މިސަރުކާރުގެ އެކި މަޤާމުތަކުގައި ތިއްބެވި އެމްޑީޕީގެ ބޭފުޅުންގެ ތެރެއިން އެމްޑީޕީގެ އެތެރޭގެ އިންތިޚާބާއި ދިމާކޮށް ވަކި ބަޔަކު މަޤާމުތަކުން ވަކި ކުރާނަމަ، ރައީސް ނަޝީދުވެސް އެމްޑީޕީގެ ވަކިކޮށް ދެއްވުމަށް ރައީސް ނަޝީދު ރައީސް ޞާލިހުގެ ކިބައި އެދިއްޖެއެވެ.

އެމްޑީޕީގެ ޤައުމީ މަޖިލިސް އިންތިޚާބުގައި ޗެއާޕާސަންގެ މަޤާމަށް ވާދަކުރައްވާ މިނިސްޓަރ ފައްޔާޒު އިސްމާއިލްއާއި، އިމްތިޔާޒު ފަހުމީގެ ކެމްޕެއިން ވަރަށް ފޯރީގައި ކުރިއަށްދާއިރު މިއިންތިޚާބާއި ދިމާކޮށް، ރައީސް ނަޝީދާއި، ރައީސް ޞާލިހަށް ތާއީދު ކުރައްވާ ބޭފުޅުންގެ މެދުގައި ދަނީ ބަހުގެ ހޫނު ހަމަލާތައް ބަދަލު ކުރަމުންނެވެ. ރައީސް ނަޝީދުގެ ތާއީދު އިންތިއަށް އޮތްއިރު، ރައީސް ޞާލިހު ތާއީދު ކުރައްވަނީ މިނިސްޓަރ ފައްޔާޒަށެވެ.

އިންތިޚާބާއި ދިމާކޮށް ސަރުކާރުގެ އެކި މަޤާމުތަކުގައި ތިބި އެމްޑީޕީގެ ބައެއް ބޭފުޅުން މަޤާމުތަކުން ވަކި ކުރާތީ ކަންބޮޑުވުން ފާޅުކޮށް ރައީސް ނަޝީދު ވަނީ ރައީސުލްޖުމްހޫރިއްޔާ ޤާނޫނު އަސާސީގެ 115 ވަނަ މާއްދާ ބޭނުން ކުރައްވަމުންދަނީ ވަރަށް ސިޔާސީކޮށް ކަމަށް ވިދާޅުވެފައެވެ.

ރައީސުލްޖުމްހޫރިއްޔާ ގެންދަވަނީ އެމްޑީޕީގެ އެތެރޭގެ އިންތިޚާބާއި ދިމާކޮށް އިންތިޚާބު ވަކި ގޮތަކަށް އަބުރާލުމަށް ބައެއް މަޤާމުތަކުގައި ތިއްބެވި އެމްޑީޕީގެ މެމްބަރުން ވަކި ކުރަމުން ކަމުގައި ރައީސް ނަޝީދު ވިދާޅުވިއެވެ. ނަމަވެސް ވަކި ކޮށްފައިވަނީ ކޮން ބޭފުޅެއްކަމެއް ރައީސް ނަޝީދު ވިދާޅުވެއް ނުވެއެވެ. ރައީސް ނަޝީދު ވިދާޅުވީ އެގޮތަށް ވަކި ކުރާނަމަ އެމަނިކުފާނުވެސް އެމްޑީޕީން ވަކި ކުރުމަށް އެދޭކަމަށެވެ.

ރައީސުލްޖުމްހޫރިއްޔާ ޤާނޫނު އަސާސީގެ 115 ވަނަ މާއްދާ މި ބޭނުން ކުރައްވަނީ ވަރަށް ސިޔާސީކޮށް. ރައީސުލްޖުމްހޫރިއްޔާއަށް ދަންނަވަން، އެމްޑީޕީގެ އެތެރޭގެ އިންތިޚާބާއި ދިމާކޮށް، ޕާޓީން މަޤާމު ތަކުގައި ތިއްބަވާ ބޭފުޅުން ވަކިކޮށްގެން، ނުވާނެ. ވަކި ކުރަނީނަމަ އަޅުގަނޑުވެސް ވަކި ކުރައްވާ.

– ރައީސް ނަޝީދު ވަޓްސް އަޕް ގްރޫޕަށް ފޮނުވި މެސެޖުގައި ވިދާޅުވިއެވެ.

އެމްޑީޕީން ވަކި ކޮށްދެއްވުމަށް ރައީސް ނަޝީދު ރައީސް ޞާލިހުގެ އަރިހުން އެދިފައިވާއިރު، ރައީސް ޞާލިހު މިވަގުތު ހުންނެވީ ޑޮކްޓަރުގެ ލަފާގެ މަތިން ސިންގަޕޫރަށް ވަޑައިގަންނަވަނީ ތައިރޮއިޑަށް ފަރުވާ ހޯއްދެވުމަށެވެ. ރައީސް ޞާލިހާއި ރައީސް ނަޝީދުގެ ޚިޔާލު ތަފާތުވެ އަނެއްކާވެސް ސިޔާސީ ވާދަވެރިކަން ބޮޑުވެފައިވަނީ އެމްޑީޕީގެ އެތެރޭގެ އިންތިޚާބާއި ގުޅިގެންނެވެ.

އެމްޑީޕީގެ ޗެއާޕާސަންގެ މަޤާމަށް ފައްޔާޒު ވާދަކުރައްވާއިރު، އޭނާއަކީ މިސަރުކާރުގެ ވަޒީރުކަމުން ވަކި ކުރުމަށް ރައީސް ނަޝީދު ވަރަށް ބޮޑަށް މަސައްކަތް ކުރެއްވި ބޭފުޅެކެވެ. ރައީސް ނަޝީދު ފައްޔާޒު ސިފަކުރައްވަނީ "ބްރޯ"ގެ ގޮތުގައެވެ. ރައީސް ނަޝީދުވަނީ ބްރޯ ހެދިގެން ނޫޅެވޭނެކަމަށްވެސް ވިދާޅުވެފައެވެ. އަދި ފައްޔާޒުގެ އިތުރުބާރު ނެތްކަމުގެ ވޯޓު ނެގުމަށްވެސް މަޖިލިސް ތެރެއިން ވަނީ މަސައްކަތް ކޮށްފައެވެ.

ނަމަވެސް ފައްޔާޒުގެ ދިފާއުގައި ރައީސް ޞާލިހު ވަނީ ނިކުންނަވައި، ފައްޔާޒަށް ފުރިހަމަ އިތުބާރު އޮތްކަމަށް ވިދާޅުވެފައެވެ. ފައްޔާޒު އެމްޑީޕީގެ ޗެއާޕާސަންގެ މަޤާމަށް ވާދަކުރެއްވުމަކީ އެމްޑީޕީގައި ރައީސް ނަޝީދާއި، ރައީސް ޞާލިހުގެ އިތް ވާދަވެރިކަން ވަރަށް ބޮޑަށް ހާމަވެގެންދާނެ އިންތިޚާބެއްކަމަށް ގިނަ ބަޔަކު ދެކެއެވެ. އެމްޑީޕީގެ ޗެއާޕާސަންގެ އިންތިޚާބު ބޭއްވުމަށް ހަމަޖެހިފައިވަނީ އޭޕްރީލް މަހުގެ 16 ވަނަ ދުވަހުއެވެ.