ބިރު ކުޑަ އެކްޓަރެއްގެ ގޮތުގައި މަޝްހޫރު ކަންގަނާ ރަނާވަތު، އޭނާގެ އެކްޓިންއާ އެކުގައި މަޝްހޫރީ ފިލްމު އިންޑަސްޓްރީގެ ގިނަ ބަޔަކާ ޒާތީ ހަމަނުޖެހުން އޮންނަ މީހެއްގެ ގޮތުގައެވެ.
ހާއްސަކޮށް ޑައިރެކްޓަރ އަދި ޕްރޮޑިއުސަރ ކަރަން ޖޯހަރަކީ ކަންގަނާއަށް ވަރަށް ކަމުނުދާ މީހެކެވެ. އަބަދުވެސް އޭނާއަށް ފާޑު ކިޔައި ދެބަސްވާ ކަހަލަ ވާހަކަތައް ކަންގަނާ ދައްކައެވެ. އަދި އެއްވެސް މީހަކާ މެދު ފަސްޖެހުމެއް ނެތި ހުރިހާ ކަމަކާ އޭނާ ބެހެއެވެ. އެގޮތުން "ބޮލީވުޑް މާފިޔާ"ގެ ބޮޑަކީ ކަރަން ކަމަށް އޭނާ ތުހުމަތު ކުރެއެެވެ.
މި ރުޅިގަނޑުގައި ކަރަން މި ދާއިރާއަށް އަލަށް ތައާރަފު ކުރާ ތަރިންނާވެސް އޭނާ އަންނަނީ އެކި ގޮތްގޮތުން ޖައްސާލަމުންނެވެ. އެގޮތުން އާލިއާ ބަޓަކީ މި ލިސްޓްގެ އެންމެ ކުރީގައި އޮތް ނަމެވެ. ކަންގަނާގެ އެންމެ ބޮޑު ހިތްހަމަ ނުޖެހުމަކީ އަބަދުވެސް އާލިއާއަށް ކަރަން މާ ރަނގަޅަށް ކަންކަން ކޮއްދޭތީއެވެ.
ޑައިރެކްޓަރު ސަންޖޭ ލީލާ ބަންސާލީގެ "ގަންގޫބާއި ކަތިއަވަޅީ" ގެ ޓްރެއިލާ އާއި ޓީޒާ ނެރުމާއެކު އޭނާ ވަނީ އާލިއާއާ ޖައްސާލައިފައެވެ.
ކަންގަނާ ބުނި ގޮތުގައި އާންމުކޮށް ކާމިޔާބު ފިލްމުތަކެއް ހަދާފައިވާ ބާންސާލީގެ މި ފިލްމު ނުހިނގާނެ އެންމެ ބޮޑުއެއް ސަބަބަކީ ފިލްމުގައި ބައިވެރި ކޮށްފައިވާ އެކްޓަރުންނެވެ. އާލިއާއަށް ފިލްްމުގެ ލީޑްރޯލު ދިނުމަކީ ފިލްމު ނުހިނގާނެ އެންމެ ބޮޑު ސަބަބު ކަމުގައި އޭނާ ބުނެއެވެ. ފިލްމު ރިލީޒް ކުރުމަށް ހަމަޖެހިފައި ވަނީ އަންނަ ހުކުރު ދުވަހުއެވެ.
ކަންގަނާ ބުނީ ހުކުރު ދުވަހު ބޮކްސް އޮފީހުގައި 200 ކްރޯޑު ރުޕީސް އަނދާ އަޅިޔަށް ވާނެކަމަށެވެ. ކަންގަނާ މިގޮތަށް ބުންޏަސް، ސަންޖޭ ލީލާ ބަންސާލީގެ ފިލްމުތަކަކީ އަންމުގޮތެއްގައި ސުޕަރހިޓް ފިލްމުތަކެކެވެ.
މިއީ އާލިއާގެ "ގަންގޫބާއި" ކެރެކްޓަރއަށް ކަންގަނާ ފާޑުކީ ފުރަތަމަ ފަހަރެއް ނޫނެވެ. އޭނާ ސޯޝަލް މީޑީއާގައި މިހުރިހާ ވާހަކައެއް ދެއްކިއިރު ސީދާ އާލިއާގެ ނަން ބުނެފައެއް ނުވެއެވެ. ނަމަވެސް އެންމެންނަށް ވެސް، ކަންގަނާ ދެއްކީ އާލިއާގެ ވާހަކަކަށް އެނގެއެވެ.
