ވަޒީރުންގެ ދަށުވެގެން މަޖިލީހުގައި އެމްޑީޕީ މެންބަރުން ތިބޭނަމަ ކުރީގެ ރައީސް ޢަބްދުﷲ ޔާމީންގެ ސަރުކާރަށްވުރެ މި ސަރުކާރު މާނުބައިވީސްކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު މުޙައްމަދު ރަޝީދު (ބޯދިގު) ވިދާޅުވެއްޖެއެވެ. އެމްޑީޕީގެ ޗެއަރޕާސަންގެ އިންތިޚާބުގެ ވާދަވެރިކަން ބޮޑުވެ އެމްޑީޕީގެ އެތެރޭގައި ވަނީ ވަރަށް ބޮޑު ޚިޔާލުތަފާތުވުންތަކެއް އުފެދިފައެވެ.
އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރައްވަނީ އިކޮނޮމިކް މިނިސްޓަރ ފައްޔާޟް އިސްމާޢީލާއި، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ.
އިންތިޚާބުގެ ވާދަވެރިކަން ބޮޑުވެ ކޯޅުންތައް ވަނީ މަޖިލީހުގެ ތަޅުމާއި ހަމައަށް ފޯރާފައެވެ. މިގޮތުން އެއްބަޔަކު އަނެއް ބަޔަކަށް މަޖިލީހުގެ ތަޅުމުގައި އަންނަނީ ރައްދު ދެއްވަމުންނެވެ.
މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން މެންބަރު މުޙައްމަދު ރަޝީދު ވިދާޅުވީ، އެމްއެމްޕިއާރުސީގެ ކޮރަޕްޝަންގެ މައްސަލައާއި މަރުތަކުގެ މައްސަލަ ބެލުން އަވަސްކުރުމަށް ގޮވާ ގޮވުމަކީ ސަރުކާރަށް ޖެއްސުންކުރުންކަމަށް ބަލާބެލުމަކޯ ގޯހެއްކަމަށެވެ.
އޭނާ މިހެން ވިދާޅުވެފައިވަނީ އެމްޑީޕީގެ ބައެއް މެންބަރުން ސަރުކާރަށް ޖެއްސުންކޮށް ސަރުކާރު ވައްޓާލުމަށް އިދިކޮޅު ޕާޓީއެއްގެ ގޮތުގައި މަސައްކަތްކުރާކަމުގެތުހުމަތު އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ކުރައްވާފައިވަނިކޮށެވެ.
މެންބަރު މުޙައްމަދު ރަޝީދު ވިދާޅުވީ، ވައްކަން ހުއްޓުވުމަށް ވައްކަމުގެ ވާހަކަ ދައްކާނެކަމަށާއި، އެމްޑީޕީއަށް ލިބިފައިވާ ރީތި ނަން ގެއްލިގެންދާތަން ބަލަން ނުހުންނަވާނެކަމަށެވެ.
މާވިދިފަ ދަރާފަ ދަރަނިވެރިވެފަތިބި ވަޒީރުން މިތާގަ މާގިނަ.މިއަށްވުރެ މާ ދަހިވެތި ބަޔަކު ވަޒީރުކަމުގައާއި ބޮޑެތި މަޤާމުތަކުގައި އެބަތިބި. އެހެންކަމުން އެބައެއް ފައިދާއާއި، މިހުރިހާކަމެއް ސަލާމަތްވެގެން ނޫނީ ސަރުކާރު ނުހިންގޭ ހިސާބަށްގެންގޮސްދާނެތީވެ މިވާހަކަ އަޅުގަނޑުމެން މިދައްކަނީ.
– މެންބަރު މުޙައްމަދު ރަޝީދު
އިންތިއަށް ތާޢީދުކުރައްވާ ސަބަބު ހާމަކޮށްދެއްވަމުން މެންބަރު ވިދާޅުވީ އިންތިއަކީ ވައްކަން ކުރައްވާނެ ބޭފުޅެއް ނޫންކަމަށާއި، މީހަކަށް ދަރާނެ މީހެއްވެސް ނޫންކަމަށެވެ. އަދި ދޮގެއް ނުހަދާނެކަމަށާއި، ހަސަވެރިނުވާނެކަމަށާއި، އަދި މީހުންވެސް ނުމަރާނެކަމަށެވެ. ޗެއަރޕާސަންގެ މަޤާމަށް މީހަކު ހޮވާއިރު މިފަދަ ކަންކަމަށް އެމްޑީޕީގެ މެންބަރުން ބަލާނެކަމަށްވެސް މެންބަރު މުޙައްމަދު ރަޝީދު ވިދާޅުވިއެވެ.
