ރަޝިއާގެ ހުރިހާ ފުޓުބޯޅަ ކުލަބުތަކާއި އަދި އެގައުމުގެ ގައުމީ ޓީމުތައްު ބައިނަލް އަގުވާމީ ކުޅިވަރަތަކުން ސަސްޕެންޑް ކުރުމަށް ފީފާއިންނާއި ޔޫއެފާއިން ނިންމައިފިއެވެ.
ދުނިޔޭގެ ފުޓު ބޯޅަ އެސޯސިއޭޝަންއާއި އަދި ޔޫރަޕްގެ ފުޓުބޯޅަ އެސޯސިއޭޝަންއިން އެންމެ ފަހުން އެއްބަސްވެފައިވަނީ މި ދެމުވައްސަސާއިން އިތުރު އެންގުމެއް އަންގަންދެން ރަޝިއާގެ ހުރިހާ ކުލަބުތަކާއި އަދި އެގައުމުގެ ހުރިހާ ގައުމީ ޓީމުތަކެއްވެސް ބައިނަލްއަގުވާމީ ކުޅިވަރުތަކުގައި ބައިވެރި ނުކުރުމަށެވެ.
މި ސަސްޕެންޝަންގައި ރަޝިއާގެ ހުރިހާ ކުލަބުތަކާއި އަދި ރަޝިއާގެ ހުރިހާ ކުޅިވަރެއްގެ ގައުމީ ޓީމުތައްވެސް ހިމަނާފައި ވެއެވެ.
މީގެ އިތުރުން، އިންޓަރނޭޝަނަލް އޮލިމްޕިކް ކޮމިޓީންވަނީ ސްޕޯޓްސް ފެޑެރޭޝަންތަކާއި އިވެންޓް އޯގަނައިޒް ކުރާ ފަރާތްތަކަށް، ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއި އަދި ޔޫކުރެއިންއާއި އިންވެގެން އޮންނަ ބެލަރޫސްއިން މި އުދުވާނަށް އެހީތެރިކަން ފޯރުކޮށް ދީފައިވާތީ، މި ދެގައުމުގެ އެއްވެސް އެތުލީޓަކު ބައިނަލްއަގުވާމީ އެއްވެސް މުބާރާތެއްގައި ބައިވެރި ނުކުރުމަށް ވަނީ އަންގާފައެވެ.
އިންޓަރނޭޝަނަލް އޮލިމްޕިކް ކޮމިޓީން ބުނެފައިވަނީ، ރަޝިއާ އަދި ބެލަރޫސްގެ އެތުލީޓުންނާއި ދެކޮޅަށް ފިޔަވަޅުއަޅަން މަޖުބޫރުވީ ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކުގެ ސަބަބުން ކަމަށާއި، އަދި މި އުދުވާންގެ ސަބަބުން ޔޫކުރެއިންގެ އެއްވެސް އެތުލީޓަކަށް ބައިނަލްއަގުވާމީ އެއްވެސް މުބާރާތެއްގައި ބައިވެރިވުމުގެ ފުރުސަތު ގެއްލިފައިވާ ކަމުގައެވެ.
ފާއިތުވެދިޔަ ހަފްތާގައި އޯއައިސީންވަނީ، ރަޝިއާ އަދި ބެލަރޫސްގައި ބޭއްވުމަށް ހަމަޖަޖެހިފައިވާ ހުރިހާ ކުޅިވަރެއް މި ދެގައުމު ނޫން އެހެން ތަންތަނަށް ބަދަލުކުރުމަށް ގޮވާލާފައެވެ. މީގެ ކުރިން ޔޫއެފާ އަދި ފޯމިއުލާ 1 އިން ވަނީ މި ދެ އެސޯސިއޭޝަންއިން ބާއްވާ އެންމެ ބޮޑު ދެ ކުޅިވަރު މުބާރާތް ރަޝިއާއަށް ހޯސްޓު ނުކުރެވޭނެ ކަމަށް ބުނެފައެވެ.
އަދި ހަމަ އެއާއެކު، ބައިނަލްއަގުވާމީ ޓައެކްވޮންޑޯއިން ވަނީ، އެ އެސޯސިއޭޝަންއިން ރަޝިއާގެ ރައީސް ލާޑިމިރު ޕުޓިންއަށް 2013ވަނަ އަހަރު އަރުވާފައިވާ "ނައިންތު ޑޭން ބްލެކް ބެލްޓު"ގެ ޝަރުފު އަބުރާ އަތުލުމަށް ނިނމާފައިވާކަންވެސް އިއުލާން ކޮށްފައެވެ. މިއީ، ދުނިޔޭގެ އެކި ކަންކޮޅުތަކުގައި ތިބި މާރޝަލްއާޓްސްއަށް ލޯބިކުރާ، ޕުޓިންގެ ގިނަ ފޭނުން މާޔޫސް ކުރުވާނެ ނިންމުމެއްގެ ގޮތުގައި ވަނީ ބެލެވިފައެވެ.
ފީފާ އަދި ޔޫއެފާއިން ނެރުނު ގުޅިފައިވާ ބަޔާނުގައި ބުވެފައިވަނީ، މި ދެ އެސޯސިއޭޝަންއިން ބާއްވާ އެއްވެސް މުބާރާތެއްގައި ރަޝިއާއަށް ވާދަ ނުކުރެވޭނެ ކަމަށެވެ. އަދި މި ސަސްޕެންޝަންގެ ނަތީޖާއެއްގެ ގޮތުން، އަންނަ މާރޗްމަހު ބޭއްވުމަށް ހަމަޖެހިފައިވާ ކުރިޔަށް އޮތް ވާރލްޑްކަޕް ޕްލޭ އޮފް މެޗުތަކުގައި ރަޝިއާއަކަށް ނުކުޅެވޭނެއެވެ.
އަދި މީގެއިތުރުން، ރަޝިއާގެ ސަރުކާރުގެ ގޭސް ކުންފުނި، ގަސްޕްރޮމްއާއެކު ގައިމްކޮސްފައިވާ ޕާރޓްނަރޝިޕް މިހާރު ސަސްޕެންޑު ކޮށްފައިވާކަންވެސް ޔޫއެފާއިންވަނީ ހާމަކޮށްފައެވެ. މިއީ ޗެމްޕިއަންސް ލީގާއި، 2024ގެ ޔޫރޯގެ ސްޕޮންސަރޝިޕް ހިމެނޭ، 80 މިލިއަން ޑޮލަރުގެ އަގުބޮޑު އެއްބަސްވުމެކެވެ.
