ނައިޓް މާކެޓަށްފަހުު ކުނިތަކުން ގޮނޑަކަށް ވެފައި އޮތް ރަސްފަންނު ސަރަހައްދު މާލެ ސިޓީ ކައުންސިލުން ސާފުކޮށްފިއެވެ.
ރަސްފަންނު ސަރަހައްދުގައި ނައިޓް މާކެޓް ކުރިއަށް ގެންދަން ދެފަހަރަކު ހުއްދަ ދިނުމަށްފަހު މާގިޮނަ އިރުތަކެއް ނުވެ އެ ނިންމުން އެޗްޕީއޭއިން ބަދަލުކުރިއެވެ. މިއާއެކު ވިޔަފާރިވެރިންގެ ފާޑުކިޔުމާއި ނުރުހުން އެޗްޕީއޭއަށް އަމާޒުވިއެވެ.
ސިޓީ ކައުންސިލުން ބުނީ ނައިޓް މާކެޓް އިންތިާޒްކުރި ފަރާތުގައި އެތަން ސާފުކުރަން އެންގުމުންވެސް އެކަން ކޮށްފައިނުވާކަމަށެވެ. އެހެންކަމުން އާންމުންނަށް ދަތިވާތީ އެންމެފަހުން ސިޓީ ކައުންސިލުން ނުކުމެ އެތަން ސާފުކުރީއެވެ.
މާލެ ސިޓީ ކައުންސިލުން ބުނީ ބުނީ ނައިޓް މާކެޓް ބާއްވަން ހަވާލުކުރި ފަރާތުން އެތަން ސާފުކުރަން މިއަދު މެންދުރު ފަހު 1:30 އާ ހަމައަށް ވަގުތު ދިންކަމަށެވެ. ނަމަވެސް އެވަގުތު ހަމަވިއިރުވެސް އެފަރާތުން އެތަން ސާފުކޮށްފައި ނުވާކަމަށް ސިޓީ ކައުންސިލުން ބުންޏެވެ.
ރަސްފަންނު ސަރަޙައްދުގައި ހުރި ކުނިތައް މާލެ ސިޓީ ކައުންސިލުން ސާފުކުރުން pic.twitter.com/Hnc113lL72
— Male' City Council (@MaleCitymv) January 10, 2022
އެޗްޕީއޭއިން ނެރުނު ބަޔާނެއްގައި ބުނެފައިވަނީ ކޮވިޑްގެ ޙާލަތު މާލެ ސަރަހައްދުގައި ގޯސްވަމުންދާތީ، މާލެ ސަރަހައްދުގައި މަގުމަތީ ބާޒާރުތަކާއި، ގިނަ މީހުން އެއްވާ އިވެންޓްތަކާއި ހަފްލާތައް ނުބޭއްވުމަށް، 5 ޖެނުއަރީ 2022 ގައި މާލެ ސިޓީ ކައުންސިލްއަށް އަންގާފައިވާކަމަށެވެ. އެހެންނަމަވެސް 6 ޖެނުއަރީއިން ފެށިގެން ނައިޓް މާރކެޓް ހިންގުމަށް ހަވާލުކޮށްފައިވާ ފަރާތުން އެކަމަށް ތައްޔާރުވުމަށް އަނބުރާ ނުލިބޭނެ ވަރަށްގިނަ ޚަރަދުތަކެއް ކޮށްފައިވާތީ، ފިހާރަތައް ހިންގަން އެޗްޕީއޭއިން ކަނޑައަޅާފައިވާ އުސޫލާ އެއްގޮތަށް، ވިޔަފާރި ކުރުމަށް ކަނޑައަޅާ ތަންތަން ދުރު ދުރުގައި ހުންނަގޮތަށް އަދި މީހުން ތޮއް ނުޖެހޭނެހެން ކުރިއަށް ގެންދިއުމަށް 6 ޖެނުއަރީ 2022 ގައި ހުއްދަ ދެވިފައިވާނެ ކަމަށެވެ.
އެހެން ނަމަވެސް މިއަދު (7 ޖެނުއަރީ 2022) އެޗްޕީއޭއިން ކުރި އިންސްޕެކްޝަންގައި ރަސްފަންނުގައި މިކަން ކުރިއަށްދަނީ މަގުމަތީ ބާޒާރެއްގޮތަށް، އަދި މީހުން ތޮއްޖެހި ގައިދުރުކުރުމާއި މާސްކް އެޅުމަށް ސަމާލުކަންދީގެން ކަމަށް ނުވާތީ، އެބާޒާރު ކުރިއަށް ނުގެންދިއުމަށް ސިޓީ ކައުންސިލަށް މިއަދު އަންގާފައިވާކަމަށެވެ.
އެޗްޕީއޭގެ ނިންމުންތައް އެއްވެސް އުސޫލެއްނެތި ސައުވީސް ގަޑިއިރު ނުވަނީސް އެކި ގޮތަށް ބަދަލުވާތީ ގިނަ ބައެއްގެ ފާޑުކިޔުންވަނީ އެޗްޕީއޭއަށް އަމާޒުވެފައެވެ. ޚާއްސަކޮށް ސިޔާސީ ކަންކަމުގައި އެޗްޕީއޭއިން ގެންގުޅެމުންދާ އުސޫލުތަކަށް ގިނަބައެއްގެ ފާޑުކިޔުން ވަނީ އަމާޒުވެފައެވެ.
ކޯވިޑާ ގުޅިގެން ދޮޅު އަހަރެއްހާ ދުވަހު ނައިޓް މާކެޓްތައް ބޭއްވުން ހުއްޓުމަކަށް އައުމަށްފަހު، ދާދިފަހުން ވަނީ ޖެހިޖެހިގެން ހަތަރު ނައިޓް މާކެޓް މާލެ ސިޓީގައި ބާއްވާފައެވެ. އެގޮތުން ހުޅުމާލެ ރުށްގަނޑު ސަރަހައްދުގައި ދެ ނައިޓް މާކެޓަކާއި ދަރުބާރުގޭގެ އިރުމަތީގައި އޮންނަ ހުސް ބިމުގައާއި ރަސްފަންނު ސަރަޙައްދުގައިވެސްވަނީ ނައިޓް މަރކެޓެއް ބާއްވާފައެވެ.
