އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގައި، އެދާއިރާއަށް ވާދަކުރާ، ވެރިކަން ކުރާ މައި ޕާޓީ އެމްޑީޕީގެ ކެނޑިޑޭޓް ރާޝިދަށް ވޯޓު ދިނުމަށް ފޯކައިދޫ ފެނަކައިގެ މުވައްޒިފުންނަށް ފެނަކައިގެ މެނޭޖިންގ ޑިރެކްޓަރ މުހައްމަދު ސައީދު އަންގައިފިއެވެ.
ކޮމަންޑޫ ދާއިރާގެ ބައި-އިލެކްޝަންގެ ކެމްޕެއިންގައި އިއްޔެ ފެނަކައިގެ އެމްޑީ ސައީދު ވަނީ، ފޯކައިދޫ ފެނަކައިގައި ވަޒީފާ އަދާކުރަމުންދާ މުވައްޒިފުންގެ ތެރެއިން އިދިކޮޅު ވިސްނުމަށް ތާއީދުކުރާ ކަމަށް ބެލެވޭ 6 މުވައްޒިފަކާއި ބައްދަލު ކުރުމަށް ބޭނުންވާކަމަށް ވިދާޅުވެފައެވެ. ސައީދު ދެންނެވި 6 ކުދިންގެ ތެރެއިން ބައްދަލުވުމަށް ގޮސްފައިވަނީ 5 މުވައްޒިފުންނެވެ.
ސައީދާއިއެކު، މިބައްދަލުވުމުގައި ރައްޔިތުންގެ މަޖިލީހުގެ މިނިވަން މުވައްސަސާތަކާއި ބެހޭ ކޮމެޓީގެ މުޤައްރިރު ރޮޒައިނާ އާދަމްއާއި، ކިނބިދޫ ދާއިރާގެ މެމްބަރު މުޙައްމަދު ނާޝިޒު ބައިވެރިވެ ވަޑައިގެންފައިވެއެވެ. މިބައްދަލުވުމުގައި ބައިވެރިވި މުވައްޒިފަކު ނަން ނުޖެހުމަށް ޝަރުތުކޮށް "ޚަބަރު އޮންލައިން" އަށް މައުލޫމާތު ދެމުން ބުނެފައިވަނީ މިބައްދަލުވުމުގައި ސައީދު ވަނީ މިއިންތިޚާބުގައި އެމްޑީޕީގެ ކެނޑިޑޭޓް ރާޝިދަށް ވޯޓު ދިނުމަށް އެމުވައްޒިފުންނަށް އަންގައިފައިކަމަށެވެ. ނަމަވެސް އެ މުވައްޒިފުންވަނީ، އެމްޑީޕީން މިއިންތިޚާބުގައި މަޖިލީހަށް ޤާބިލް ކެނޑިޑޭޓަކު އިޚްތިޔާރު ކުރުމަށް ލިބުނު ފުރުސަތުގައި އެކަމުގެ ބޭނުން ނުކުރިކަމަށް ބުނެ، އެކަމުގެ ޝަކުވާ ކޮށްފައެވެ.
މީގެ ޖަވާބުގައި ސައީދު ބުނެފައިވަނީ އެމްޑީޕީގެ ނެރެފައިވަނީ އެންމެ ޤާބިލް ކެނޑިޑޭޓަކަށް ނުވިނަމަވެސް، މިފަހަރު އޮތް ގޮތަކީ އޭނާ ގޮވައިގެން ކުރިއަށް ދިއުންކަމަށެވެ. އަދި އެމްޑީޕީގެ ކެނޑިޑޭޓް ރާޝިދު އިންތިޚާބު ކުރުމަށް ފެނަކައިގެ ފޯކައިދޫ މުވައްޒިފުންގެ އެއްބާރުލުންދީ، އޭނާއަށް ވޯޓު ދިނުމަށް އަންގާފައިވާކަމަށެވެ. ނުސީދާކޮށް، މިއިންތިޚާބުގައި އެމްޑީޕީއަށް ވޯޓު ނިދޭ މުވައްޒިފުންނަށް ވަޒީފާގެ ބިރު ދައްކާ އުސޫލުން ސައީދު ވާހަކަ ދައްކަވާފައިވާކަމަށް ޚަބަރު އޮންލައިނަށް މައުލޫމާތު ދިން މުވައްޒިފު ވަނީ ބުނެފައެވެ.
