އިސްރާއީލާއި ފަލަސްތީނުގެ ދެމެދުގައި އެތައް ޒަމާނެއް ވަންދެން ހުއްޓިފައިފާ ސުލްހައިގެ ވާހަކަތައް އަލުން ފަށާ، އަދި މިނިވަން ދެދައުލަތެއްގެ ހައްލު މިމައްސަލައަށް ގެނައުމަށް، އިސްރާއީލާއި ފަސްތީނުގެ އިސް ބައެއް ފަރާތްތަކުން ގުޅިގެން އާ ޕްރޮޕޯސަލެއް، ފަލަސްތީނާއި އިސްރާއީލުގެ އިސްފަރާތްތަކުގެ އިތުރުން، އެމެރިކާ އަދި ޔޫއެންގެ ސެކެޓްރީ ޖެނެރަލަށް ހުށަހެޅުމަށް ތައްޔާރު ވެއްޖެއެވެ.
މިގޮތުން އެކުލަވާލާފައިވާ ޕްލޭންގައި، އެތައް ޒަމާނެއް ވަންދެން މި ދެގައުމުގެ ދެމެދުގައި ޚިޔާލު ތަފާތުވެ، ހައްލު ނުކުރެވިގައިވާ، ނާޒުކު މަސައްކަތަކަށް ހައްލު ގެންނާނޭ ގޮތް ހުށަހަޅާފައި ވެއެވެ. އެހެންނަމަވެސް، މި ޕްލޭނަށް އިސްރާއީލާއި ފަލްސްތީނުގެ ލީޑަރުންގެ ތާޢީދު އޮތްކަން އަދި ޔަގީން ކުރެވިފައެއް ނުވެއެވެ. އެހެންނަމަވެސް މި ޕްލޭންގައި، ދެގައުމުގެ ދެމެދުގައި އުފެދިފައިވާ ޚިޔާލުތަފާތުވުންތަކަށް ހައްލު ހޯދުމަށް މަޝްވަރާ ކުރެވޭނެ އޮނިގަޑެއް އެކުލަވާލެވިގެންދާނެ ކަމަށް އުއްމީދު ކުރެވޭއިރު، މި ޕްރޭލްން މިހަފްތާފައި ޔޫއެންގެ އޮފިޝަލުންނަށާއި އަދި ޔޫއެންގެ ސެކެޓްރީ ޖެނެރަލަށް ހުށަހެޅުމަށްވެސް ވަނީ ހަމަޖެހިފައެވެ.
މި ޕްލޭން ތައްޔާރު ކުރައްވާފައިވަނީ، އިސްރާއީލުގެ ކުރީގެ ޕިސް ނެގޯޝިއޭޓަރ އަދި ފަހުން އުފައްދާފައިވާ ޖެނީވާ އިނީޝިއޭޓިވްގެ ކޯ ފައުންޑަރއެއް ކަމުގައިވާ ޔޯއްސީ ބެލިންއާއި، ފަލަސްތީނުގެ ނެގޯޝިއޭޓިންގ ޓީމުގެ ކުރީގެ ލީގަލް އެޑްވައިޒަރ ހިބާ ހުސެއިނީއެވެ. އޭނާ އަކީ ޖެރޫސެލަމްގެ ނުފޫޒުގަދަ އާއިލާއަކަށް ނިސްބަތްވާ މީހެކެވެ.
މި ޕްލޭންގައި ވާގޮތުން، ފަލަސްތީނުގެ މިނިވަން ދައުލަތެއް އުފެދިގެން ދާއިރު، ހުލަނގު އައްސޭރީގެ ބޮޑު ބަޔަކާއި، ގާޒާގެ އިތުރުން، އިރުމަތީ ޖެރޫސެލަމް ހިމެނިގެންދާނީ ފަލަސްތީނުގެ ސަރަހައްދު ތަކުގެ ގޮތުގައެވެ. މިއީ 1967ގެ ހަގުރާމާގައި އިސްރާއީލުން ހިފާފައިވާ ފަލަސްތީނުގެ ބިންތަކެވެ.
