މަންޓާ އެއަރ އިން އެކުންފުނީގެ 7 ވަނަ ސީޕްލޭން ރާއްޖެ ގެނެސްފިއެވެ.
ޑީ.އެޗް.ސީ 6 ޓްވިން އޮޓަރ މަރުކާގެ މި ބޯޓު ރާއްޖެއަށް އައިސްފައިވަނީ ކެނެޑާއިން ފުރައިގެން 16000 ކިލޯމީޓަރުގެ ދަތުރަކަށް ފަހު، 7 ދުވަހުންނެވެ. މަންޓާ އެއަރއިން ބުނީ މި ސީ ޕްލޭން ހާއްސަކޮށްފައި ވަނީ ވަނީ ބ. އަތޮޅުގައި ތަރައްގީކޮށްފައިވާ ނައުޓިލަސް މޯލްޑިވްސް ރިސޯޓަށް ފަތުރުވެރިން އުފުލުމަށް ކަމަށެވެ.
މަންޓާ އެއަރއިން ސީ ޕްލޭންގެ ޙިދުމަތް ފަށާފައިވަނީ މިދިޔަ އަހަރު ނޮވެމްބަރު މަހު އެވެ. އަދި 1 އަހަރު ދުވަސް ތެރޭ 7 ބޯޓަށް ސީޕްލޭން ފްލީޓް އިތުރު ކުރުމަކީ އެކުންފުނީގެ ޚިދުމަތް ފުޅާކުރުމަށް މުސްތަޤްބަލަށް ކަނޑައަޅާފައިވާ ޕްލޭންތަކުގެ ތެރެއިން ލިބުނު ބޮޑު ކުރިއެރުމެއް ކަމަށް އެކުންފުނިން ދެކެއެވެ. މި ބޯޓާއެކު މަންޓާ އެއަރ އިން އޮޕަރޭޓްކުރާ މަތިންދާ ބޯޓުތަކުގެ އަދަދުވަނީ 10 އަކަށް މިވަނީ އިތުރުވެފައެވެ. އެއީ އެތެރޭގެ އުދުހުންތަކުގައި ބޭނުންކުރާ އޭޓީއާރު 72-600 ގެ ތިން މަތިންދާ ބޯޓާއި އެކުއެވެ.
އެތެރޭގެ އުދުހުންތަކަށް ޚާއްސަކޮށްގެން ރާއްޖޭގައި އެންމެ ފަހުން އޮޕަރޭޓް ކުރަން ފެށި މަންޓާ އެއަރ އިން، ކޯވިޑް-19ގެ ސަބަބުން ދަތުރުތައް މެދުކަނޑާލުމުގެ ކުރިން ރާއްޖޭގެ 3 މަންޒިލަކަށް ގެންދިޔައީ ދަތުރު ކުރަމުންނެވެ. އެއީ އެ އެއަރ ލައިނުން ދ.ކުޑަހުވަދޫގައި ތަރައްޤީކޮށްފައި ވާ ދާލު އެއަރޕޯޓާއި ކޫއްޑޫއަށާއި، ދަރަވަންދޫއަށެވެ. ނަމަވެސް އެތެރޭގެ އުދުހުންތަށް އަލުން ފެށުމުން އެ އެއަރލައިނުން އަދި ދަތުރުތައް ކުރަނީ ކުޑަހުވަދޫއަށް އެކަންޏެވެ.