އިންތިޚާބު ތަކުގައި މުވައްޒިފުންނަށް ބިރުދައްކައި، ވަކި ސިޔާސީ ފިކުރަކަށް ވޯޓު ދިނުމަށް ބާރު އެޅުމަކީ އެމްޑީޕީން ތާއީދު ކުރާނެކަމެއް ނޫންކަމަށް މީގެ ކުރިން ތަކުރާރުކޮށް ދިޔައީ ވިދާޅުވަމުންނެވެ. އަދި އެއީ އެމްޑީޕީން ޖާގަ ދޭނެ ކަމެއްނޫންކަމަށްވެސް ވަނީ ބުނެފައެވެ. ނަމަވެސް ކޮމަންޑޫ ދާއިރާގެ މިއިންތިޚާބުގައި ސަރުކާރުގެ އެކި އިދާރާތަކުގެ އިސްވެރިންނާއި، ކުންފުނިތަކުގެ ވެރިން ކޮމަންޑޫ ދާއިރާގެ އެކި ރަށްތަކުގައި މެދު ކެނޑުމެއްނެތި އިންތިޚާބަށް ނުފޫޒު ފޯރުވާ އެތައް ކަމެއް ކުރަމުންދާކަމުގެ ޝަކުވާ ގިނަބަޔަކު ދަނީ ކުރަމުންނެވެ.
ރާޑޯއަކީ ބަލި ކުއްޖެއްގޮތަށް ދޭހަވާފަދަ އިބާރާތަކުން މިބައްދަލުވުމުގައި ވާހަކަ ދައްކަވައި ސައީދު ވިދާޅުވީ، އެނާ އިންތިޚާބު ވާންއޮތީ އެންމެންގެ އެއްބާރުލުންވެސް ިލިބިގެން ކަމަށާއި، މިކަމުގައި ފެނަކައިގެ މުވައްޒިފުންގެ އެހީތެރިކަން އިންތިހާއަށް ބޭނުންވާކަމަށް ސައީދު ވަނީ ވިދާޅުވެފައިކަމަށް މިބައްދަލުވުމުގައި އިން މުވައްޒިފަކު މައުލޫމާތު ދީފައިވެއެވެ.
މުވައްސަސާތަކުގެ މުވައްޒިފުންނަށް އިންތިޚާބީ ނުފޫޒު ފޯރުވާ ކަމުގެ މައްސަލަ ބެލުމަށް މަޖިލީހުގައި އޮތް މިނިވަން މުވައްސަސާތަކާއި ބެހޭ ކޮމެޓީގެ މުޤައްރިރުވެސް މިބައްދަލުވުމުގައި ބައިވެރިވެ ވަނީ އެމްޑީޕީގެ ކެނޑިޑޭޓަށް ވޯޓު ދިނުމަށް ދަންނަވާފައެވެ.
ކޮމަންޑޫ ދާއިރާގެ އިންތިޚާބު ކާމިޔާބު ކުރުމަށް ސަރުކާރުން ކެނޑިޑޭޅި މަސައްކަތް ކުރަމުންދާއިރު، މިއިންތިޚާބަކީ މިސަރުކާރުން މިހާތަނަށް ރާއްޖޭގެ އެއްދާއިރާއަކަށް އެއްފަހަރާ މިހާބޮޑެތި މަސައްކަތްތަކެއް ފަށައި، އެކަންކަން ކުރުމަށް މަސައްކަތް ކުރަމުންދާ ދާއިރާއަށްވެސް ވަނީ ވެފައެވެ. އިންތިޚާބަށް މަދު ދުވަސްތަކަށް ވެފައި ވަނިކޮށް އެތައް ކަމެއް ކޮމަންޑޫ ދާއިރާގެ ތިން ރަށުގައި ކުރަން ފެށުމަކީ ސީދާ އިންތިޚާބަށް ނުފޫޒު ފޯރުވުމަށް ކުރެވޭ މަސައްކަތްތަކެއްގެ ގޮތުގައި ވެރިކަން ކުރާ ކޯލިޝަންގައި ހިމެނޭ އެމްއާރުއެމުންވެސް ވަނީ ބުނެފައެވެ.
