ކޮމަންޑޫ ދާއިރާގެ ބައި އިލެކްޝަންގައި މިއަދު އެމްޑީޕީގެ ކެނޑިޑޭޓް މުހައްމަދު ރާޝިދު ހޯދި ކާމިޔާބީއަށް ރައީސުލްޖުމްހޫރިއްޔާ ތަހުނިޔާ ވިދާޅުވެއްޖެއެވެ.
މިއިންތިޚާބުގައި ރައީސުލްޖުމްހޫރިއްޔާ ވަނީ ދެ ފަހަރެއްގެ މަތީން ކެމްޕެއިނަށް ކޮމަންޑޫ ދާއިރާއަށް ވަޑައިގެންފައެވެ. ރާޝީދު މިއަދު އިންތިޚާބު ކާމިޔާބު ކުރުމާއި ގުޅިގެން ތަހުނިޔާ ވިދާޅުވެ ރައީސުލްޖުމްހޫރިއްޔާ ކުރެއްވި ޓުވީޓުގައި ވިދާޅުވީ މިކާމިޔާބީގައި ކޮމަންޑޫ ދާއިރާގެ ހުރިހާ ރައްޔިތުން ޝާމިލު ކުރާކަމަށެވެ. އަދި މިކެމްޕެއިންގައި ބައިވެރިވި އެންމެހައި ބޭފުޅުންނަށް ރައީސް ވަނީ ޝުކުރު ދައްނަވާފައެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި، ރާޝިދު މިއަދު ހޯއްދެވި ފުރިހަމަ ކާމިޔާބީއަށް މަރުޙަބާއާއި ތަހުނިޔާ އަރިސްކުރަން. އަދި ކޮމަންޑޫ ދާއިރާގެ ހުރިހާ ރައްޔިތުންނަށް މަރުޙަބާ ދަންނަވައި ކެމްޕޭނުގައި ބައިވެރިވި ހުރިހާ ބޭފުޅުންނަށް ޝުކުރު ދަންނަވަން.
– ރައީސް ވިދާޅުވިއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި، @Rashid141221 މިއަދު ހޯއްދެވި ފުރިހަމަ ކާމިޔާބީއަށް މަރުޙަބާއާއި ތަހުނިޔާ އަރިސްކުރަން. އަދި ކޮމަންޑޫ ދާއިރާގެ ހުރިހާ ރައްޔިތުންނަށް މަރުޙަބާ ދަންނަވައި ކެމްޕޭނުގައި ބައިވެރިވި ހުރިހާ ބޭފުޅުންނަށް ޝުކުރު ދަންނަވަން.
— Ibrahim Mohamed Solih (@ibusolih) February 5, 2022
ވަގުތީ ޖުމްލަ ނަތީޖާ ދައްކާ ގޮތުން ރާޝިދަށް ލިބިވަޑައިގަތީ 1401 ވޯޓެވެ. ފަތުހީއަށް ލިބިވަޑައިގަތީ 1161 ވޯޓެވެ. ވޯޓުގެ ތަފާތަކީ 240 ވޯޓެވެ.
މި އިންތިޚާބުގެ ވޯޓުލުން ކުރިަށްގެންގޮސްފައިވަނީ ދާއިރާގެ ތިން ރަށް، ކޮމަންޑޫ، މަރޮށި، ފޯކައިދޫގެ އިތުރުން މާލޭގައެވެ. ވޯޓުލުމަށްޓަކާ 7 ވޯޓު ފޮށި ބަހައްޓާފައިވެއެވެ. އެއީ މާލޭގައި 2 ފޮށި، ކޮމަންޑޫގައި 2 ފޮށި، ފޯކައިދޫގައި 2 ފޮށި، އަދި މަރޮށީގައި ފޮށްޓެކެވެ. މިއިންތިޚާބުގައި ވޯޓު ދިނުމުގެ ހައްގު 3،309 މީހުންނަށް ލިބިފައިވެއެވެ.
މި އިންތިޚާބުގައި 2932 ވަނީ ވޯޓުލާފައެވެ. މީގެތެރެއިން ސައްޙަ ވޯޓުގެ ގޮތުގައި ގުނާފައިވަނީ 2885 ވޯޓެވެ. 47 ވޯޓަކީ ބާތިލް ވޯޓެވެ. އިންތިޚާބުގައި ވޯޓު ލުމުގެ ޙައްގު ލިބިފައިވާ މީހުންގެ %88.61 މީހުންވަނީ ވޯޓު ލާފައެވެ.
ކޮމަންޑޫ ދާއިރާގެ ބައި އިލެކްޝަނެއް ބާއްވަން ޖެހުނީ، އެ ދާއިރާގެ ކުރީގެ މެންބަރު ހުސައިން ވަޙީދު އަވަހާރަވުމާއި ގުޅިގެންނެވެ. އޭރުވެސް ކޮމަންޑޫ ދާއިރާ ތަމްސީލް ކުރަމުން ދިޔައީ ސަރުކާރު ހިންގާ މައި ޕާޓީ އެމްޑީޕީއިންނެވެ.
