަކުގެ ބެލެނިވެރި ފަރާތުގެ ހައިސިއްޔަތުން އިލެކްޝަސް ކޮމިޝަނުން ވަނީ އިލްތިމާސް ކުރައްވާފައެވެ.
ޤާނޫނުތަކާއި ގަވާއިދުތަކުގެ ހުދޫދުގެ ތެރެއިން ކުރިއަށް ގެންދާ ސިޔާސީ ޙަރަކާތްތަކަށް އަބަދުވެސް ފުރިހަމަ އެއްބާރުލުން ދެމުން ގެންދާނެ ކަމަށް އިލެކްޝަނުން ވަނީ ބުނެފައެވެ.
ފުލުހުން އިއްޔެ ނެރެފައިވާ ނޫސްބަޔާނެއްގައި ބުނެފައިވަނީ ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނުގެ ދަށުން އެއްވުއުޅުމުގެ ހުއްދަ ލިބިދީފައިވާކަމަށެވެ. އެހެންނަމަވެސް މާދަމާ އިދިކޮޅުން ބޭއްވުމަށް ހަމަޖެހިފައިވާ އެއްވުމުގައި މިޤާނޫނާ ޚިލާފު ގިނަ ކަންތައްތަކެއް ރާވަމުންދާ ކަމުގެ މަޢުލޫމާތު ލިބިފައިވާކަމަށެވެ. އެގޮތުން އެއްވުމުގައި ބައިވެރިވުމަށް ރަށްރަށުން މީހުން ގެންނަ ގޮތަށް ހަމަޖެހިފައިވާކަމަށާއި ގިނަ ޢަދަދެއްގެ ދުއްވާ އެއްޗެތި ބޭނުންކޮށްގެން މާލޭގެ ބޮޑެތި މަގުތައް ބްލޮކްކޮށް ރައްޔިތުންނަށާއި ޢާއްމު ދަތުރުފަތުރަށް ހުރަސްއެޅޭގޮތަށް ކަންކަން އިންތިޒާމުކޮށްފައިވާކަމަށް ފުލުހުން ވަނީ ބުނެފައެވެ.
އެގޮތުން މާލޭގެ މަގުތަކާއި، އިދިކޮޅު ޕީޕީއެމްގެ މައި އޮފީސް ސަރަޙައްދާއި، ކާނިވާ ސަރަޙައްދާއި، ރަސްފަންނު ސަރަޙައްދާއި، ބޮޑުތަކުރުފާނު މަގާއި، މާލޭ ދެކުނުފަރާތު އުސްފަސްގަނޑު ސަރަހައްދު ހިމެނޭ ސަރަޙައްދުގައި އެއްވުން އިންތިޒާމުކޮށް ސަލާމަތީ ކަންކަން ބެލެހެއްޓުމަށް ދަތިވާނެހެން އެއްވަގުތެއްގައި މާލޭގެ އެކި ސަރަޙައްދުތަކުގައި ބައިބަޔަށް މީހުން ނުކުތުމަށް ރާވާފައިވާކަންވެސް ފުލުހުންގެ ބަޔާނުގައިވަނީ ފާހަގަކުރައްވާފައެވެ. ހަމައެއާއެކު މާލޭގައި ޙަރަކާތްތެރިވާ ގޭންގްތައް މިއެއްވުމުގައި ބައިވެރިކުރުމަށް އިދިކޮޅުން ނިންމާފައިވާކަމަށާއި މިއީ ފުލުހުން ޖާގަދޭނެކަމެއް ނޫންކަމަށް ފުލުހުން ވަނީ ބުނެފައެވެ.
އެހެންކަމުން މިއެއްވުން މިގޮތަށް ނުބޭއްވުމަށް ޕީޕީއެމްއަށް އަންގާފައިވާކަމަށް ފުލުހުން ވިދާޅުވެއެވެ. މިއާއެކު މިއެއްވުމުގައި ބައިވެރިނުވުމަށްވެސް ފުލުހުންވަނީ އިލްތިމާސްކުރައްވާފައެވެ. އަދި މިއެއްވުމުގައި ބައިވެރިވާ އެއްގަމާއި ކަނޑު އުޅަނދުތައް ބަލާފާސްކުރާނެ ކަމަށް ފުލުހުންވަނީ ވިދާޅުވެފައެވެ. އަދި ޤާނޫނާ ޚިލާފުވާ ފަރާތްތަކާ މެދު ޤާނޫނީ އިމުގެތެރެއިން ފިޔަވަޅު އަޅާނެކަމަށްވެސް ފުލުހުންވަނީ ވަނީ ބުނެފައެވެ.
