އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި-އިލެކްޝަންގެ ވަގުތީ ނަތީޖާ މާލޭގައި އިއުލާން ކުރާ ގޮތަށް ހަމަޖައްސައިފިއެވެ.
އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގެ ވަގުތީ ނަތީޖާ އިއުލާން ކުރާ ގޮތަށް ކުރިން ހަމަޖައްސާފައިވަނީ، ކޮމަންޑޫގައެވެ. ނަމަވެސް އިލެކްޝަން ކޮމިޝަނުން ވަގުތީ ނަތީޖާ އިއުލާން ކުރުން މާލެއަށް ބަދަލުކޮށްފައިވަނީ ވަރަށް ގިނަ ކަންކަމަށް ބެލުމަށްފަހު މިހާލަތުގައި އެންމެ ރަނގަޅު ގޮތަކީ މާލޭގައި އިންތިޚާބުގެ ނަތީޖަ އިއުލާން ކުރުންކަމަސް ވާތީއެވެ.
އިލެކްޝަނުން ބުނެފައިވަނީ ކޮމިޝަނުން ކުރިން ވިސްނާފައި އޮތީ ކޮމަންޑޫގައި މިއިންތިޚާބުގެ ވަގުތީ ނަތީޖާ އިއުލާން ކުރަން ކަމުގައި ވީނަމަވެސް، މާލެއަށް ނަތީޖާ އިއުލާން ކުރުން ބަދަލުކޮށްފައިވަނީ ކޯވިޑް-19 އާއި ގުޅިގެން އެންމެ ރައްކާތެރި ގޮތަކީ އެއީ ކަމަށް ވާތީކަމުގައެވެ. އިންތިޚާބަށް ކޮމިޝަންގެ މެމްބަރުން ކޮމަންޑޫއަށް ދާން ނިންމި ނަމަވެސް މިހާރު ގައިޑްލައިން ހަމަޖެހިފައިވާ ގޮތުން ރަށްރަށަށް ދަތުރު ކުރުމުގައި ޕީސީއާރު ޓެސްޓް ހަދަންޖެހޭއިރު، ނަތީޖާ ޕޮޒިޓިވް ވެއްޖެނަމަ، މިއީވެސް އިންތިޚާބަށް ކުރިމަތިވެދާނެ ހުރަހެއްކަމަށެވެ.
މިދުވަސް ވަރަކީ ހަލުވިކަމާއިއެކު ބަލި ފެތުރެމުންދާ ދުވަސްވަރަކަށް ވުމުން، އިލެކްޝަނުން އިންތިޚާބަށް ނަގާފައިވާ އޮފިޝަލުންނާއި، މެމްބަރުން ޕޮޒިޓިވްވެއްޖެނަމަ އިންތިޚާބުގެ ކަންކަން ކުރިއަށް ގެންދިއުމަށް ގޮންޖެހުންތަކެއް ކުރިމަތިވުމަކީ އެކަށީގެންވާ ކަމަށްބަލައި، ކޮމިޝަނުން މާލޭގައި ނަތީޖާ އިއުލާން ކުރުމަކީ އެންމެ ރަނގަޅު ގޮތްކަމަށް ކޮމިޝަނުން ނިންމާފައިވާކަމަށެވެ.
ކޮމަންޑޫ ދާއިރާގެ ވޯޓު ލިބުމުގެ ހައްގު ލިބިގެންވާ މީހުންގެ ފައިނަލް ލިސްޓާއިއެކު، ވޯޓު ލެވޭނެ ފޮށިތައް އެނގޭނެހެން އާންމުކުރި ލިސްޓުގައި މާލެ ސަރަހައްދުގައި އިތިރު ވޯޓު ފޮއްޓެއް ބެހެއްޓުމަށް އިލެކްޝަނުން ވަނީ ނިންމާފައެވެ. މާލެ ސަރަހައްދަށް ފޮއްޓެއް އިތުރުވެފައިވަނީ ރީ-ރަޖިސްޓްރީ ވުމަށް ހުޅުވާލި ފުރުސަތުގައި ރަޖިސްޓްރީ ކުރި މީހުންގެ ނިސްބަތަށް ބެލުމަށް ފަހުއެވެ. މިއިންތިޚާބުގައި ޖުމްލަ 7 ފޮށި ބެހެއްޓުމަށް އިލެކްޝަނުން ވަނީ ނިންމާފައެވެ.
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓްލުމުގެ ހައްޤު ލިބިގެންވެއެވެ.
