ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ ފްލެޓްތައް ސަރަހައްދުގައި ހަދާ "ހިޔާ ޕާކު"ގެ ފުރަތަމަ ފިޔަވަހީގެ މަސައްކަތްތައް ނިންމާ ރަމަޟާންމަހު ބޭނުންކުރަން ފެށޭވަރުވާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން )އެޗްޑީސީ(އިން ބުނެފިއެވެ.
އެޗްޑީސީން ބުނީ ހުޅުމާލޭގައި ހަދާ ކޮންމެ ޕާކަކީވެސް ކޮންމެ އުމުރުފުރައެއްގެ މީހުންނަށްވެސް، ހިތްހަމަޖައްސާލާ ވަގުތު ހޭދަކޮށްލުމަށް ބޭނުންކުރެވޭގޮތަށް ހަދާ ތަންތަންކަމަށެވެ. އެގޮތުން ކުޑަކުދިންނަށް ކުޅެ އުޅެވޭނެ ސަރަޙައްދާއި، އިށީނދެލައިގެން ތިބުމަށް ބެންޗާއި އުދޯލިފަދަ ވަސީލަތްތައް މި ޕާކުތަކުގައި ހިމެނެއެވެ.
ހުޅުމާލޭގެ ދެވަނަ ފިޔަވަހީގައި ގިނަ އާއިލާތަކެއް މިހާރުވަނީ ދިރިއުޅެން ފަށާފައެވެ. މި އާބާދީއަށް ބޭނުންވާ އަސާސީ ވަސީލަތްތައް ޤާއިމުކުރުމުގެ މަސައްކަތުގެ ދަށުން، ދެވަނަ ފިޔަވަހި ހިޔާ ސަރަޙައްދުގައި ޕާކެއް ތަރައްޤީކުރަން ފެށީ ޖެނުއަރީ މަހުއެވެ. މިއީ އާއްމުން ހިއްތްހަމަޖައްސަލަން ތިބެލުމަށް ހިޔާ ސަރަޙައްދުގައި ހަދާ ފުރަތަމަ ޕާކެވެ.
