މިއަދު ކޮމަންޑޫ ދާއިރާގެ ބައި-އިލެކްޝަންގައި އިދިކޮޅު ޕީޕީއެމްއަށް ލިބުނު ނަތީޖާއަކީ ކުރަމުންދާ މަސައްކަތަށް ގުޑުން އަރުވާލެވޭ ވަރުގެ ނަތީޖާއެއް ނޫންކަމުގައި ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.

ކޮމަންޑޫ ދާއިރާގެ ބައި އިލެކްޝަންގައި މިއަދު ލުބުނު ނާކާމިޔާބީގައި މުޅި ޕީޕީއެމް އޮތީ ރައީސް ޔާމީންގެ ފަހަތްޕުޅުގައި ވަރަށް ބަދަހި ކަމާއިއެކުގައި ކަމަށް ޣައްސާން ވިދާޅުވިއެވެ. އަދި މިއީ ޕީޕީއެމުން ކުރަމުންދާ މަސައްކަތްތަކަށް ގުޑުން އަރުވާލާވޭ ވަރުގެ ނަތީޖާއެއް ނޫންކަމަށާއި، ޕީޕީއެމްގެ ހުރިހާ މެމްބަރުން ތިބީ ރައީސް ޔާމީންގެ ފަހަތްޕުޅުގައި ވަރަށް ސާބިތުކަމާއިއެކު ރިޔާސީ އިންތިޚާބު ކާމިޔާބް ކުރުމަށް އެއް އަޒުމެއްކަމަށް ޣައްސާން ވިދާޅުވިއެވެ.

ރައީސް ޔާމީންގެ ފަހަތްޕުޅުގައި، މުޅި ޕީޕީއެމް ސާބިތުވެ މިމަޑުމޮޅި ކަމުގެ ވަގުތު ސާބިތުވެ އެބައޮތް. މަސައްކަތް ކުރާނީ އިތުރު. އަޒުމް ގުޑުވައެއް ނުލެވޭނެ.

– ޣައްސާން ވިދާޅުވިއެވެ.

މިއަދު ނިމިގެންދިޔަ އިންތިޚާބުގައި ސަރުކާރުން ވަނީ ކޮމަންޑޫ ދާއިރާގައި ފާއިތުވެދިޔަ މަހެއްހާ ސުވަހުގެ ތެރޭގައި 240 މިލިޔަނަށްވުރެ ގިނަ ރުފިޔާގެ މަޝްރޫޢު ފަށާފައެވެ. މިއީ ސީދާ މިއިންތިޚާބަށް ނުފޫޒު ފޯރުވުމަށް ކުރިއަށް ގެންދެވި މަޝްރޫޢުތަކެއްކަމަށް އިދިކޮޅު ފަރާތްތަކުން ދިޔައީ ތުހުމަތު ކުރަމުންނެވެ.

ކޮމަންޑޫ ދާއިރާގެ ކެމްޕެއިންގައި ރައީސުލްޖުމްހޫރިއްޔާވެސް ވަނީ ކޮމަންޑޫ ދާއިރާއަށް ދެ ފަހަރެއްގެ މަތީން ވަޑައިގެންފައެވެ. އަދި ވެރިކަން ކުރާ ކޯލިޝަންގައި ހިމެނޭ އެމްއާރުއެމްގެ ލީޑަރު ރައީސް މައުމޫން ފިޔަވައި ދެންތިއްބެވި ހުރިހާ ލީޑަރުންނާއި، އެމްޑީޕީގެ އިސް ގިނަ ބޭފުޅުން ވަނީ ކޮމަންޑޫ ދާއިރާއަށް ވަޑައިގެން ކެމްޕެއިންގައި ހަރަކާތްތެރިވެފައެވެ.

މިއިންތިޚާބު ކާމިޔާބް ކުރުމަށް ސަރުކާރުން ބޮޑު ހޭދައެއްކޮށްފައިވީނަމަވެސް މިއިންތިޚާބުގައި އެމްޑީޕީއަށް މާބޮޑުތަފާތެއް ދެއްކިފައި ނުވެއެވެ. މިއިންތިޚާބުގައި އެމްޑީޕީއަށް ލިބިފައިވަނީ 47 އިންސައްތަ ވޯޓެވެ.