ކޮންމެ ސަރުކާރަކުންވެސް ވެރިކަމަށް އަންނަނީ ތަރައްގީގެ ގިނަ ވައުދު ތަކާއެކީއެވެ. އެއީ މެނިފެސްޓޯގައި ހިމަނައިގެން، އެވައުދުތައް ރައްޔިތުންނަށް ވިއްކައިގެން ރައްޔިތުންގެ ތާއީދު ވޯޓުން ހޯދައިގެންނެވެ.
އެއަށްފަހު، ވެރިކަމާ ހަވާލު ވުމަށްފަހު، ވައުދު ފުއްދުމުގެ މަސައްކަތްތަކާ ސަރުކާރުތަކުން ކުރިމަތިލައެއެވެ. މިގޮތުން ކުރެވޭ އެންމެ މުހިންމު މަސައްކަތަކަށް ވެގެން ދަނީ، ވާ ވައުދުތައް ފުއްދުމުގެ ތެރެއިން، އެ ސަރުކާރެއްގެ ދައުރުގައި، ގައުމުގައި އިންވެސްޓް ކުރާނޭ ބޭރުގެ އިންވެސްޓަރުން ހޯދުމު މަސައްކަތެވެ. މި މަސައްކަތްތަކުގެ ތެރެއިން ހޯދާ އިންވެސްޓަރުންނަށް ގައުމުގެ ބިންތަކާއި، ފަޅު ރަށްތަކާއި، އަދި އެއަރޕޯޓުތަކާއި، އަދި އެނޫނަސް ހުރިއްޔާ ހުރި ހަރު މުދަލެއް، ތަރައްގީގެ ނަމުގައި ދިނުން ވެގެން ގޮސްފައި މިވަނީ އާންމު ކަމަކަށެވެ.
އެއް ސަރުކާރުން ދެނީއެއްވެ. ދެން އަންނަ ސަރުކާރަކުން އެބަޔަކު ބޭނުންވާ ބަދަލުތައް ޕްރޮޖެކްޓަށް، ނުވަތަ އެއްބަސް ވުމަށް ނުގެނެވުނީމާ އެއްބަސްވުން ބާތިލް ކޮށްލަނީއެވެ. ޖެހިގެން އަންނަ ސަރުކާރަކުން، ބާތިލް ކުރި އެއްބަސްވުމުގެ ބަދަލުގެ ނަމުގައި އޮޑިޓް ކުރުމަކާވެސް ނުލާ ދައުލަތުން މާލިއްޔަތުން ބަދަލު ދެނީއެވެ. ނުވަތަ ބާތިލް ކުރި އެއްބަސްވުމުގެ ދަށުން ބަދަލުން ދޭން ޖެހިދާނެ ކަމުގައި ބިރު ހުއްޖަތަކަށް ދައްކާ، ދައުލަތަށް ގެއްލުންވާ ގޮތަށް އެއްބަސްވުންތައް އަލުން ރުޖޫޢަ ކޮށްލަނީއެވެ.
އެހާތަނުން، ދެން ފެންނާން އޮންނަނީ، ކުރީ ސަރުކާރުގައި އެންމެ ފުރަތަމަ ގޯސް ހެދި މީހުން ޖެހިގެން އަންނަ ސަރުކާރުގައި ހަމަ އެގޯސް ތަކުރާރު ކުރާ ފަރާތްތަކަށް ފާޑުކިޔާން ފަށާތަނެވެ. އެކަކު އަނެކަކުގެ ބޮލަށް ކަޑާލުމާއި، ހަދާ ގޯސް ދިފާއު ކުރުމަށްޓަކާ އާރބިޓްރޭޝަނާއި، ބަދަލު ދޭން ޖެހޭނެކަމުގެ ބިރު ދައްކާ އެއީ ހުއްޖަތަކަށް ހަދާ ތަނެވެ.
އެއް ވެރިކަމަކަށްފަހު އަނެއް ވެރިކަމެއް ފާއިތުވެގެން ދިޔަޔަސް ތަކުރާރުވަމުންދަނީ ހަމަ އެއް ސިލްސިލާއެވެ.
ޓާޓާ ކުންފުނީގެ އެނބުރި އައުން!
