ގިނަ ޒަމާންތަކެއްވެ ކޮމަންޑޫ ދާއިރާގައި ނުފުއްދި ހުރި މަސައްކަތްތަކެއް ފެއްޓުމަށް މިއަދު ސަރުކާރަށް މަޖުބޫރު ވެފައިވާކަމަށް މޯލްޑިވްސް ނޭޝަނަލް ޕާޓީ (އެމްއެންޕީ) އިން ބުނެފިއެވެ.
މަތިކޮމަންޑޫ-ކޮމަންޑޫ ގުޅާލުމަކީ 2010 ވަނަ އަހަރުން ފެށިގެން އެމްޑީޕީން ކޮމަންޑޫ ރައްޔިތުންނަށް ވަމުންދާ ވައުދެކެވެ. ނަމަވެސް މިހާތަނަށް މިކަން ފުއްދިފައި ނުވެއެވެ. އެމްއެންޕީން ބުނެފައިވަނި ކޮމަންޑޫ ދާއިރާއި ހުރި ވައުދުތައް މިއަދު ސަރުކާރަށް ފުއްދަން މަޖުބޫރުވަނީ އެމްއެންޕީގެ މަސައްކަތުން ކަމަށެވެ. އަދި މިއަދު ސަރުކާރަށް ވަނީ އެމްއެންޕީގެ ޕްރެޝަރާއިއެކު މިވައުދުތައް ފުއްދަން މަޖުބޫރުވެފައިކަމަށެވެ.
އެމްއެންޕީގެ ސްޓްރެޓަޖީ ކިހާމޮޅު،އެންމެ ހަނގު،އެންމެ 3 މެންބަރުން މަޖިލިހުގައި ތިބި ޕާޓީން ނިކުމެ ކޮމަންޑޫ ދާއިރާގައި ހުއްޓިފައި ހުރި ޒަމާންވެފައިހުރި ޕްރޮޖެކްޓުތަކުގެ ވައުދުތަށް ފުއްދުވުމުގެ އަމަލީ މަސައްކަތް ކުރަން ސަރުކާރަށް މަޖުބޫރުކޮށްފި #އާފިކުރާއެކުhttps://t.co/tvCsFydW2T
— MNP Komandoo Dhaaira (@MNPKomandoo) January 11, 2022
އެމްއެންޕީގެ ސްޓްރެޓަޖީ ކިހާމޮޅު، އެންމެ ހަނގު، އެންމެ 3 މެންބަރުން މަޖިލިހުގައި ތިބި ޕާޓީން ނިކުމެ ކޮމަންޑޫ ދާއިރާގައި ހުއްޓިފައި ހުރި ޒަމާންވެފައިހުރި ޕްރޮޖެކްޓުތަކުގެ ވައުދުތަށް ފުއްދުވުމުގެ އަމަލީ މަސައްކަތް ކުރަން ސަރުކާރަށް މަޖުބޫރުކޮށްފި. އެމްއެންޕީން ބުނެފައިވެއެވެ.
މިމަހުގެ 7ވަނަ ދުވަހު ކޮމަންޑޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މިސަރުކާރުން ކޮމަންޑޫ ދާއިރާއަށް ވެފައިވާ ވައުދުތައް ފުއްދަވާނެކަމަށް ވިދާޅުވެފައެވެ. ކޮމަންޑުއަށް ދިމާވެފައިވާ ބިމުގެ ޖާގައިގެ ދަތިކަން ހައްލުކުރުމަކީ މިސަރުކާރުން ވެފައިވާ ވަޢުދެއްކަން ފާހަގަކުރައްވައި އެވަޢުދު ފުއްދުމަށްޓަކައި، މިފެށޭ ހަފްތާގައި މަސައްކަތް ފަށްޓަވާނެކަމަށް ރައީސް ވިދާޅުވިއެވެ.
ކޮމަންޑުއާއި މަތި ކޮމަންޑޫ ގުޅާލުމުގެ މަސައްކަތުގެ ޕްލޭންތައް މިހާރު ހަދައި ނިމިފައިވާކަމަށާ، އެ މަސައްކަތުގެ ޢަމަލީ މަސައްކަތް ވަރަށް އަވަހަށް އެސަރަހައްދުން ފެންނަން ފަށާނެކަމަށްވެސް ރައީސްވަނީ ވިދާޅުވެފައިވެއެވެ.
މި މަޝްރޫޢުއާ ގުޅޭގޮތުން ހައުސިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ ކޮމަންޑުއާއި މަތި ކޮމަންޑޫ ގުޅާލުމުގެ މަސައްކަތުގެ ޢަމަލީ މަސައްކަތް ހުކުރު ދުވަހު ފަށްޓަވާނެކަމަށެވެ. އެގޮތުން އެ ދެރަށް ގުޅާލާނީ ލިންކަކުންކަމަށްވެސް އަކްރަމް ވިދާޅުވިއެވެ. އަކްރަމް ވިދާޅުވީ 30 ދުވަހުގެ ތެރޭގައި އެ މަސައްކަތް މުޅިން ނިންމާލެވޭނެކަމަށެވެ.
ކޮމަންޑުއާއި މަތި ކޮމަންޑޫ ގުޅާލުމުގެ މަސައްކަތަށް ޢާންމުންގެ ޚިޔާލު ހޯދުމުގެ މަސައްކަތް އެރަށު ކައުންސިލުން މިހާރު ވަނީ ފަށާފައެވެ. އެގޮތުން ގޫގުލް ފޯމްގެ ޒަރިއްޔާއިން ޢާންމުންގެ ޚިޔާލު ހޯދަމުން އަންނަކަމަށް ކޮމަނޑޫ ކައުންސިލުން ވިދާޅުވިއެވެ.
