ކޮމަންޑޫ ދާއިރާގެ ބައި-އިލެކްޝަންސްތަކުގެ ކެމްޕޭން ޙަރަކާތްތައް އިންތިޚާބުތަކާބެހޭ ޤާނޫނުތަކާއި ޤަވާޢިދުގެ ތެރެއިން، ސުލޫކީ މިންގަނޑާ ޚިލާފު ނުވާ ގޮތުގެމަތިން ކުރިއަށް ގެންދިއުމަށް އިލެކްޝަންސް ކޮމިޝަނުން އިލްތިމާސްކޮށްފިއެވެ.
އިލެކްޝަންސް ކޮމިޝަނުން ބުނީ އަންނަ މަހުގެ 5ގައި ބޭއްވުމަށް ހަމަޖެހިފައިވާ އިންތިޚާބުގެ ކެމްޕޭނު ޙަރަކާތްތައް ހިންގުމުގައި އެއްވެސް ސިޔާސީ ޕާޓީއަކުން ނުވަތަ އެއްވެސް ކެންޑިޑޭޓެއް ތަމްސީލުކުރާ ފަރާތަކުން އަނެއް ކެންޑިޑޭޓުގެ އިންތިޚާބީ ޙައްގަކަށް އުނިކަން އަތުވެދާނެ އެއްވެސް ކަމެއް ކުރުމަކީ މަނާ ކަމެއްކަމަށެވެ.
އީސީން ވަނީ މިފަހަކަށް އައިސް ކެމްޕޭނު ޙަރަކާތައް ހިންގުމުގައި އިންތިޚާބަށް ނުރަނގަޅު ނުފޫޒު ފޯރަފާނެ ފަދަ ކަންކަން ކުރަމުންދާ ކަމުގެ ޝަކުވާ އިލެކްޝަންސް ކޮމިޝަނަށް ނުރަސްމީކޮށް ލިބެމުންދާކަމަށް ބުނެފައެވެ.
ކޮންމެ އިންތިޚާބަކާ ގުޅިގެން ޝަކުވާ ހުށަހެޅޭނެ ނިޒާމެއް ޤާއިމުކުރެވެމުން ދާކަމަށާއި، އެގޮތުން ފެބްރުއަރީ 05 ގައި ބޭއްވުމަށް ހަމަޖެހިފައިވާ ބައި-އިލެކްޝަންސްތަކާ
މިގެންވެސް ޝަކުވާ ހުށަހަޅާނެ ނިޒާމެއް ޤާއިމުކޮށް، 2021 ޑިސެންބަރ 16 ވަނަ ދުވަހު ވަނީ އިއުލާނު ކުރެވިފައިވާކަމަށް އީސީން ބުންޏެވެ.
ކެމްޕޭން ޙަރަކާތްތައް ހިންގުމުގައި އެއްވެސް ކެންޑިޑޭޓެއްގެ އިންތިޚާބީ ޙައްޤަކަށް އުނިކަން އަތުވެދާނެ ކަމެއް ނުކުރުމަށް އިލެކްޝަންސް ކޮމިޝަނުން ހުރިހާ ސިޔާސީ ޕާޓީތަކަށާއި ހުރިހާ ކެންޑިޑޭޓުންނަށާއި ކެންޑިޑޭޓުންނަށް ތާއީދުކުރާ ފަރާތްތަކަށް އަންގަމެވެ. ވީމާ، އިސްވެދެންނެވުނު ކަންކަމާ ގުޅިގެން އެއްވެސް ޝަކުވާއެއް އޮތްނަމަ، އެކަމަށް ކަނޑައެޅިފައިވާ ފޯމުން އިލެކްޝަންސް ކޮމިޝަނަށް ހުށަހެޅެއްވުން އެދެމެވެ.
– އިލެކްޝަންސް ކޮމިޝަން
އީސީން މިހެން އިލްތިމާސްކޮށްފައިވާއިރު، އަންނަ މަހު ޞާއްވާ ބައި އިލެކްޝަންގެ ކެމްޕެއިން ދަނީ ވަރަށް ވާދަވެރިކޮށް ފޯރިއާއެކުއެވެ. އެގޮތުން ތިން ޕާޓީން އެ ދާއިރާއަށް ވާދަކުރެއެވެ. އެއީ ވެރިކަންކުރާ މައި ޕާޓީ އެމްޑީޕީއާއި، އިދިކޮޅު ޕީޕީއެމްއާއި ދާދިފަހުން އުފެދުނު އެމްއެންޕީންނެވެ.
