އަންނަ ހޮނިހިރު ދުވަހު ބާއްވާ ކޮމަންޑޫ ދާއިރާގެ ބައި-އިލެކްޝަން އިދިކޮޅު ޕީޕީއެމްގެ ކެނޑިޑޭޓް މޫސާ ފަތުޙީ ބޮޑު ތަފާތަކުން ކާމިޔާބު ކުރާކަމަށް ޕީއެންސީގެ ރައީސް އަބްދުއްރަހީމްގެ ހިސާބުތަކުން ދައްކާ ކަމުގައި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.

ކޮމަންޑޫ ދައިރާގެ ކެމްޕެއިންގައި އަދުރޭ ދަނީ އެދާއިރާގައި ގިނަ މަސައްކަތްތަކެއް ކުރައްވަމުންނެވެ. އިންތިޚާބުގައި ކޮމަންޑޫ ދާއިރާގެ ތިން ރަށުގައި ޕީޕީއެމްގެ ފަރާތުން ފޯކަލް ޕޮއިންޓް ކަނޑައަޅައި އިންތިޚާބުގެ ކަންކަން ދުވަހުން ދުވަށް ދަނީ ބަލަހައްޓަމުންނެވެ.

އިންތިޚާބުގެ ވޯޓުލުމަށް 3 ދުވަހަށް ވެފައިވާއިރު، އިންތިޚާބުގެ ނަތީޖާ އަންނާނެ ގޮތަކާއިމެދު ޮއެކި ބޭފުޅުންނާއި، ޕާޓީތަކުން ގެންދަނީ ހިސާބު ޖަހަމުންނެވެ. މިހާތަނަށް ޚިޔާލް ހޯދުމުގެ ގިނަ ޕޯލްތަކުންވެސް މިއިންތިޚާބު ބޮޑު ތަފާތަކުން ކާމިޔާބު ކުރާކަމަށް ދައްކަނީ އިދިކޮޅު ޕީޕީއެމްގެ ކެނޑިޑޭޓް މޫސާ ފަތުޙީއެވެ.

ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވީ އިންތިޚާބުގައި މިހާރު ފެންނަ މަންޒަރުތަކުންނާއި، ކޮމަންޑޫ ދާއިރާގެ ރައްޔިތުން ތިބި ގޮތަށްބަލާއިރު، ޕީއެންސީގެ ރައީސް އަބްދުއްރަހީމްގެ ހިސާބުތަކުން ބޮޑު ތަނުން މިއިންތިޚާބު ކާމިޔާބު ކުރައްވަނީ ފަތުޙީކަމަށެވެ. ޝިޔާމަކީ މިއިންތިޚާބުގައި ޕީޕީއެމްގެ ފަރާތުން ފޯކައިދޫގައި އެންމެ އިސްކޮށް އިންތިޚާބުގެ ކަންކަމުގައި ހަރަކާތްތެރިވާ ބޭފުޅާއެވެ.

ޕީއެންސީގެ ރައީސް އަބްދުއްރަހީމްގެ ހިސާބުތަކުން ކޮމަންޑޫ ދާއިރާ ބޮޑުތަފާތަކުން ޕީޕީއެމްގެ ކެނޑިޑޭޓް އުޘްތާޒު މޫސާ ފަތުޙީ އެބަ ކާމިޔާބުކުރޭ.

– ޝިޔާމް ވިދާޅުވިއެވެ.

ކޮމަންޑޫ ދާއިރާގެ އިންތިޚާބު ކާމިޔާބު ކުރުމަށް ސަރުކާރު ހިންގާ މައި ޕާޓީ އެމްޑީޕީން ގިނަ މަސައްކަތްތަކެއް ދަނީ ކުރަމުންނެވެ. ޚާއްސަކޮށް ބަޖެޓުގައި ނުވެސް ނެތްކަންތައްތަކެއް، އެދާއިރާގައި ފާއިތުވެދިޔަ އެއްމަސް ދުވަހުގެ ތެރޭގައި ވަނީ ފެށިފައެވެ. އިންތިޚާބަށް ނުފޫޒު ފޯރުވުމަށް ހިންގަމުންދާ މިފަދަ ކަންކަމާއިމެދު ކަންބޮޑުވުން ފާޅުކޮށް، އިދިކޮޅުން ވަނީ މިކަން ބަލައި ދިނުމަށް ކަމާއިބެހޭ ފަރާތްތަކަށްވެސް ހުށަހަޅާފައެވެ.

ނަމަވެސް އިންތިޚާބާއި ގުޅޭ މިފަދަ ނުފޫޒުގެ މައްސަލަތަކާއި، ކޮރަޕްޝަންގެ މައްސަލަ ބަލާ އިދާރާ އޮތީ ޤާނޫނީ ހުސްކަމެއްގައެވެ.