އިދިކޮޅު ޕްރޮގްރެސިވް ކޯލިޝަންގެ ލީޑަރޝިޕްގެ އިސްބޭފުޅުން ކޮމަންޑޫ ދާއިރާއަށް ކެމްޕެއިން ވަޑައިގެންފިއެވެ.
މިއަދު ހަވީރު ކޮމަންޑޫއަށް ވަޑައިގެންނެވި އިދިކޮޅު ޓީމުގައި އިސްކޮށް ހުންނެވީ ޕީއެންސީގެ ރައީސް އަބްދުއްރަހީމް އަބްދުﷲއެވެ. އެދުރޭގެ އިތުރުން، ޕީޕީއެމްގެ ޕީއެންސީގެ ލީޑަރޝިޕްގެ ގިނަ ބޭފުޅުންވަނީ މިދަތުރުގައި ބައިވެރިވެފައެވެ.
އިދިކޮޅު ކޯލިޑަރޝިޕް ކޮމަންޑޫއަށް ދިއުމުން އެރަށުން ވަނީ ވަރަށް ހޫނު މަރުހަބާއެއް ދަންނަވާފައެވެ. އަދި ކެމްޕެއިން ޓީމުތައް މާދަމާ ދައިރާގެ ތިން ރަށަށް ދިއުމަށް ވަނީ ހަމަޖެހިފައެވެ. ކޮމަންޑޫ ދައިރާއަށް ޕީޕީއެމްގެ ލީޑަރޝީޕްގެ ގިނަ ބޭފުޅުން ވަޑައިގެންނެވިއިރު، އިދިކޮޅު ލީޑަރު ރައީސް ޔާމީން ހުކުރު ދުވަހު ކޮމަންޑޫ ދާއިރާއަށް ވަޑައިގަތުމަށް ވަނީ ހަމަޖެހިފައެވެ.
ކޮމަންޑޫ ދާއިރާއަށް އެމްޑީޕީންނާއި ޕީޕީއެމްގެ އިތުރުން އެމްއެންޕީން ވަނީ ކެނޑިޑޭޓުން ނެރެފައެވެ. އެމްޑީޕީން ވާދަކުރަނީ މުޙައްމަދު ރާޝިދެވެ. ޕީޕީއެމުން ނެރެފައިވަނީ މޫސާ ފަތުހީ އާދަމްއެވެ. އެމްއެންޕީގެ ކެނޑިޑޭޓަކީ އަބްދުލް ހަންނާން އިދުރީސްއެވެ.
ކޮމަންޑޫ ދާއިރާގެ ގޮނޑީގެ ވާދަވެރިކަން ބޮޑުވެފައިވާއިރު ކުރިން އެ ދާއިރާ ތަމްސީލުކުރެއްވި ޙުސެއިން ވަހީދު އެ ގޮނޑި ކާމިޔާބުކުރެއްވީ 332 ވޯޓްގެ ތަފާތަކުންނެވެ. އެފަހަރު އޭނާއާއި އެންމެ ވާދަކުރީ ޕީއެންސީގެ ކެންޑިޑޭޓް އިބްރާހިމް ރަޝީދެވެ.
އަންނަ ފެބްރުއަރީ މަހުގެ 5 ވަނަދުވަހު އޮންނަ ބައި އިލެކްޝަންގައި 6 ވޯޓް ފޮއްޓެއް ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފައެވެ. މި ފޮށިތަކުގެ ތެރެއިން މާލޭގައި އުޅޭ އެ ދާއިރާގެ ރައްޔިތުން ވޯޓްލާން ޖެހޭ ފޮށި ހުންނާނީ އިންތިހާބާއި ބެހޭ މަރުކަޒު ބާ ޖަމާލުއްދީނުގައެވެ. ކޮމަންޑޫއާއި ފޯކައިދޫ އަދި މަރޮށި ހިމެނޭ މި ދާއިރާގައި 3316 މީހުންނަށް ވޯޓްލުމުގެ ހައްޤު ލިބިގެންވެއެވެ.
