ވެރިކަންކުރާ ކޯލިޝަންގައި ހިމެނޭ ލީޑަރުންގެ ތެރެއިން ރައީސް ޞާލިހާއި، ނަޝީދާއި، ޤާސިމާއި، އަދި އިމްރާން ރައްޔިތުންގެ ކުރިމައްޗަށް ނިކުންނެވުމުން މިޤައުމު ގުޑާނެކަމަށް އަދާލަތު ޕާޓީގެ ރައީސް ޝައިޚު އިމްރާން ވިދާޅުވެއްޖެއެވެ.

ކޮމަންޑޫދާއިރާގެ ބައި އިލެކްޝަންގައި އިއްޔެ ފޯކައިދޫގައި ބޭއްވި ޖަލްސާގައި އިމްރާން ވަނީ ސިޔާސީ ގޮތުން ރާއްޖޭގައި އެންމެ ނުފޫޒު ގަދަ ބޭފުޅުންނަކީ މިހާރު ވެރިކަން ކުރާ ކޯލިޝަންގައި ހިމެނޭ ލީޑަރުންކަމަށް ދޭހަވާ އިބާރާތަކުން ވާހަކަ ދައްކަވާފައެވެ. އިމްރާން ވިދާޅުވީ ކޯލިޝަން ލީޑަރު ނިކުންނެވުމުން މިޤައުމު މިހާރުވެސް ގުޑާނެކަމަށެވެ.

އަޅުގަނޑަށް ޔަގީން އިރާދަކުރެއްވިއްޔާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި، ރައީސް ނަޝީދާއި، ޤާސިމް އިބްރާހިމާއި، އިމްރާނާއި، ނިކުތީމާ މިޤައުމު ގުޑާނެ. ކޮމަންޑޫ ދާއިރާ އަންނާނެ. ރާޑޯ ހޮވޭނެ. ރަޑޯ ހޮވިއްޖެ.

– އިމްރާން ވިދާޅުވިއެވެ.

މިހާރު ކުރައްވަންވީ ކަމަކީ ބޭނުންވާ އަދަދަށް ނަންބަރު މައްޗައް ޖެއްސުންކަމަށް އިމްރާން ވިދާޅުވިއެވެ. ކޯވިޑްގެ ދަތި އުދަގޫ ދުވސްތަކުގައި ރައީސް ޞާލިހު ފެށި މަސައްކަތާއިއެކު ހޯދައި ދެމުންދާ ކާމިޔާބީއަކީ މިއަދު ދިވެހި ކޮންމެ ރައްޔިތަކުވެސް ފަޚުރުވެރިވާންޖެހޭ ކަމެއްކަމަށް އިމްރާން ވިދާޅުވިއެވެ.

މިއަދު ދުނިޔޭގެ އެންމެ ކުރިއަރާ އިޤްތިޞާދުގެ ތެރޭގައި ރާއްޖެ ހިމެނޭކަމީ ރައީސްގެ އިޤްތިޞާދީ ތަސައްވަރުގެ މޮޅުކަން ހާމަވާ ކަމަމެއްކަމަށް އިމްރާން ވިދާޅުވިއެވެ.