ރަޝިއާއިން އަވައްޓެރި ޔޫކުރެއިންއަށް ދެމުންދާ އުދުވާން އިތުރަށް ކުރިޔަށް ގެންދިއުމުގައި އެގައުމުން ޗައިނާގެ އަސްކަރީ އެހީތެރިކަމަށް އެދިފައިވާ ކަމަށް އެމެރިކާއިން ކުރި ތުހުމަތު ރަޝިއާއިން ދޮގު ކޮށްފިއެވެ.
ކްރެމްލިންއިން ބުނެފައިވާ ގޮތުގައި ރަޝިއާއިން ޗައިނާގެ އެހީތެރިކަމަށް އެދެންޖެހޭ އެއްވެސް ސަބަބެއް ނެތްކަމަށާއި، ޔޫކުރެއިންގައި އެގައުމުގެ މަގުސަދު ހާސިލްކުރެވޭ މިވަރަށް އެގައުމުގައި ހަނގުރާމަތީ ހަތިޔާރު އެބަހުރި ކަމުގައެވެ.
ޗައިނާއިން އެގައުމުން އަސްކަރީ އެހީތެރިކަކަމަށް އެދިފައި ނުވާނެކަމަށް ކްރެމްލިންގެ ތަރުޖަމާން ޑިމިޓްރީ ޕެސްކޯވް ވިދާޅުވެފައި މިވަނީ، ޖާސޫސީ މައުލޫމާތުތަކާ ހަވާލާދީ، ހަތިޔާރާއި އަދި އެނޫން އެހީތެރިކަން ހޯދުމަށްވެސް ރަޝިއާއިން ޗައިނާގެ ކިބައިން އެދިފައިވާކަމަށް އެމެރިކާއިން ތުހުމަތު ކުރުމާއި ގުޅިގެންނެވެ.
އަދި މި ތުހުމަތުތަކާއެކު، އެމެރިކާއިންވަނީ ރަޝިއާއަށް އަސްކަރީ އެހީތެރިކަން ފޯރުކޮށް ނުދިނުމަށް ޗައިނާއަށް އިންޒާރު ދީފައެވެ.
ހުޅަނގާއި ދެކޮޅު، ޗައިނާއާއި ރަޝިއާއަކީ ފަހަކަށް އައިސް ވަރަށް ބޮޑުތަނުން ގުޅުން ބަދަހި ކޮށްފައިވާ ދެގައުމެވެ. އަދި ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށުމާއެކު، މި އުދުވާން ކުށްވެރި ނުކުރާ މަދު ގައުމުތަކުގެ ތެރޭގައިވެސް ޗައިނާ ހިމެނެއެވެ. ޗައިނާއިން ބުނެފައިވަނީ، އެގައުމުން ބޭނުންވަނީ ޔޫކުރެއިންގެ މައްސަލައަށް މަޝްވަރާގެ ހައްލެއް އައުމަށް ކަމުގައެވެ.
އަދި މީގެ އިތުރުން ރަޝިއާންގެ އުދުވާން ކުށްވެރިކޮށް ޔޫއެންގެ އާންމު މަޖިލިހުގައި ނެގި ވޯޓުގައިވެސް ޗައިނާއިން އެއްވެސް ކޮޅަކަށް ވޯޓު ދީފައެއް ނުވެއެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަައް ފެށުން، ޗައިނާގައި ކުރިޔަށްދިޔަ ވިންޓަރ އޮލިމްޕިކްސް ނިމެންދެން މަޑުކުރުމަށް އެގައުމުން ރަޝިއާގެ ކިބައިން އެދުނުކަމަށްވެސް މީޑިއާތަކުން ރިޕޯޓު ކޮށްފައި ވެއެވެ.
ޔޫކުރެއިންއަށް ހަަމަލާ ދޭން ފެށުމުގެ ދުވަސްކޮޅެއް ކުރިން، ޕުޓިންވަނީ، ވިންޓަރ އޮލިމްޕިކްސް މުބާރާތުގެ ފެށުމުގެ ރަސްމިއްޔާތަށް ޗައިނާއަށް ދަތުރުފުޅެއް ކުރައްވާފައެވެ.
ކޮމެންޓު ފޮނުވާ