އެމެރިކާގެ ރިޔާސީ އިންތިޚާބާއި ގުޅުވައިގެން ދޮގު މައުލޫމާތު ފެތުރުން ހުއްޓުވުމަށްޓަކާ ފޭސްބުކުން އާފިޔަވަޅުތަކެއް އިއުލާން ކޮށްފިއެވެ.
ފޭސްބުކުން ނެރެނު ބަޔާނެއްގައި ބުނެފައިވަނީ އެކުންފުނީގެ ސޯޝަލް މީޑިއާ ޕްލެޓްފޯމްތަކުގައި މުޅިން އަލަށް އެޅުމަށް ހަމަޖެހިފައިވާ މިފަޔަވަޅުތަކަކީ އެމެރިކާގެ ރިޔާސީ އިންތިޚާބާއިގުޅިގެން ރަގަޅު ނޫން މައުލޫމާތު އެކުންފުނީގެ މީޑިއާ ޕްލެޓްފޯމުތަކުގައި އިންތިހާއަށް އިތުރުވަމުންދާކަން ފާހަގަވެފައިވާތީ އެޅުމަށް ނިންމާފއިވާ ފިޔަވަޅުތަކެއް ކަމަށެވެ.
ފޭސްބުކްގެ ތަރުޖަމާނު އޭންޑީ ސްޓޯން ވިދާޅުވެފައިވަނީ އެކުންފުނީގެ ދެ މީޑިއާ ޕްލެޓްފޯމުކަމުގައިވާ ފޭސްބުކް އަދި އިންސްޓަގްރާމްގެ އޮޓޮމޭޓެޓް ސިސްޓަމްތަކުން އެސްސިސްޓަމްތަކަށް ރަގަޅު ނޫންކަމަށް ފާހަގަކުރެވޭ މައުލޫމާތު ޝާޢިއު ވިޔަނުދީ ހިފަހައްޓަމުން ދާނެއެވެ.
އޭނާ ވިދާޅުވި ގޮތުގައި ފޭސްބުކްގެ މީޑިއާ ޕްލެޓްފޯމުތަކުގެ އޮޓޮމޭޓެޑް ސިސްޓަމްތަކަށް، ޝާއިއުކުރެވޭ މައުލޫމާތަކީ ރަގަޅު ނޫން މަޢުލޫމާތެއްކަމަށް ފާހަގަ ކުރެވިއްޖެނަމަ، އެމައުލޫމާތެއް ޝާއިއު ކުރުމަށްޓަކާ އިތުރު މަރުހަލާތަކެއް ގިރާކުރަން ޖެހޭނެއެވެ. މިގޮތުން ފޭސްބުކުން އިތުރު މައުލޫމާތު ހޯދަންޖެހޭކަމަށް ފާހަގަކޮށްފައި ހުންނަ މައުލޫމާތު އެޕްލެޓްފޯމުގައި ޝެއަރކުރަން ބޭނުންވާނަމަ، އެފަރާތަކުން އެމައުލޫމާތެއް ޝެއަރ ކުރުމުގެ ކުރިން ފޭސްބުކްގެ ވޯޓިން އިންފޮމޭޝަން ސެންޓަރއަށް ވަނުމަށް މެސެޖަކުން ބުނާނެއެވެ.
އަދި މީގެ އިތުރުން ރަގަޅުނޫން މައުލޫމާތު ފެތުރުން ހުއްޓުވުމަށްޓަކާ ލައިވް ވީޑިއޯތައް ޝެއަރކުރުންވެސް މަދުކުރަމުން ދާކަންވެސް އޭނާވަނީ ހާމަކުރައްވާފައެވެ.
ފޭސްބުކުން ހާމަކޮށްފައިވާ ގޮތުގައި އެމެރިކާގެ އިންތިޚާބުގެ ވޯޓުގުނުން ކުރިޔަށްދާއިރު، އިންތިޚާބާއި ގުޅޭގޮތުން ދޮގު މައުލޫމާތު ފެތުރުން އިތުރުވަމުންދާކަމަށް ވަނީ ފާހަގަ ކުރެވިފައެވެ. މިގޮތުން މިފަދަ ހުރިހާ މައުލޫމާތެއް ގިނަފަރާތްތަކާއި ހަމައަށް ފޯރުން މަދުކުރުމަށް، ކުރިންވެސް ވާހަކަ ދެކެވިފައިވާގޮތަށް، އެކުންފުނިން މިހާރުވެސް ފިޔަވަޅު އަޅަމުންދާކަމަށް ކުންފުނީގެ ތަރުޖަމާނު ވަނީ ވިދާޅުވެފައެވެ.
