ފެނަކަ ކޯޕަރޭޝަންގެ އެންމެ މުވައްޒިފަކަށް ވަޒީފާގެ ބިރު ދެއްކި ކަމުގައި ވީނަމަވެސް ފާޅުގައި ކެމްޕެއިނަށް ނިކުންނަވާނެކަމުގެ އިންޒާރު ރައީސް ނަޝިދު ދެއްވައިފިއެވެ.

ރައީސް ނަޝީދު މިހެން ވިދާޅުވީ އެމްޑީޕީގެ ޤައުމީ މަޖިލިސް ވަޓަސްއަޕް ގްރޫޕްގައި މިރޭ ލިޔުއްވި މެސެޖެއްގައެވެ. ރައީސް ނަޝީދު މިހެން ލިޔެފައިވަނީ ފެނަކަ ކޯޕަރޭޝަނުން ރަށްރަށުގައި ހުންނަ ފެނަކައިގެ މުވައްޒިފުންނަށް އެމްޑީޕީގެ ޗެއާޕާސަން އިންތިޚާބުގައި ވަކި ގޮތަކަށް ވޯޓުލުމަށް އަންގާތީ އެކަމާއި ނުރުހުން ފާޅުކޮށް ކުރެއްވި މެސެޖެއްގައެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދަށް އަމާޒު ކުރައްވާ ގައުމީ މަޖިލީހުގެ ގުރޫޕަށް ފޮނުއްވެވި މެސެޖްތަކެއްގައި ނަޝީދު ވަނީ ރަށްރަށުގައި ތިބި ފެނަކަގެ މުވައްޒިފުންގެ ތެރެއިން އެމްޑީޕީގެ މެންބަރުންނަށް ވަޒީފާގެ ބިރު ދައްކަމުންދާ ކަމަށް ތުހުމަތު ކުރައްވާފައެވެ. އަދި ސައީދު މަަސައްކަތް ކުރައްވަނީ އެމަނިކުފާނު އެމްޑީޕީން ބޭރުކޮށްލެއްވުމަށްވެސް ނަޝީދު ވިދާޅުވިއެވެ.

އަދި އިންޒާރު ދެއްވާ ވިދާޅުވީ ވަކި ކެންޑިޑޭޓަށް ތާއީދު ހޯދުމަށާއި ވަޒީފާގެ ބިރު ދެއްކުމަށް ދެން އެއްވެސް މުވައްޒިފަކަށް ސައީދު ގުޅުއްވައިފިނަމަ އެމަނިކުފާނުވެސް ފާޅުގައި ނިކުންނަވާނެ ކަމަށެވެ.

ފެނަކަ އެމްޑީ ސައީދު، ފެނަކަ އަކީ މަނިކުފާނުގެ އަމިއްލަ ތަނެއް ނޫންކަން ހަނދާން ކުރާތި. ރަށްރަށުގެ ފެނަކަ މުވައްޒިފުންނަށް ބިރެއް ނުދެއްކޭނެ. ސައީދު އަޅުގަނޑު މި ޕާޓީ އިން ވަކިކުރާން އުޅުނަސް ފެނަކަ ހުރިހާ މުވައްޒިފުން އެކަމާ ނުރުހޭނެ. އެ މީހުންނަކީ ތަންދޮރު ދަންނަ މީހުން. ދެން ސައީދު މީހަކާ ގުޅައިފިނަމަ އަޅުގަނޑު ފާޅުގައި ނިކުންނާނަން.

– ނަޝީދު ވިދާޅުވިއެވެ.

ނަޝީދުގެ މިމެސެޖާއިއެކު ސައީދު ވަނީ ރައީސް ނަޝީދަށް ސުވާލުތަކެއް ކުރިމަތި ކޮށްފައެވެ. ސައީދު ވިދާޅުވީ އޭނާ ބިރު ދެއްކީ ކޮން މުވައްޒިފަކަށްތޯ ބަލަން ބޭނުންވާ ކަމަށެވެ. އަދި އެކަން ރައީސް ނަޝީދު ސާފުކޮށް ދެއްވުމަށް ސައީދު ވަނީ އެދިފައެވެ. އަދި އެފަދަ ކަމެއް މިއިންތިޚާބާއި ދިމާކޮށް ކޮށްފައި ނުވާނެކަމަށް ސައީދު ވިދާޅުވިއެވެ.

ރައީސް، އަޅުގަނޑު ފެނަކައިގެ ކޮން މުވައްޒިފަކަށް ކޮން ވަގުތަކުތޯ ވަޒީފާގެ ބިރު ދެއްކީ. އެ މީހަކު ނުހުންނާނެ. އެފަދަ ކަމެއް ނުކުރަން އަދި ނުވެސް ކުރާނަން.

– ސައީދު ވިދާޅުވިއެވެ.

އޭގެ ފަހުން ސައީދު ވަނީ ފެނަކައިގެ މުވައްޒިފަކު ޔުނީފޯމްގައި އިންތިއާއެކު ނަންގަވާފައިވާ ފޮޓޯއެއް ހިއްސާކޮށްފައެވެ. އެ ފޮޓޯ އޭނާ ހިއްސާކުރެއްވީ ވަޒީފާގެ ބިރު މުވައްޒިފުންނަށް ނެތްކަން ސާބިތުކޮށް ދެއްވުމުގެ ގޮތުން ކަމަށް ބެލެވެއެވެ. ސައީދުގެ އެ ވާހަކަތަކާއި ގުޅިގެން ރައީސް ނަޝީދު ވަނީ "ތިޔަހެން ޖަދަލު ކުރަނީ ކަމު ވަނީނަމަވެސް އިދިކޮޅަށް ނިކުންނާނަން" ކަމަށް ވިދާޅުވެ ރައްދު ދެއްވާފައެވެ.

ރައީސް ނަޝީދާއި ސައީދުގެ ދެމެދުގައި މިރޭ ހޫނު ޒުވާބެއް ގޮސްފައިވާއިރު، އިންތިގެ ފަޅިން ދަނީ މިއިންތިޚާބުގައި ނުފޫޒު ފޯރުވަމުންދާކަމުގެ ތުހުމަތު ކުރަމުންނެވެ. އަދި ފައްޔާޟު އެމްޑީޕީގެ ޗެއާޕާސަނަކަށް ހޮވުމަަށް ސަރުކާރުން މަސައްކަތް ކުރާކަމުގެ ތުހުމަތު ދަނީ ކުރަމުންނެވެ.