ފެންނަ ފެނުމަށް ބަލާއިރު، ބޭރުގެ އިންވެސްޓަރުން ރާއްޖޭގައި އިންވެސްޓު ކުރަމުންދަނީ ހިންގާ ޕްރޮޖެކްޓްތަކަށްވުރެ ބޮޑަށް، އޭރަކު އޮންނަ ސަރުކާރަކާއި، ވެރިކަން ކުރަމުންދާ މީހުންނަށް ބަރޯސާ ކޮށްފައެވެ. ސަބަބަކީ، އަބަދުވެސް އޮންނަ ސަރުކާރަކުން ހިމާޔަތް ކުރަމުންދާ ތަން ފެންނަމުންދަނީ، އިންވެސްޓަރުން ހިންގާ ޕްރޮޖެކްޓު ތަކުގެ ބަދަލުގައި، ޕްރޮޖެކްޓް ހިންގާ ކުންފުނިތައް ކަމަށް ވާތީއެވެ.
މިގޮތުން، ރާއްޖޭގައި އިންވެސްޓް ކުރާ ކުންފުނިތަކުގެ މައްޗަށް އޭރަކު އޮންނަ ސަރުކާރެއްގެ ވެރީންގެ ހިތްތަކުގައި ޖެހޭ ލޯތްބާއި ކުލުނުގެ ހަގީގަތަކީ އޭގެ ފުނަށް ވާސިލްވުމުގެ ބޭނުމެއްވެސް ނެތް، މާ ސާފުކޮށް އެކަންކަމުގެ ހަގީގަތް ފެންނާން އޮތް ކަންކަން ކަމުގައި ދަންނަވާން ޖެހެއެވެ. މި ކުލުނާއި ލޯބީގެ ހަގީގަތަކީ އެންމެވެސް ދަންނަ ބޮޑު ސިއްރެއްގޮތުގައި އޮތް ކަމަކަށް ވާތީއެވެ.
މީގެ އެންމެ ސާފު ހެއްކެއްގެ ގޮތުގައި ފެންނާން އޮތީ އިންޑިއާގެ ޖީއެމްއާރެވެ. އެކުންފުނި އަލުން ރާއްޖެ އަތުވެދާނެހެން ހީވާ ކަހަލައެވެ. އެކުންފުނިން ރާއްޖޭގައި ކުރިން ކުރި އިންވެސްޓްމަންޓް ރޫޅާލާ، ބަދަލުވެސް ދީ، އެ ވިޔަފާރީގެ މުޢާމަތަށް ނިމުންއައިތާ އެތައް އަހަރެއް ވެގެން ދިޔަ ނަމަވެސް، އަދިވެސް ކުރީގެ ރައީސް ނަޝީދު ދައްކަވަމުން ގެންދަވަނީ އެ ކުންފުނީގެ ގާބިލްކަމާއި އެކުންފުންޏާއިއެކު ވެވުުނު އެއްބަސްވުމުގެ ފުރިހަމަ ކަމުގެ ވާހަކައެވެ.
ހަމަ އެބީދައިން މީގެ 11 އަހަރު ކުރިން، އެމްޑީޕީގެ ވެރިކަމުގައި ރާއްޖޭގައި އިންވެސްޓު ކުރުމަށް އައި އިންޑިއާގެ ޓާޓާ ކުންފުނިން، 10 އަހަރުވަންދެން ދަނޑިވަޅަށް ބަލަން އޮތުމަށްފަހު، މިއަދު މިވަނީ އެބުރި އައިސްފައެވެ. ހަމަ އޭރުގެ އިންވެސްޓްމަންޓް އަސާސަކަށް ބަލާ، އެއަށްވުރެވެސް ފައިދާ ބޮޑުކޮށް ރާއްޖޭގައި އިންވެސްޓު ކުރާށެވެ.
މި ކުންފުންޏަށް ބޯހިޔާވަހިކަމުގެ ބޮޑު މަޝްރޫއެއް 2010 ގައި ހަވާލުކޮށްގެން އެ ކުންފުންޏަށް ނިންމުނީ އެންމެ 288 ފްލެޓެވެ. ޖުމްލަ 555 ޔުނިޓް އެޅުމަށް އޭރު ހަވާލު ކުރެވުނު މި މަޝްރޫޢުގެ ބާކީހުރި ފްލެޓްތަކުގެ މައްސަކަތް ނިންމާފައެއް ނުވެއެވެ. އަދި އެއްބަސްވުމާއި އެއްގޮތަށް މަސައްކަތް ނިންމާ ނުލައިގެން އެކުންފުނިން ދިވެހި ސަރުކާރައް އެތައް މިލިއަން ރުފިޔާއެއްގެ ޖޫރިމަނާއެއް ދައްކަން ޖެހިފައި އޮތްކަން އެގެން އޮތް އިރުވެސް، ސަރުކާރުގެ ވެރިން، މި ކުންފުންޏާއެކު އެގްރީމަންޓް އަލުން ހަދާ، މާލޭގެ އެންމެ ޕްރައިމް ލޮކޭޝަނުން ދެބިމާއި، އަދި ވިޔަފާރި ކުރުމަށްޓަކާ ރިސޯޓެއް ތަރައްގީ ކުރުމަށް ރަށެއް މި ކުންފުންޏަށް ދޭން ދައްކާ ހުއްޖަތަކީ، ބަދަލް ދޭން ޖެހިދާނެކަމުގެ ބިރެވެ.