ފޭސްބުކްގެ ހެޑް އޮފް ގްލޯބަލް އެފެއާޒް ނިކް ކްލެގް ކުރިން ވިދާޅުވެފައިވަނީ މިފަހަރުގެ އެމެރިކާގެ ރިޔާސީ އިންތިޚާބަށް ތައްޔާރުވުމުގެ ގޮތުން އެކުންފުނިންވަނީ ނުރަގަޅު މައުލޫތު ފެތުރުން ހުއްޓުވާނެ މުޅިން އާވަސީލަތްތަކެއް އީޖާދުކޮށް ހޯދާފައެވެ. ގަބޫލު ކުރެވޭގޮތުގައި ފޭސްބުކުން އެކުންފުނީގެ މީޑިއާ ޕްލެޓްފޯމުތަކުގައި ދޮގު މައުލޫމާތު ފެތުރުން ހުއްޓުވުމުގެ ގޮތުން މިހާރު ބޭނުން ކުރަމުންދަނީ މިގޮތުން މުޅިން އަލަށް އީޖާދު ކޮށްފައިވާ ވަސީލަތްތަކެވެ.
ފޭސްބުކުގައި އަލަށް ތައާރަފްކުރިން މިވަސީލަތްތައް ބޭނުންކުރަން ފަށާނެ ވަކިތާރީޚެއް އަދި އެކުންފުނިން އިއުލާންކޮށްފައި ނުވިނަމަވެސް، ބެލެވޭގޮތުގައި މިހަފްތާގައި ފޭސްބުކުން މިވަސީލަތްތަކުގެ ބޭނުންކުރަން ފަށާނެއެވެ.
އެމެރިކާގެ ރިޔާސީ އިންތިޚާބާއި ގުޅޭގޮތުން ފަތުރަމުންދާ އަސާސެއްނެތް މައުލޫމާތުތަކާއި އަދި ރިޔާސީ އިންތިޚާބު އޮޅުވާލާފައިވާ ކަމަށް ތުހުމަތުކޮށް ޓްރަމްޕާއި އޭނާއަށް ތާޢީދުކުރާ ފަރާތްތަކުން ކުރަމުން ގެންދާ ތުހުމަތުތަކުގެ ސަބަބުން އެމެރިކާގެ ރައްޔިތުންގެ މެދުގައިވަނީ އުދާސްތައް އުފެދިފައެވެ. އަދި ޓެކް ކުންފުނިތަކުގެ މެދުގައި މިފަދަ މައުލޫމާތުތައް ފެތެރެމުންދާ ދިއުމުގެ ކަންބޮޑުވުން އިންތިހާއަށް އުފެދިފައިވެއެވެ.
މިހަފްތާހައި ފޭސްބުކް އަދި ޓުވިޓާރއިންވަނީ އިންތިޚާބުގެ ހަގީގަތް އޮޅޭގޮތަށް ފަތުރާ މައުލޫމާތަކީ ކޮބައިކަން އިގޭނެހެން އެ ޕްލެޓްފޯމުތަކުގައި ފާޅުކޮށްފައި ހުންނަ ޚިޔާލުތައް ވަކީން ފާހަގަވާގޮތް ހަދާފައެވެ. މީގެތެރޭގައި އިންތިޚާބުގެ ނަތީޖާއާއި ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްކޮށްފައިވާ ޓުވީޓުތައް ޓުވިޓާރއިން މިހާރުވެސް ވަނީ ލޭބަލްކޮށްއެވެ.
އެހެންނަމަވެސް، މިފަދަ މައުލޫމާތު ފެތުރުން ހުއްޓުވުމަށް، ފުޅާދާއިރާއެއްގައި ވީޑީއޯއިން މައުލޫމާތު ފަތުރާ ވަސީލަތެއްކަމުގައިވާ ޔޫޓިއުބުން އަދި އެއްވެސް ފިޔަވަޅެއް އަޅާފައި ނުވާކަން ފާހަގަ ކޮށްލެވެއެވެ.
