ވޯލްޑް ބޭންކްގެ އެހީގައި ކުރިއަށްގެންދާ އެރައިސް މަޝްރޫޢުގެ ދަށުން ރާއްޖޭގެ އާބާދީ ބޮޑު 15 ރަށެއްގެ ކަރަންޓު ވިއުގަ ޒަމާނީ ފެންވަރަށް ތަރައްޤީކުރުމުގެ މަޝްރޫޢުއެއް ފެށުމައް ތައްޔާރުވެއްޖެއެވެ.

މި މަޝްރޫޢުގައި ހިމެނޭ 15 ރަށުގެ ކަރަންޓު ވިއުގަ ޒަމާނީ ފެންވަރަށް ބަދަލުކޮށްދޭނެ ބަޔަކު ހޯދުމަށް އެންވަޔަރަމަންޓް މިނިސްޓްރީން މިހާރު ވަނީ އިޢުލާންކޮށްފައެވެ. މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލިޖީގެ ފަށާފައިވާ އެރައިސް މަޝްރޫޢުއަކީ ރާއްޖޭގެ ހަކަތައިގެ ނިޒާމު، އަވިން ހަކަތަ އުފައްދާ ނިޒާމަށް ބަދަލުކުރުމަށް ފަށާފައިވާ ބޮޑު ޕްރޮޖެކްޓެކެވެ.

އެރައިސްގެ މިބައިގައި ހިމަނާފައިވަނީ ރާއްޖޭގެ ބޮޑެތި އާބާދީތައް ހިމެނޭ 15 ރަށެއްގެ ކަރަންޓު ވިއުގަ އަޕްގްރޭޑްކޮށް ޒަމާނީ ފެންވަރަށް ގެނައުމުގެ މަސައްކަތެވެ. މިނިސްޓްރީއިން ވިދާޅުވި މި މަސައްކަތަކީ، އަވިން ހަކަތަ އުފައްދާ ނިޒާމަށް ބޭނުންވާ ފެންވަރަށް އިންޖީނުގެތައް ގެނައުމަށް ފެށި މަސައްކަތެއްކަމަށެވެ.

މި މަސައްކަތަށް 30 މިލިއަން ރުފިޔާ ހޭދަވެއެވެ. އެރައިސް މަޝްރޫޢުގެ ދަށުން ކަރަންޓު ވިއުގަ އަޕްގްރޭޑްކުރާ ރަށްތައް:

1. އައްޑޫ ސިޓީ ގުޅިފައިވާ ރަށްތައް

2. އައްޑޫ ސިޓީ ހުޅުމީދޫ

3. ފުވައްމުލައް ސިޓީ

4. ކުޅުދުއްފުށި ސިޓީ

5. ގދ.ތިނަދޫ

6. ބ.އޭދަފުށި

7. ޅ.ހިންނަވަރު

8. ލ.ފޮނަދޫ

9. ލ.އިސްދޫ

10. ލ.ކަލައިދޫ

11. ލ.ދަނބިދޫ

12. ލ.މާބައިދޫ

13. ލ.ކުނަހަންދޫ

14. ލ.ހިތަދޫ

15. ށ.ފުނަދޫ

އެރައިސް މަޝްރޫއިން ދިވެހިރާއްޖޭގެ 15 ރަށެއްގައި ކަރަންޓު ވިއުގަ އަޕްގްރޭޑްކޮށް ޒަމާނީ ފެންވަރަށް ތަރައްޤީކުރާނެ ފަރާތެއް ހޯދަން އިއުލާންކުރުން

އިތުރު މައުލޫމާތު: https://t.co/b89l5iijZz pic.twitter.com/L2tUtfPsvY

— Min. of Environment, Climate Change and Technology (@MoEnvmv) March 17, 2022

ވޯލްޑް ބޭންކުގެ ހިލޭއެހީއާއި އޭޝިއަން އިންފްރާސްޓްރަކްޗަރ އިންވެސްޓްމެންޓް ބޭންކުގެ އެހީގައި ގެންދާ މި މަސައްކަތަކީ ރާއްޖޭގައި އިއާދަކުރަނިވި ހަކަތައިން އުފައްދާ ކަރަންޓު އިތުރުކޮށް ތިމާވެއްޓާއި ރައްޓެހި ގޮތަކަށް ކަރަންޓުގެ ހިދުމަތް ފޯރުކޮށްދިނުމަށް ކަނޑައަޅާފައިވާ ސަރުކާރުގެ ލަނޑުދަނޑިތަކަށް ވާޞިލުވުމަށް މަގުފަހިކޮށްދިނުމަށް ކުރިއަށްގެންދާ މަސައްކަތެކެވެ.

މިނިސްޓްރީން އިޢުލާންކޮށްފައި ވަނީ މި 15 ރަށުގައި މިހާރު ގާއިމުކޮށްފައިވާ ޑިސްޓްރިބިއުޝަން ނެޓްވޯރކްގެ ކޭބަލް އަޕްގްރޭޑްކުރުމާއި، ރަށްރަށުގައި ހިއްކި ސަރަޙައްދާއި މީހުން އަލަށް އާބާދުވާ އެނޫންވެސް ސަރަހައްދުތަކަށް ކަރަންޓު ނެޓްވަރކް ފުޅާކުރުމާއި، ޓްރާންސްފޯމަރުތައް ބަދަލުކުރުމާއި ސަބް ސްޓޭޝަންތައް ޤާއިމުކުރުމާއި، ނެޓްވަރކަށް އޮޓޮމޭޓެޑް ފީޗަރސްތައް އިންޓެގްރޭޓް ކުރުންފަދަ މަސައްކަތްތަކެވެ. މި ބަދަލާއެކު އިންޖީނުގޭގެ އޮޕަރޭޝަން ސްޓޭޓަސް ވަގުތުން ބަލާލެވުމާއި، ނިޒާމަށް މައްސަލައެއް ދިމާވެއްޖެނަމަ އެކަން ފަސޭހައިން ދެނެގަނެ ޙައްލުކުރުމަށް އެހީއަކަށްވެއެވެ.

އެރައިސް މަޝްރޫއިން ދަނީ ރާއްޖޭގެ އެކިރަށްތަކުގައި 36 މެގަވޮޓުގެ އިރުގެ އަލިން ހަކަތަ އުފައްދާ ނިޒާމު ގާއިމުކޮށް މި ނިޒާމުތަކަށް ބޭނުންވާ ސްޓޯރޭޖްއަށް ގާތްގަނޑަކަށް 40 މެގަވޮޓްއަވަރ ގެ ބެޓަރީ އެނަރޖީ ސްޓޯރޭޖް ސިސްޓަމް ބެހެއްޓުމަށްވެސް މަސައްކަތްކުރަމުންނެވެ.