އިރުމަތީ ޔޫކުރެއިންގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ އެގައުމުގެ ދެސަރަހައްދު ކަމުގައިވާ ޑޮނެސްކްއާއި ލުހާންސްކައަކީ މިނިވަން ދައުލަތެއް ކަމުގައި ކަނޑައަޅާ، މި ދެ ސަރަހައްދުގެ މިނިވަންކަން ރަސްމީކޮށް ބަލައިގަތުމަށް ރަޝިއާގެ ރައީސް ލާޑިމިރު ޕުޓިން ނިންމެވި ނިންމެވުމަށް ތާއީދުކުރާކަން ސީރިއާގެ ސަރުކާރުން ހާމަކޮށްފިއެވެ.
ސީރިއާގެ ފޮރިންގ މިނިސްޓަރ ފައިސަލް މެކްޑެޑްއާއި ހަވާލާދީ ސިރިއާގެ ސަރުކާރު ޓީވީން ރިޕޯޓު ކޮށްފައިވާ ގޮތުގައި، ސީރިއާގެ ރައީސް ބައްޝާރުލް އަސަދު ވަނީ، ޔޫކުރެއިން އިރުމަތީގައި އަމިއްލައަށް މިނިވަންކަން އިއުލާން ކޮށްފައިވާ ޑޮނެސްކް ޕީޕަލްސް ރިޕަބްލިކް (DPR)އާއި ލުހާސްކް ޕީޕަލްސް ރިޕަބްލިކް (LNR)އަށް ފުރިހަމަޔަށް އެއްބާރުލުން ދިނުމަށް ނިންމާފައެވެ.
މޮސްކޯގައި ކުރިޔަށްދާ ވަލްޑާއި ފޯރަމްގައި، ސީރިއާގެ ފޮރިންގ މިނިސްޓަރގެ ސްޓޭޓްމަންޓް އައިސްފައިވަނީ، ސީރިއާގެ ސަރުކާރާއި ގުޅުންހުރި ކަންކަމުގައި އެންމެ އިސްފަރާތެއްގެ ގޮތުގައި ރަޝިއާއިން ހަމަޖައްސާފައިވާ ޑިމިޓްރީ ސަބްލިން ސީރިއާގެ ރައީސް ބައްޝާރުލް އަސަދަށް ގުޅުއްވާ ޔޫކުރެއިންގެ ހާލަތާއި ގުޅޭ އެންމެ ފަހުގެ މައުލޫމާތު ދެއްވާފައިވާކަމަށް ވިދާޅުވިތާ މާގިނައިރުތަކެއް ނުވަނީހެވެ.
2011 ވަނަ އަަހަރު ސީރިއާ ސަރުކާރާ ދެކޮޅަށް ފެށުނު މުޒާހިރާތައް ފުޅާވެ، އެގައުމުގައި އަހުލީ ހަގުރާމައެއް ފެށުނުފަހުން، އަސަދުގެ ސަރުކާރަށް އެންމެ ބޮޑު އެހީތެރިކަމެއް ފޮރުކޮށްދެމުންދާ ގައުމަކީ ރަޝިއާއެވެ. އަދި 2015ވަނަ އަހަރު ރަޝިއާގެ އަސްކަރިއްޔާއިން އަސަދުގެ ސަރުކާރަށް ފޯރުކޮށްދިން އަސްކަރީ އެހީތެރިކަން ވެގެން ގޮސްފައިވަނީ އަސަދުގެ ސަރުކާރު ވެއްޓިގެން ދިޔަނުދީ، އަދި އެއަށްފަހު ބައްޝާރުލް އަސަދުގެ ސަރުކާރަށް މި އަހުލީ ހަގުރާމަ ކާމިޔާބު ވެދިއުމުގެ އަސްލު ކަމުގައިވެސް މެއެވެ.
ސީރިއާގެ ރައީސް ބައްޝާރުލް އަސަދުއާއި މަޝްވަރާ ކުރުމުގެ އިތުރުން ސީރިއާގައިވާ ރަޝިއާގެ އެއަރބޭސްތައް އިންސްޕެކްޓު ކުރުމަށްޓަކާ ރަޝިއާގެ ދިފާޢީ ވަޒީރު ސާގެއި ޝޮއިގު ވަނީ ފާއިތުވެދިޔަ ހަފްތާގައި ސީރިއާއަށް ޒިޔާރަތް ކުރައްވާފައެވެ.
ރަޝިއާގެ ދިފާޢި ވަޒީރު ސީރިއާއަށް ޒިޔާރަތް ކުރައްވާފައިވަނީ، އެ ސަރަހައްދުގައި ރަޝިއާއިން ކުރިޔަށް ގެންދިއުމަށް ހަމަޖެހިގައިވާ އަސްކަރީ ތަމްރީތަކަށް، ނިއުކުލިއަ ހަތިޔާރުގެ ގާބިލްކަން ލިބިފައިވާ ދުރުރާސްތާއަށް ދަތުރުކުރުމުގެ ގާބިލްކަން ލިބިގައިވާ ބޮންއަޅާ މަތިންދާ ބޯޓުތަކާއި، އަދި ހައިޕަރ ސޮނިކް މިސައިލްތައް އުފުލުމުގެ ގާބިލްކަން ލިބިފައިވާ ފައިޓަޖެތައް ސީރިއާގައިވާ ރަޝިއާގެ އެއަރބޭސްއަށް ގެންގޮސްފައިވާ ދަނޑިވަޅެއްގައެވެ.
ދަމަސްކަސްގައި ބޭއްވުނު ބައްދަލުވުމުގައި ޝޮއިގުވަނީ އިރުމަތީ މެޑިޓެރޭނިއަންގައި ރަޝިއާއިން ކުރިއަށް ގެންދިއުމަށް ހަމަޖެހިފައިވާ މިތަމްރީނުތަކުގެ މައުލޫމާތު ބައްޝާރުލް އަސަދަށް އަރުވާފައެވެ.
ރަޝިއާއިން ސިރިއާއަށް ދެމުން ގެންދާ އެހީތެރިކަމަކީ ރަޝިއާއި ހުޅަނގުގެ ގައުމުތަކާ ދެމެދު ނުތަނަވަސްކަން އުފެދިގެން ގޮސްފައިވާ އެއް މައްސަލައެވެ.
ރަޝިއާއިން ޔޫކްރެއިންގެ އިރުމަތީގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ ސަރަހައްދުތަކުގެ މިނިވަންކަން ބަލައިގަނެ، އަސަރަހައްދުތަކަށް ސުލްހަ ބެލެހެއްޓުމުގެ ނަމުގައި ރަޝިއާގެ އަސްކަރިއްޔާ ފޮނުވުމަށް އެގައުމުގެ ރައީސް ލާޑިމިރު ޕުޓިން އޯޑަރު ކުރުމާއި ގުޅިގެން، ރަޝިއާއި ދެކޮޅަށް އިގްތިސާދީގޮތުން އަޅާނެ ދަތިކުރުމުގެ ފިޔަވަޅުތައް ހުލަނގުގެ ގައުމުތަކުން މިހާރުދަނި އިއުލާން ކުރަމުންނެވެ.