މީގެ އިތުރުން މި ޕްލޭންގައި ވާގޮތުން، އިސްރާއީލާއި ފަލަސްތީން މިނިވަން ދެ ދައުލަތެއްގެ މައްޗަށް ބިނާވެގެންދިޔަ ނަމަވެސް، މަތީ ފަންތީގެ ސެކިއުރިޓީއާއި ގުޅުންހުރި ކަންކަމުގައި ކޯޑިނޭޓް ކުރެވިގެން ދާނެއެވެ. މީގެ ތެރޭގައި އިންފްރާސްޓަރަކްޗަރގެ އިތުރުން، ދެގައުމުގެ އާބާދީއާއި ގުޅުންހުރި ކަންކަން ހިމެނިގެން ދާނެއެވެ.
މި ޕްލޭންގައި ވާގޮތުން، ހިފާފައިވާ ހުލަނގު އައްސޭރީގައި އިސްރާއީލުން ވަަޒަންވެރި ކޮށްފައިވާ އިސްރާއީލުގެ ރައްޔިތުންނަށް އެ ތަންތަނުގައި ދެމިތިބުމުގެ ފުރުސަތު ފަހިވެގެން ދެއެވެ. އަދި އިސްރާއީލުގެ ބޯޑަރު ކައިރީގައި ތިބޭ މީހުންނަށް ބިމަށް ބިން ބަދަލު ކުރުމުގެ ފުރުސަތު ލިބިގެން ދާނެއެވެ.
އެހެންނަމަވެސް، ހިފާފައިވާ ހުލަނގު އައްސޭރީގެ އެތެރޭގެ ސަރަހައްދު ތަކުގައި ދިރިއުޅެމުންދާ އިސްރާއީލުގެ ރައްޔިތުންނަށް މިތަންތަން ދޫކޮށް ދިއުމުގެ ފުރުސަތު ނުވަތަ ފަސްތީނުގެ ރައްޔިތުންނަށް ވުމުގެ ފުރުސަތު ލިބިގެން ދާނެއެވެ. ހަމަ އެއާއި މިއަދަދަށްވާ ފަލަސްތީނު ރައްޔިތުން (1948ވަނަ އަހަރުގައި ރެފިއުޖީންނަށްވެ، އިސްރާއީލުގެ ވަށައިގެން ދިރިއުޅެމުންދާ ފަލަސްތީމުގެ ރައްޔިތުން) ފަލަސްތީނުގެ ރައްޔިތުންގެ ގޮތުގައި އިސްރާއީލުގައި ވަަޒަންވެރި ވުމުގެ ފުރުސަތު ނުވަތަ އިސްރާއީލުގެ ދާއިމީ ރައްޔިތުންނަށް ވުމުގެ ފުރުސަތު ދެވިގެން ދާނެއެވެ.
މި ޕްލޭން އެކުލަވާލެވިފައިވަނީ، 2003 ވަނަ އަަހަރު، އިސްރާއީލާއި ފަލަސްތީނުގެ އިސް ފަރާތްތަކުން އެކުލަވާލެވި، ވަރަށް ތަފްސީލީ ޖެނީވާ އެކޯރޑް އަސްލަކަށް ބަލައިގެންނެވެ. 100 ސަފްހާގެ މައްޗަަށް އެކުލެވޭ މި ކޮންފެޑެރޭޝަން ޕްލޭންގައި، އިސްރާއީލާއި ފަސްތީނުގެ މައްސަލައިގެން އެންމެ މުހިންމު ކަންކަމަށް ހައްލު ގެންނާނޭ ގޮތުގެ ތަފްސީލުތައް ހިމަނާފައި ވެއެވެ.
އިސްރާއީލުގެ ފޮރިންގ މިނިސްޓްރީންނާއި އަދި ފަލަސްތީނުގެ އިސް ފަރާތްތަކުން މި ޕްލޭނާމެދު ކޮމެންޓު ކުރުމަށްވަނީ ދެކޮޅު ހަދާފައެވެ.