ޓާޓާ ކުންފުނިން އެންމެ ފުރަތަމަ ރާއްޖެ އައީވެސް އެމްޑީޕީގެ ވެރިކަމުގައެވެ. އޭގެ ފަހުން ކޯލިޝަނެއްގެ ތެރެއިން ހަމަ އެޕާޓީއަށް އަލުން ވެރިކަމަށް އާދެވުމުން، ޓާޓާ ކުންފުނިން އެބުރި ރުޖޫޢަވީއިރު، ރުޖޫޢަމިވީ އިހުނަށްވުރެ ބޮޑު ފައިދާއެއް ހަމަ އެޕްރޮޖެކްޓު އަލުން ހިންގައިގެން ޕްރޮޖެކްޓުން ނެގޭނޭ އުސޫލުތައް ގާއިމް ކޮށްގެންނެވެ. ސަބަބަކީ ރައީސް ޔާމިންގެ ސަރުކާރުގައި އެގްރީމެންޓަށް ގެނެވުނު ބަދަލުތަކުގެ ދަށުން، އޭރުގެ ސިޔާސަތުތަކާއި އެއްގޮތަށް، މާލޭގައި ހައުސިން ޔުނިޓްތައް އެޅުމުގެ ބަދަލުގައި ހުޅުމާލޭގައި 500 ހައުސިންގ ޔުނިޓް އަޅަން ފުުސަތުދީ، އެގްރީމަންޓަށް އޭރު ބަދަލު ގެނެވިފައިވި ނަމަވެސް، މިހާރު އަލުން އެކުލަވާލެވުނު އެއްބަސްވުމުގެ ދަށުން، މާލޭގެ އެންމެ ޕްރައިމް ލޮކޭޝަންގައި ހުރި ދެ ބިމެއް ފްލެޓް އެޅުމަށް އެކުންފުންޏަށް ދޫކުރުމަށް އަލުން ނިންމާފައިވާ ވުމެވެ.
ކޮންމެ ސަރުކާރެއްގެ ވެސް ހުއްޖަތަކީ ބަދަލު ދޭން ޖެހިދާނެ ކަމުގެ ބިރު!
އިންޑިއާގެ ޓާޓާ ކުންފުންނާއިއެކު ހަދާފައިވާ އެއްބަސްވުމާމެދު އުފެދޭ ޚިލާފްތަކުގެ މައްސަލަ ހައްލުކުރުމަށް އިންޑިއާގެ މުމްބާއީގެ އާބިޓްރޭޝަން ސެންޓަރަށް ހުށަހަޅައި އެ ގައުމުގެ ހައި ކޯޓުގެ ރިޓަޔަޑް ފަނޑިޔާރެއްގެ ކުރިމަތީގައި އެމައްސަލަ ހައްލުކުރުމަށް އެއްބަސް ވުމުގައި ހިމަނާ، އެ އެއްބަސްވުމަށް ގާނޫނި ސައްހަކަންދީ އެއްބަސްވުމުގައި ސޮއިކުރި އޭރުގެ ސަރުކާރުގެ ވެރިންވެސް އެބަ ތިއްބެވިއެވެ.
މިގޮތުން، އާބިޓްރޭޝަންގެ މައްސަލަތަކަކީ، ތިންވަނަ ފަރާތެއް މެދުވެރިވެގެން، ދައުލަތްތައް ތަމްސީލުކުރެވިގެން ކުރިޔަށްދާ ގާނޫނީ މަރުހަލާއަކަށް ވާއިރު، އާރބިޓްރޭޝަންގެ މަރުހަލާގައި، އެއްބަސްވުމުގައި ހިމެނޭ ދެފަރާތުންކުރެ އެއްފަރާތެއްގެ މަސްލަހަތު އޭގައި އޮތުމަށް ފުރުސަތު ލިބިދެވޭ އުސޫލުން އެއްބަސްވުން އެކުލަވާލާ އެއްބަސްވުމުގައި ސޮއި އެޅުމަކީވެސް ކޮންމެވެސް ބައެއްގެ އިހުމާލެކެވެ. ސަބަބަކީ ދިވެހި ސަރުކާރަށް ފައިދާ ނުވާ އުސޫލަކުން، ނުވަތަ ހަމަހަމަ ނޫން އުސޫލަކުން ސަރުކާރާ ދައުލަތުގެ ވެރީންނަށް ހިތުހުރި ގޮތަކަށް އެއްބަސްވުންތައް އެކުލަވާލާ ސޮއި ކުރުމުގެ ފުރުސަތު ނޯންނާނެތީއެވެ.
