މާދަމާ ކޮމަންޑޫ ދާއިރާގެ ރައްޔިތުން ނިންމާ ނިންމުންވަނީ މުޅި ރާއްޖޭގެ ރައްޔިތުންގެ އުންމީދުތަކާއި ގުޅިފައިކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުއް ލަތީފް ވިދާޅުވެއްޖެއެވެ.
މާދަމާ ބާއްވާ ކޮމަންޑޫ ދާއިރާގެ ބައި-އިލެކްޝަންގެ ކެމްޕެއިން މިއަދު ހަވީރު 6 ޖަހާއިރު ނިމޭއިރު، އިންތިޙާބުގެ އެންމެފަހުގެ ކެމްޕެއިން ހަރަކާތްތަކަށް ކުރިއަށް ގެންދިއުމަށް އިންތިޚާބުގައި ވާދަކުރާ ތިން ކެނޑިޑޭޓުންގެ ކެމްޕެއިން ޓީމުތަކުން ދަނީ ތައްޔާރުވަމުންނެވެ.
ކޮމަންޑޫ ދާއިރާގެ އިންތިޚާބުގެ ނަތީޖާއަކީ ރާއްޖޭގެ ގިނަ ރައްޔިތުންގެ ސަމާލުކަން ހުއްޓިފައިވާ ނަތީޖާއަކަށްވާއިރު، މިއިންތިޚާބުގެ ނަތީޖާއަކީ ސަރުކާރަށްވެސް އަދި އިދިކޮލަށްވެސް މުހިންމު ނަތީޖާއަކަށް ވަނީ ވެފައެވެ. އިންތިޚާބުގައި މިހާތަނަށް ފެންނަ ފެނުމަށް މިއީ ނަތީޖާ ބުނެދޭނެ އުދަގޫ އެހާމެވާދަވެރި އިންތިޚާބެއްގެ ގޮތުގައި ވަނީ ފެނިގެން ގޮސްފައެވެ. ސަރުކާރުން ގިނަ ތަރައްޤީގެ މަޝްރޫޢުތަކެއް ހިންގަމުންދާއިރު، މިކަންކަމާއިއެކުވެސް އިދިކޮޅު ކެނޑިޑޭޓުންގެ ސަޕޯޓަރުންވެސް އަދި ތާއީދުކުރާ މީހުންގެ އަދަދުވެސް މަދުވާ ތަނެއް ނުފެނެއެވެ.
މިއިންތިޚާބުގައި ވާދަކުރާ ޕީޕީއެމްގެ ކެނޑިޑޭޓް ފަތުޙީއަށް ވޯޓު ދެއްވުމަށް އިލްތިމާކޮސް، ކުރީގެ މެމްބަރު ލަތީފް ކުރެއްވި ޓުވީޓުގައި ވިދާޅުވީ މާދަމާ ކޮމަންޑޫ ދާއިރާގެ ރައްޔިތުންގެ ނިންމުން ވަނީ މުޅި ރާއްޖޭގެ ރައްޔިތުންގެ އުއްމީދުތަކާ ގުޅިފައި ކަމަށެވެ. އަދި މިއަދު ރާއްޖޭގައި ހުރި ގިނަ މައްސަލަތަކަށް ރައްޔިތުން ނޫނެކޭ ބުނާކަން ހާމަކުރަން ލިބޭ ރަނގަޅު ފުރުސަތެއް ކަމަށް އޭނާ ވަނީ ބުނެފައެވެ.
މާދަމާ ކޮމަންޑޫ ދާއިރާގެ ރައްޔިތުންގެ ނިންމުން ވަނީ މުޅި ރާއްޖޭގެ ރައްޔިތުންގެ އުއްމީދުތަކާ ގުޅިފައި. އެއީ، އަޅުވެތިކަމާ، ވަތަނާއި، އިސްލާމް ދީނުގެ ހިމާޔަތާ ގުޅިފައިވާ ނިންމުމެއް. މާއްދިއްޔަތަށް ނުހެއްލި ކޮރަޕްޝަނާ ފަސާދައަށް ނޫނެކޭ ބުނަމުން ފަތުހީ އަށް ވޯޓްދެއްވާ!
– ލަތީފް ވިދާޅުވިއެވެ.
ކޮމަންޑޫ ދާއިރާގެ ވޯޓުލުން މާދަމާ ހެނދުނު 8 ޖަހާއިރު ފަށާއިރު، އިންތިޚާބުގެ ވޯޓުލުން ނިމޭނީ 4 ޖަހާއިރުގައެވެ. ނަމަވެސް ކިއުގައި މީހުން ތިބިނަމަ، ކިއުގައިތިބި މީހުން ވޯޓުލާ ނިމެންދެން އިންތިޚާބުގެ ވޯޓުލުން ކުރިއަށް ގެންދާނެއެވެ. މިއިންތިޚާބުގެ ނަތީޖާ، މާދަމާ އިރުއޮއްސި 7 ޖެހުމުގެ ކުރިން ސާފުވާނެކަމަށް ބެލެވެއެވެ.
