2015ވަނަ އަހަރު ދުނިޔޭގެ ބާރުތަކާއި އިރާނާ ދެމެދު ވެވުނު ނިއުކުލިއަރ އެއްބަސްވުން އަލުން އިއާދަ ކުރެވި، އެމެރިކާއާއި އިރާނާ ދެމެދު އެބަސްވުމަކާއި ހަމައަށް އައުމުގެ އެންމެ ފަހުގެ މަރުހަލާއާއި ހަމައަށް މިހާރު އާދެވިފައިވާ ކަމަށާއި، އެންނަމަވެސް މިއެއްބަސްވުން އަލުން އިއާދަ ކުރުމަށްޓަކާ ކުރެވެމުންދާ މަޝްވަރާތައް ކާމިޔާބު ވުމާއި ނުވުން ބިނާވެފައި އޮތީ މިކަން ކާމިޔާބު ކުރުމަށް ދެފަރާތުންވެސް ސިޔާސީގޮތުން އަޒުމް ކަނޑައަޅާފައިވާ މިންވަރެއްގެ މައްޗަށްކަމަށް، މަޝްވަރާތަކުގައި ބައިެވރިވާ ޔޫރަޕްގެ ސީނިއަރ އޮފިޝަލަކު ވިދާޅު ވެއްޖެއެވެ.
"އުއްމީދު ކުރަނީ އަންނަ ހަފްތާފައި މިއެއްބަސްވުމާމެދު ގޮތްތަކެއް ނިންމިގެން ދާނެކަމަށް، އަންނަ ހަފްތާ ނުވަތަ ކުރިޔަށް އޮތް ދެ ހަފްތާއެއްހާ ދުވަހުގެ ތެރޭގައި،" އީޔޫގެ އޮފިޝަލް ވިދާލުވެފައި ވެއެވެ. "އުއްމީދު ކުރެވޭ ގޮތުގައި، މިހާރު އަހަރެމެންގެ މޭޒުމަތީގައި އޮތީ އެންމެ ފަހުގެ އެއްބަސްވުން ކަމުގައި ވެގެން ދިއުމަކީ ވަރަށް ބޮޑަށް އެކަށީގެން ވާކަމެއް،" އޭނާ ވިދާޅު ވެފައި ވެއެވެ.
ފެބްރުއަރީމަހުގެ 17 ވަނަ ދުވަހު، ރޮއިޓާސްއިންވަނީ އިރާން، ރަޝިއާ، ޗައިނާ، އިނގިރޭސިވިލާތް، ޖާރމަނީ، ޔޫރަޕިއަން ޔޫނިއަން އަދި އެމެރިކާއިން މަޝްވަރާކޮށް، އެއްބަސްވުމަކަށް އައިސްފައިވާކަމަށް ބެލެވޭ އެއްބަސްވުމުގެ ތަފްސީލުތައް ހާމަ ކޮށްފައެވެ.
"ހުރިހާ ކަމަކަށްވެސް ވަނީ އެއްބަސް ވެވިފަ. އެހެންނަމަވެސް މިބާރަތުގެ މަޝްވަރާތަކުގެ، އެއްބަސް ނުވެވެނީސް އެއްބަސްވީ ކަމުގައި ނުނިންމޭނެ، އެހެންކަމުން، އަހަރެމެންގެ މެދުގައި އަދިވެސް ބައެއް ސުވާލުތައް އެބަހުރި، އޭގެ ބައެއް ކަންކަމަކީ، ސިޔާސީގޮތުން އެއްބަސްވުމަކަށް އަންނަން ވަރަށް އުދަގޫ ކަންކަން،" އޮފިޝަލް ވިދާޅުވެފައި ވެއެވެ.
ޔޫރަޕިއަން އިއްތިހާދުގެ އޮފިޝަލް ވިދާޅުވެފައި ވާގޮތުގައި، މިއެއްބަސްވުން މުހިންމު ވެފައިވަނީ، އިރާނުގެ ނިއުކުލިއަރ ޕްރޮގްރާމް ވަރަށް ބާރު ސްޕީޑުގައި ކުރިޔަށް ދާތީ ކަމުގައެވެ. އެހެންނަމަވެސް އިރާނުން އަބަދުވެސް ބުނަމުން އަންނަނީ އެގައުމުން ނިއުކުލިއަރ ހަތިޔާރު އުފައްދަން އެއްވެސް އިރަކު މަސައްކަތް ނުކުރާ ކަމަށެވެ.