މި ސަރުކާރު ވެރިކަމަށް އައުމަށްފަހު ފުރަތަމަ އަހަރުގެ ތެރޭގައި ނޫ މަޑިއަށް ބަދަލުގެ ގޮތުގައި އެއް ބިލިއަން ރުފިޔާ ދީފައި ވެއެވެ. އެ ބަދަލު ދީފައިވަނީ، އޮޑިޓަކާވެސް ނުލާ، ކުޑަ ސެޓްްލްމަޓް ކޮމިޓީއެއް ހަދާލައިގެންނެވެ. ސަރުކާރުން ބަދަލު ދޭގޮތް އޮޑިޓް ކުރުމަށް، އޮޑިޓަރުން ފަހުން އައިއިރު، ސެޓްލްމަޓް ކޮމިޓީވެސް އޮތީ އުވާލާފައެވެ.
ފެންނާން އޮތް ހަގީގަތަކީ، ކޮންމެ ސަރުކާރަކުންވެސް ބޭރުގެ އިންވެސްޓަރުން ރާއްޖެ ގެނެސްގެން، ފަހުން ޕްރޮޖެކްޓު ނުހިންގި، އޮޅުންބޮޅުންވެ، އަލުން އަސްލަށް ރުޖޫޢަވެ، ވަކިބަޔަކަށް ފަައިދަވާގޮތަށް، ޕްރޮޖެކްޓްތައް އަލުން ހިންގުމަށް ދައްކާ ހުއްޖަތަކީ ބަދަލު ދޭން ޖެހިދާނެ ކަމުގެ ހުއްޖަތަށް ވެގެން ދާތަނެވެ. އެކަމުގެ ބިރެވެ. އާރބިޓްރޭޝަނަށް ގޮސްފި ނަމަ ދައުލަތަށް ގެއްލުން ލިބޭނޭ ކަމުގެ ހުއްޖަތެެވެ. އެހެންނަމަވެސް، މި ހުއްޖަތުގެ މައްޗަށް، ބޭރުގެ އިންވެސްޓަރުންނަށް ފައިދާވާ ގޮތަށް، ދައުލަތަށް، ގެއްލުންވާ ގޮތަށް އެއްބަސްވުންތަކަށް އަބުރާ ރުޖޫޢަވާން ސަރުކާރުގެ ވެރިން ނިންމަވާ ނިންމުންތަކުގެ ދެފުށް އެހާ ސާފުކޮށް ފެންނާކަށް ނެތެވެ. މި ހުއްޖަތާއި ހަމައަށް ރުޖޫޢަވާން ހެދި އޮޑިޓެއް، ނުވަތަ މިނިވަން ގާނޫނީ ފާމެއްގެ ލަފައެއް އާންމުކޮށް ފެންނާކަށް ނޯވެއެވެ.
ދައްކާ ހުއްޖަތަކީ ބަދަލު ދޭންޖިދާނެ ކަމުގެ ހުއްޖަތެވެ. ހުއްޖަތަކީ އަބަދުވެސް ކުރީ ސަރުކާރުން ހަދާފައިއޮންނަ ގޯހެވެ. ފެންނާން އޮންނަނީވެސް ސަރުކާރުގެ ގާނޫނީ ލަފާ އެކަންޏެވެ. އެގާނުނީ ލަފާވެސް، ހުރިހާ ވިސްނުމެއްވެސް ބިނާވެފައި އޮންނަނީ، އަލުން އެއްބަސްވުން އާކުރުމަށް އެދިއެދި އޮންނަ އިންވެސްޓަރަށް ފައިދާ ވާގޮތަށެވެ. ދައުލަތުގެ ދިފާއެއް ނޯވެއެވެ. މިއީ އަޖައިބުން ފުރިގެންވާ އަރަތަކަށް ނުވޭތޯއެވެ.
