އަތޮޅުތެރޭގެ ރަށްތަކަށް ތަރައްޤީ ގެނައުމަކީ އިދިކޮޅު ފަރާތްތަކުގެ ވިސްނުމެއް ނޫންކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް މަޖިލިސް ބައި އިލެކްޝަންގައި އެދާއިރާއަށް އެމްޑީޕީ ޓިކެޓްގައި ވާދަކުރާ ކެނޑިޑޭޓް ރާޝިދަށް ތާއީދު ކުރެއްވުމަށްއެދި ނަޝީދު ކުރެއްވި ޓުވީޓެއްގައި ވިދާޅުވީ އިދިކޮޅު ފަރާތްތަކަކީ އަތޮޅުތެރޭގެ ތަރައްޤީއަށް މާބޮޑު ވިސްނުމެއް އޮތް ބައެއް ނޫންކަމަށެވެ.
އިދިކޮޅު ފަރާތްތަކުގެ ވިސްނުމަކީ މާލެ ސަރަހައްދަށް މީހުން ޖަމާކޮށް، މާލެ ސަރަހައްދު ތަރައްޤީ ކުރުންކަމަށެވެ. އަދި ރަށްރަށުގެ ތަރައްޤީއަކީ އިދިކޮޅު ފަރާތްތަށް މުހިންމު އެއްޗެއް ނޫންކަމަށާއި، އެމްޑީޕީން ގެންގުޅޭ ރަށްތަކުގެ ތަރައްޤީއާއި އެއްގޮތަށް މިފަހަރުގެ އިންތިޚާބުގައިވެސް އެމްޑީޕީއަށް ވޯޓު ދިނުމަށް ނަޝީދު ވަނީ އެދިވަޑައިގެންފައެވެ.
އެމްޑީޕީގެ ވާދަވެރިންގެ ތަސައްވަރަކީ މާލެ ސަރަހައްދަށް މީހުން ޖަމާކުރުން. ރަށެއްގެ ތަރައްޤީ އެއީ އެމީހުންގެ ވިސްނުމެއްނޫން. ކޮމަންޑޫ، ފޯކައިދޫ، އަދި މަރޮށި ތަރައްޤީ ކުރުމަށް އެމީހުންގެ މީހަކު ހޮވުމުގެ ބޭނުމެއްނެތް. އެންމެންގެ ވޯޓު ތިލަފަތަށް.
– ރައީސް ނަޝީދު ވިދާޅުވިއެވެ.
ނަޝީދު މިފަދައިން ވިދާޅުވީ އެއްފަސްކުރުމުގެ ހައްލަކަށް އަދިވެސް އޮތީ މާލެ އާއި މާލެ ސަރަހައްދު ކަމުގައި ކުރީގެ ރައީސް އަބްދުﷲ ޔާމީން ވިދާޅުވެ ދައްކަވާފައިވާ ވާހަތަކައި ގުޅިގެންނެވެ. ރައީސް ޔާމީން ވިދާޅުވެފައިވަނީ މާލެ ސަރަހައްދަކީ މިހާރުވެސް ޖާގަ އޮތް ރާއްޖޭގެ ގިނަ އަދަދެއްގެ ބަޔަކު މިހާރުވެސް ދިރިއުޅެމުންދާ ސަރަހައްދު ކަމަށެވެ. މިސަރަހައްދުގައި އިންސާނީ ވަސީލަތާއި، އެނޫން ވަސީލަތްތައްވެސް ހުރުމުން މިސަރަހައްދު އަދިވެސް އެފަސްކުރުމަށް އެންމެ ރަނގަޅު ސަރަހައްދަކަށް ބެލުމަކީ އެންމެ ރަނގަޅު ގޮތްކަމަށެވެ.
ރައީސް ޔާމީން ވިދާޅުވީ، ރާއްޖޭގެ އެހެން ބައެއް ސަރަހައްދުތަކުގައި އެއްފަސްކުރި ނަމަވެސް ދިމާވެފައިވާ އެންމެ ބޮޑު މައްސަލައަކީ ވަސީލަތްތައް ނެތުންކަމަށެވެ. އާންމު މުޖުތަމައަކަށް ބޭނުންވާ ހުރިހާ ވަސީލަތެއް މާލެ ސަރަހައްދުގައި ހުރި ފެންވަރަށް ގެންދެވުމަކީ އަދި އަހަރުތަކެއް ހޭދަވާނެ ކަމެއްކަމަށެވެ. ވަކިވަކި ރަށްތަކުން މިސާލު ނަންގަވަމުން ރައީސް ޔާމީން ވިދާޅުވީ، އައްޑޫ ސިޓީއާއި، ކުޅުދުއްފުއްޓާއި، ތިނަދޫފަދަ ތަންތަނުގައިވެސް އެންމެ ބޭނުންވާ މިންވަރަށް ވަސީލަތް ނެތުމަކީ އެރަހައްދުތަކުގެ އެންމެ ބޮޑު ޝަކުވާކަމަށެވެ.
ރައީސް ޔާމީން ވިދާޅުވީ މާލެ ސަރަހައްދު އެފަސްކޮށް، އަދިވެސް މީހުންނަށް ދިރިއުޅެވޭނެ އެތަކެއް ޖާގަތަކެއް ތަނަވަސް ކޮށްދެވޭނެ ކަމަށެވެ. ނަމަވެސް އެކަން ކުރުމުގެ އިހުލާސްތެރި ނިޔަތެއް އޮންނަން ޖެހޭކަމަށެވެ. ކޮންމެ ވެރިއަކުވެސް ވެރިކަމަށް އަންނަނީ ފަސް އަހަރުގެ ދައުރަކަށް އެދައުރުގައި ކުރެވޭނެ ވަރުގެ ކަންތައްތަކެއް ހިފައިގެން ކަމަށްވާއިރު، 20، ނުވަތަ 30 އަހަރުން ނިންމޭ ކަންކަން ހިފައިގެން އެއްވެސް ސިޔާސީ ލީޑަރު ނާންނާނެކަމަށެވެ.
ސިޔާސީ މީހުންނަކީވެސް ސިޔާސީ ކަންކަމުގައި އެދުން ބޮޑު ބަޔަކަށްވާއިރު، ސިޔާސީ ގޮތުން ކުރެވޭ ކަންކަމަކީ އެކަމުން އޭމީހެއްގެ މުސްތަގުބަލާއިވެސް ބިނާވާ ކަންތައްތަކެއް ކަމަށް ޔާމީން ވިދާޅުވިއެވެ. އަދި އެމަނިކުފާނުގެ ފަސްއަހަރުގައި މަސައްކަތް ކުރައްވާފައިވަނީ ދިވެހި ރައްޔިތުންނަށް އެކަމުން މަންފާ ލިބޭނެ ގޮތަށް ކަމަށް ރައީސް ޔާމީން ވަނީ ވިދާޅުވެފައެވެ.
