މާލެ ސިޓީގެ އެކި ސަރަހައްދުތަކުގައި ގަވާއިދާއި ޚިލާފަށް ބަހައްޓާފައިވާ 1،360 ޕެލެޓް ނަގާފައިވާ ކަމަށް މާލެ ސިޓީ ކައުންސިލުން ބުނެފިއެވެ.
މާލެ ސިޓީ ކައުންސިލުން ދަނީ މާލޭގެ މަގުތަކުގައި ގަވާއިދާއި ޚިލާފަށް ދުއްވާ އެއްޗިއްސަށާއި، ހިނގާބިގާވެ އުޅޭމީހުންނަށް ދަތިވާނެހެން ބަހައްޓާފައިވާ ޕެލެޓްތައް ނެގުމުގެ މަސައްކަތް ކުރަމުންންނެވެ. މިމަސައްކަތް މާލެ ސިޓީ ކައުންސިލުން ކުރިއަށް ގެންދާތާ ވަނީ ދެ ހަފްތާއެއްވެފައެވެ.
މާލެ ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވީ މާލެ ތެރޭގައި ޤަވާއިދާއި ޚިލާފަށް ބަހައްޓާފައި ހުރި ޕެލެޓްތައް ނެގުމުގެ މަސައްކަތުގެ ތެރެއިން ވޭތުވެ ދިޔަ 2 ހަފްތާގެ ތެރޭގައި 1360 އަށް ވުރެ ގިނަ ޕެލެޓް ނެގިފައިވާކަމަށެވެ. އަދި އަމާޒަކީ ރަމަޟާން މަސް އައުމުގެ ކުރިން މި މައްސަލަ ހައްލު ކުރުން ކަމަށް މުއިއްޒު ވަނީ ވިދާޅުވެފައެވެ.
ގަރާޖު، ގުދަން، ވޯކްޝޮޕް އަދި ފިހާރަ ފަދަ ތަންތަނުގެ ކުރިމަތީގައި ޕެލެޓް ބަހައްޓައިގެން ޕާކިން ޒޯންތައް ބްލޮކްވާ ގޮތަށް މަސައްކަތް ކުރަމުންދާ ފަރާތްތަކުން ހުށަހެޅުމުން ޕާކްކުރުން މަނާކަން އަންގައިދޭ "ޑަބަލް ލައިން" އެ ތަނުގައި ކުރަހައިދޭން ސިޓީ ކައުންސިލުން ނިންމިޔަސް، އެ ހުއްދަ އަށް ބަޔަކު އެދުނު ކަމެއް އަދި ނޭނގެއެވެ.
މާލެ ތެރޭގައި ޤަވާއިދާއި ޚިލާފަށް ބަހައްޓާފައި ހުރި ޕެލެޓްތައް ނެގުމުގެ މަސައްކަތުގެ ތެރެއިން ވޭތުވެ ދިޔަ 2 ހަފްތާގެ ތެރޭގައި 1360 އަށް ވުރެ ގިނަ ޕެލެޓް ނެގިފައިވޭ.މޭޔަރ @MMuizzuގެ އަމާޒަކީ ރަމަޟާން މަސް އައުމުގެ ކުރިން މި މައްސަލަ ހައްލު ކުރުން. pic.twitter.com/pdpniraAlS
— Male' City Council (@MaleCitymv) March 23, 2022
ސިޓީ ކައުންސިލް ބުނެފައި ވަނީ މުދާ އަރުވައި ބޭލުމަށް ޕާކިން ޒޯންތަކުގައި ޕެލެޓް ބަހައްޓާފައިވާ ސަރަހައްދުތައް ޗެކް ކުރުމަށް ފަހު، އެ ސްލޮޓް ހަމަޖައްސައިދޭނީ ކުލި ދައްކަން ޖެހޭ ގޮތަށް ކަމަށެވެ. ކައުންސިލުން ހުއްދަ ނުހޯދައި ޕާކިން ޒޯންތަކުގައި ޕެލެޓް ބަހައްޓާ ނަމަ، އެ އެއްޗެހި ނަގާނެ ކަމުގެ އިންޒާރު ވެސް ދިނެވެ.
ކައުންސިލުން ހުއްދަ ނުހޯދައި ޕާކިން ޒޯންތަކުގައި ޕެލެޓް ބަހައްޓާ ނަމަ، އެ އެއްޗެހި ނަގާނެ ކަމަށް ސިޓީ ކައުންސިލުން މީގެކުރިން ބުނެފައިވެއެވެ.
