މާލޭގެ ރައްޔިތުންނަށް ބޭނުންވާ ބޯހިޔާވަހިކަމުގެ މައްސަލަ ހައްލުކުރުމަށް މާލޭ ރައްޔިތުންނަށް ގޯތި ދެއްވާނެކަމަށް ރައީސުލްޖުމްހޫރިއްޔާ ވިދާޅުވާތާ ތިން އަހަރު ވެފައިވާކަމަށާއި، ނަމަވެސް އަދިވެސް އެކަމަށް ހައްލެއް ލިބޭތަނެއް ނުފެންނަ ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ފެނާއި ނަރުދަމާގެ ޤާނޫނަށް ހުށަހެޅިފައިވާ އިސްލާހަށް ބަހުސް ކުރައްވަމުން އާޒިމް ވިދާޅުވީ، ޤާނޫނު އަސާސީއާއި، ދިވެހި ކޮންމެ ރައްޔިތަކާއިމެދު އަމަލު ކުރަންޖެހޭނީ ހަމަހަމަ އުސޫލަލުން ކަމަށް ކަނޑައަލައި ބަޔާން ކޮށްފައިވާކަމަށެވެ. ނަމަވެސް އެތަފާތުކުރުން ނައްތާލެވިފައިވާކަން މިއަދާއިހަމައަށްވެސް ފެނިފައިނުވާކަމށެވެ.
އާޒިމްގެ އެންމެ ބޮޑު ކަންބޮޑުވުމެއް އޮތީ މާލޭ ރައްޔިތުންނަށް ބޯހިޔާވަހިކަން ނުލިބޭ މައްސަލާގައެވެ. އާޒިމް ވިދާޅުވީ ކޮންމެ އަހަރެއްގެ ރިޔާސީ ބަޔާނުގައި ރައީސުލްޖުމްހޫރިއްޔާ މާލޭގެ ރައްޔިތުންނަށް ބިންކަނޑައި ގޯތީގެ ފަތްދޭނެކަމަށް ވިދާޅުވާކަމަށެވެ. ނަމަވެސް މިވީ ތިން އަހަރުގައި މިވާހަކަ ދެއްކުންފިޔަވައި ވީހަމަ އެއްވެސް ކަމެއްނެތްކަމަށެވެ.
ރައީސްގެ ކޮންމެ ރިޔާސީ ބަޔާނެއްގައި ވިދާޅުވޭ މާލޭ ރައްޔިތުންނަށް ބިން ކަނޑާފައި ގޯތި ދޭނެ ވާހަކަ. ތިން އަހަރުވަނީ އެވާހަކަ ދައްކާތާ. އަދި އެކަން ކުރެވިފައިނުވޭ. ނަމަވެސް ޤާނޫނު އަސާސީގައި ބުނެފައިވާ މިހަމަހަމަކަން އަދިވެސް ނުފެނޭ.
– އާޒިމް ވިދާޅުވިއެވެ.
އާޒިމް ވިދާޅުވީ، މާލޭގެ ރައްޔިތުންނާއި، އަތޮޅު ތެރޭގެ ރަށްޔިތުންނަށް ބޯހިޔާވަހިކަން ކަށަވަރު ކޮށްދިނުމުގައި ޤާނޫނު އަސާސީގައި ބަޔާންކޮށްފައިވާ ހަމަހަމަ ކަމާއި ވަރަށް ބޮޑަށް ޚިލާފްވަމުންދާކަމަށެވެ. ޓެކްސް ޕޭޔަރުންގެ ފައިސާއިން ހިއްކާ ބިންތަކުން ބިން ލިބެންޖެހޭނީ ހަމައެކަނި ވަކި ބަޔަކަށް ނޫންކަމަށާއި، ދިވެހި ކޮންމެ ރައްޔިތަކަށް ހަމަހަމަ އުސޫލުން ބިންލިބޭނެ މަގު ފަހިވާންޖެހޭކަމަށް އާޒިމް ވިދާޅުވިއެވެ.
މާލޭގެ ރައްޔިތުންނަށް އެންމެ ބޭނުންވަނީ ބޯހިޔާވަހިކަން. މާލޭގެ ރައްޔިތުން މިޖެހެނީ ބޮޑެތި އަގުދީފައި ދައްކަން. ލައްކަ ދަތި ހާލުގައި މާލޭ ރައްޔިތުން އުޅެނީ. ޤާނޫނު އަސާސީގައި އޮތް ހަމަހަމަކަން މިކަމުން ނުފެނޭ. ހިއްކުމަށްފަހު މާލެ ރައްޔިތަކަށްވެސް އެހެން ރަށެއްގެ މީހަކަށްވެސް ތަފާތުވެގެން ނުވާނެ.
– އާޒިމް ވިދާޅުވިއެވެ.
މިއަހަރަށް މަޖިލީހަށް އިއްވި ރިޔާސީ ބަޔާނުގައި ރައީސް ވިދާޅުވީ ބޯހިޔާވަހިކަމުގައި މާލޭގެ ރައްޔިތުންނަށް އޮތް ދައްޗާއި ތަކުލީފުވަނީ އޭގެ ލާ ނިހާޔަތުގައިކަމަށެވެ. މިހާތަނަށްވެސް ކުރެވެމުން އައި އިޙުސާސަކީ މާލޭ ސަރަޙައްދުގެ ބޯހިޔާވަހިކަމާއި ގުޅޭގޮތުން ކުރެވުނު ކަންކަމަށްވުރެ، ގިނަ ވާހަކަ ދެއްކޭ ކަމުގެ އިޙުސާސްކަމަށެވެ. ނަމަވެސް މާލޭ ސަރަޙައްދަށް ސަރުކާރުން ކަނޑައަޅާފައިވާ ބޯހިޔާވަހިކަމުގެ މި ސިޔާސަތުތަކާއެކު މި މަންޒަރު ބަދަލުކޮށްލާނެކަމަށެވެ.
އިރާދަކުރެއްވިއްޔާ އަޅުގަނޑުގެ ރިޔާސީ މި ދައުރު ނިންމާނީ އެންމެ ބޭނުން ޖެހިފައިވާ މާލޭގެ ރައްޔިތުންނަށް އިންވަކިކޮށް، ރޯނުދަމާ، ބިންކަނޑާ، ގޯތީގެ ފަތް ދިނުމަށްފަހު. ދެވެހި ދަޢުލަތުގެ ހިޔާވަހިކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ.
– ރައީސުލްޖުމްހޫރިއްޔާ ވިދާޅުވިއެވެ.
ބޯހިޔާވަހިކަމުގެ މައްސަލައަކީ ރާއްޖެއަށް އޮތް އެންމެ ބޮޑު އެއް އިޖުތިމާޢީ މައްސަލައެވެ. މި މައްސަލަ ޙައްލުކޮށްދެވުމަށް ރަށްރަށަށް ބިން އިތުރުކުރުމަށް، ބިން ހިއްކުމުގެ ގިނަ މަޝްރޫޢުތައް މިހާރުވެސް ސަރުކާރުން ދަނީ ކުރިއަށްގެންދަމުންނެވެ.
